9
1 As toqꞌsa veꞌt u toꞌv u ángel u trompeta. As vil veꞌt umaꞌl u txꞌumil vatz u txꞌavaꞌeꞌ uvaꞌ maꞌtik ichajpik kuꞌ tzan tu almikaꞌ. As kat aqꞌax veꞌt umaꞌl u laave ste uvaꞌ la jajon u nimla tokkin juleꞌ.
2 As tul ijaj veꞌt u txꞌumileꞌ u nimla tokkin juleꞌ, as jeꞌ veꞌt chꞌuꞌl u sibꞌeꞌ stuul uvaꞌ ech ijeꞌ chꞌuꞌleꞌ echeꞌ ijeꞌ chꞌuꞌl isibꞌil umaj nimla oorno. As ok veꞌt u sibꞌeꞌ vatz u qꞌiieꞌ tukꞌ vatz u kajiqꞌeꞌ. As tokin veꞌteꞌ.
3 As mamaꞌla sakꞌ kuꞌ veꞌt chꞌuꞌl tu u sibꞌeꞌ. As ipaxi veꞌt tibꞌ txoo vatz u txꞌavaꞌeꞌ. As aqꞌax veꞌt te txoo tiꞌ ibꞌanataꞌ echeꞌ nibꞌan unqꞌa ixkabꞌeꞌ,
4 tan yeꞌ la iyansa veꞌt txoo unqꞌa itzaaeꞌ vatz u txꞌavaꞌeꞌ, tukꞌ unqꞌa kꞌuacheꞌ uveꞌ chaꞌx teleꞌ, as tukꞌ unqꞌa tzeꞌeꞌ. Pet aꞌ kuxh la ichiꞌ txoo unqꞌa uxhchileꞌ uveꞌ yeꞌl texhlal atoꞌk xoꞌl vipalaeꞌ taꞌn u Tiixheꞌ.
5 As yeꞌ kat aqꞌax te txoo uvaꞌ la iyatzꞌ txoo unqꞌa uxhchileꞌ. Pet la kuxh ikꞌaxbꞌisa txoo unqꞌa uxhchileꞌ tiꞌ ichꞌoꞌnsaleꞌ tu oꞌvaꞌl ichꞌ, tan ech u kꞌaxkꞌoeꞌ uvaꞌ la ipalebꞌe unqꞌa uxhchileꞌ taꞌn txoo echeꞌ ichiꞌon u ixkabꞌeꞌ.
6 As tu unqꞌa qꞌiieꞌ, as la tal veꞌt unqꞌa tenameꞌ ikameꞌ. As yeꞌ veꞌt u kamchileꞌ la ibꞌaneꞌ. As kꞌuxh la tachva unqꞌa tenameꞌ ikameꞌ, poro yeꞌ veꞌt tetz u kamchileꞌ stiꞌ la ibꞌaneꞌ.
7 As ech tilon unqꞌa sakꞌeꞌ echeꞌ unqꞌa kaayeꞌ, tul nibꞌen txoo tu u chꞌaꞌo. As atik jeꞌ umaꞌl uvaꞌ tiꞌ iviꞌ txoo uvaꞌ ech tiloneꞌ echeꞌ umaj koroona uvaꞌ qꞌan chꞌichꞌ chittuꞌ. As ech tilon veꞌt vivatz txooeꞌ echeꞌ ivatz umaj uxhchil.
8 As atik xiꞌl iviꞌ txoo echeꞌ xiꞌl iviꞌ umaj ixoj. As ech unqꞌa tee txooeꞌ echeꞌ tee unqꞌa bꞌalameꞌ.
9 As bꞌajumalik u tziꞌ taama txooeꞌ taꞌn umaꞌl uvaꞌ echeꞌ chꞌichꞌ. As ech chit ivulun veꞌt vixichꞌ txooeꞌ echeꞌ ivulun mamaꞌla kareꞌt uveꞌ qinimal taꞌn kaay tul nibꞌen tu u chꞌaꞌo.
10 As kat aqꞌax veꞌt te txoo tiꞌ ikꞌaxbꞌisal unqꞌa tenameꞌ. As aꞌ vijee txooeꞌ kat kꞌaxbꞌisan tu oꞌvaꞌl ichꞌ, tan jutzꞌ chit iviꞌ vijee txooeꞌ echeꞌ ijee unqꞌa ixkabꞌeꞌ.
11 As vibꞌooqꞌol unqꞌa txooeꞌ as aꞌ u ángel uvaꞌ jeꞌ chꞌuꞌl tu u nimla tokkin juleꞌ. As Abadón ibꞌii tu u yolbꞌal hebreo. As ech koj tu yolbꞌal griego, tan Apolión ibꞌii.
12 Ech ipal u bꞌaxa kꞌaxkꞌoeꞌ kat pali. As atil chit kaꞌvaꞌt kꞌaxkꞌo uvaꞌ la uli.
13 As toqꞌsa veꞌt ivajpa u ángel u trompeta. As kat vabꞌi umaꞌl u tuul viꞌ xoꞌl kajvaꞌl ixoobꞌ u nachbꞌal Tiixheꞌ uvaꞌ qꞌan chꞌichꞌ chittuꞌ, uvaꞌ at vatz u Tiixheꞌ.
14 As ech tal veꞌt u tuul viꞌ ileꞌ te ivajpa u ángel uvaꞌ atik trompeta xeꞌ: «Saapu veꞌt kajvaꞌl unqꞌa ángel uveꞌ kꞌalel tziꞌ u nimla aꞌeꞌ uveꞌ Éufrates,» tiꞌke.
15 As saapul veꞌt kajvaꞌl unqꞌa ángel uveꞌ nik itxꞌebꞌon veꞌt tiꞌ u ooraeꞌ, tukꞌ tiꞌ u qꞌiieꞌ, tukꞌ tiꞌ u ichꞌeꞌ, as tukꞌ tiꞌ u yaabꞌeꞌ, as tiꞌ iyatzꞌpu veꞌt chꞌoola pokꞌoꞌchil unqꞌa tenameꞌ vatz u txꞌavaꞌeꞌ.
16 As vabꞌi veꞌt u tachul unqꞌa soleꞌ uveꞌ bꞌen veꞌt tu u chꞌaꞌoeꞌ tiꞌ kaay. As laakꞌalal millón (200,000,000) tachul veꞌt kat vabꞌi.
17 As tul nik ikꞌuchpu sve uvaꞌ echeꞌ vatzikꞌ, as kat vil unqꞌa kaayeꞌ tukꞌ unqꞌa najeꞌ uveꞌ atik jeꞌ stiꞌ. As atik ok umaꞌl uvaꞌ tziꞌ taama unqꞌa soleꞌ uvaꞌ kaj tiloneꞌ echeꞌ xamal, tukꞌ umaꞌt uvaꞌ tiꞌxay echeꞌ u kꞌubꞌeꞌ uvaꞌ zafiro ibꞌii, as tukꞌ umaꞌt uvaꞌ echeꞌ u azufre. As ech tilon viviꞌ unqꞌa kaayeꞌ echeꞌ iviꞌ bꞌalam. As nik tel chꞌuꞌl xamal titziꞌ unqꞌa kaayeꞌ, tukꞌ sibꞌ, as tukꞌ azufre.
18 Aꞌeꞌ oxvaꞌl u kꞌaxkꞌoeꞌ uvaꞌ kat el chꞌuꞌl titziꞌ unqꞌa kaayeꞌ. As kat kam chꞌoola pokꞌoꞌchil unqꞌa uxhchileꞌ vatz u txꞌavaꞌeꞌ taꞌn u xamaleꞌ, tukꞌ u sibꞌeꞌ, tukꞌ u azufre.
19 As atik iyakꞌil unqꞌa kaayeꞌ tiꞌ ikꞌaxbꞌisat unqꞌa uxhchileꞌ tukꞌ itziꞌ as tukꞌ ijee unpajte, tan ech tilon vijee txooeꞌ echeꞌ umaj txꞌiꞌlatxoo uvaꞌ nik chiꞌon unqꞌa uxhchileꞌ tukꞌ viviꞌeꞌ.
20 As ech koj unjoltu unqꞌa uxhchileꞌ uvaꞌ yeꞌ kat kam taꞌn unqꞌa kꞌaxkꞌoeꞌ, tan yeꞌ kat ikꞌaxa tibꞌ tiꞌ iyaꞌsat u vaꞌlexheꞌ uvaꞌ nik ibꞌaneꞌ. As yeꞌ kat iyaꞌsa toksat iqꞌii unqꞌa subꞌuleꞌ tukꞌ unqꞌa tiixheꞌ uvaꞌ chꞌichꞌ, tukꞌ unqꞌa tiixheꞌ uvaꞌ kꞌubꞌ, tukꞌ unqꞌa tiixheꞌ uvaꞌ tzeꞌ, jankꞌal unqꞌa tiixheꞌ uveꞌ yeꞌ ni tiloneꞌ, as yeꞌ ni tabꞌineꞌ, as yeꞌ nitxꞌol ixaaneꞌ.
21 As mitaꞌn kat iyaꞌsa tiꞌ iyatzꞌoneꞌ, tiꞌ ikunat vimooleꞌ, as tiꞌ iyansat tibꞌ tukꞌ umaꞌt uxhchil. As yeꞌ kat iyaꞌsa ibꞌanat u elaqꞌeꞌ.