3
Niyolon u Jesús tukꞌ u Nicodemo
1 Atik umaꞌl u fariseo uvaꞌ Nicodemo ibꞌii. As naj umaꞌl viqꞌesal unqꞌa tiaal Israel.
2 As oon veꞌt naj aqꞌbꞌal xeꞌ u Jesús. As ech bꞌex tal naj ileꞌ: —Chusul, as ootzimal sqaꞌn uvaꞌ aꞌ u Tiixheꞌ kat chajon tzan axh, tan yeꞌxhebꞌil la txꞌolon ibꞌanax unqꞌa kꞌuchbꞌal tetz u tijleꞌm u Tiixheꞌ uveꞌ nabꞌaneꞌ, asoj yeꞌl Aak at skꞌatz,— tiꞌk naj.
3 As ech tal veꞌt u Jesús ileꞌ: —Jik chit tuk val see, tan abꞌil uvaꞌ yeꞌ la itzꞌebꞌ tikaꞌpa, as yeꞌ la uch tok xoꞌl unqꞌa tenameꞌ uvaꞌ at jaqꞌ u tijleꞌm u Tiixheꞌ,— tiꞌk u Jesús.
4 As ech tal veꞌt u Nicodemo ileꞌ: —¿Kam la tulbꞌe umaj naj qꞌi titzꞌebꞌeꞌ tul qꞌestu veꞌt naj? ¿Ma la uch bꞌa uvaꞌ la ok naj kꞌatz vitxutxeꞌ tiꞌ titzꞌebꞌ unpajte?— tiꞌk naj.
5 Ech tal veꞌt u Jesús ileꞌ: —Jik chit tuk val see, abꞌil uvaꞌ yeꞌxhkam itzꞌebꞌnal kꞌatz u Tiixheꞌ taꞌn u Tiixhla Espíritu as yeꞌxhkam itzꞌebꞌnal taꞌn u aꞌeꞌ, as yeꞌ la uch tok xoꞌl u tenameꞌ uvaꞌ at jaqꞌ u tijleꞌm u Tiixheꞌ.
6 As abꞌil uveꞌ kat itzꞌebꞌ kꞌatz vitxutxeꞌ as vatz txꞌavaꞌilla chiꞌol kuxheꞌ. Pet abꞌil uveꞌ la itzꞌebꞌ taꞌn u Tiixhla Espíritu, as at veꞌt itiichajil kꞌatz u Tiixheꞌ.
7 As yeꞌ kuxh sotz akꞌuꞌl tiꞌ u yoleꞌ uveꞌ ni val see uvaꞌ techal chit la itzꞌebꞌ ex tikaꞌpa,
8 tan echeꞌ u kajiqꞌeꞌ tan kꞌuxh naabꞌi ivuluneꞌ, as yeꞌ natxꞌol eelataꞌ katiꞌch itzaaeꞌ, as katiꞌch ibꞌeneꞌ. Echat kuxh bꞌanel taꞌn unqꞌa uxhchileꞌ uveꞌ ni titzꞌebꞌ taꞌn u Tiixhla Espíritu,— tiꞌk u Jesús.
9 As ech tal veꞌt u Nicodemo ileꞌ: —¿La kol chit ibꞌan qꞌa echeꞌ uveꞌ naaleꞌ?— tiꞌk naj.
10 Ech tal veꞌt u Jesús ileꞌ te naj: —Axh umaꞌl u chusul tetz viyol u Tiixheꞌ xoꞌl unqꞌa tenameꞌ. ¿As ma yeꞌ napal bꞌa tu unqꞌa yoleꞌ?
11 Ileꞌ jik chit tuk val see tan kam unqꞌa veeꞌ ootzimal sqaꞌn as aꞌeꞌ ni qaleꞌ. As kam uvaꞌ ni qileꞌ as aꞌeꞌ ni qal isuuchil. As kꞌuxh aꞌ visuuchil u yoleꞌ uveꞌ ni val sete, as yeꞌ nenima.
12 As kꞌuxh aꞌ unqꞌa vatz txꞌavaꞌilla yoleꞌ uveꞌ ni val sete, as yeꞌ kat enima. ¿As aꞌ kol chit la enima unqꞌa yoleꞌ qꞌa uvaꞌ tetz u Tiixheꞌ uvaꞌ la val sete?
13 Tan yeꞌxhebꞌil kat jeꞌ tu almikaꞌ, pet taꞌn kuxh ineꞌ uvaꞌ in IKꞌAOL U NAJEꞌ uvaꞌ kat kuꞌ chꞌuꞌl tu almikaꞌ.
14 As echat chit la unbꞌaneꞌ echeꞌ uvaꞌ kat ibꞌan u Moisés, tul kat taqꞌ jeꞌ umaꞌl u vatzibꞌal txꞌiꞌlatxoo vatz umaꞌl u tzeꞌ tu u tzuukin txꞌavaꞌeꞌ tiꞌ tel unqꞌa tenameꞌ vatz u kamchileꞌ. As techal la aqꞌpik jeꞌ in vatz umaꞌl u tzeꞌ uvaꞌ in IKꞌAOL U NAJEꞌ,
15 aqꞌal uvaꞌ at itiichajil u taanxelal unqꞌa uxhchileꞌ kꞌatz u Tiixheꞌ, jankꞌal unqꞌa uxhchileꞌ uveꞌ la ikꞌujbꞌaꞌ ikꞌuꞌl sviꞌ. As yeꞌ la itzꞌej vitiichajileꞌ uveꞌ yeꞌl iyaꞌtebꞌal,— tiꞌk u Jesús.
Nixoꞌni u Tiixh unqꞌa tenameꞌ skajayil
16 Tan kat itxum u Tiixheꞌ ivatz unqꞌa tenameꞌ skajayil vatz u txꞌavaꞌeꞌ. Estiꞌeꞌ kat taqꞌ tzan Aak unchꞌiꞌtil viKꞌaoleꞌ tiꞌ ikameꞌ, aqꞌal uvaꞌ jankꞌal unqꞌa uxhchileꞌ uvaꞌ la ikꞌujbꞌaꞌ ikꞌuꞌl tiꞌ viKꞌaol Aakeꞌ as yeꞌ la tzꞌejxi. Pet at itiichajil uvaꞌ yeꞌl iyaꞌtebꞌal.
17 As yeꞌ kat ichaj tzan u Tiixheꞌ viKꞌaoleꞌ vatz u txꞌavaꞌeꞌ tiꞌ uvaꞌ la taqꞌ bꞌen Aak unqꞌa tenameꞌ tu u kꞌaxkꞌoeꞌ. Pet kat ichaj tzan Aak viKꞌaoleꞌ tiꞌ iqꞌalpul unqꞌa tenameꞌ vatz vipaaveꞌ.
18 Estiꞌeꞌ jankꞌal unqꞌa uxhchileꞌ uveꞌ la niman viKꞌaol u Tiixheꞌ as yeꞌl u kꞌaxkꞌoeꞌ at tzan stiꞌ. Pet jankꞌal unqꞌa uxhchileꞌ uvaꞌ yeꞌ ni niman as aꞌeꞌ at veꞌt tzan u kꞌaxkꞌoeꞌ stiꞌ, tan tiꞌ uvaꞌ yeꞌ kat ikꞌujbꞌaꞌ ikꞌuꞌl tiꞌ unchꞌiꞌtil viKꞌaol u Tiixheꞌ.
19 As kat teesa veꞌt el tibꞌ unqꞌa tenameꞌ kꞌatz u txijun tetz u taanxelaleꞌ tul uvaꞌ kat ul Aak vatz u txꞌavaꞌeꞌ, tan tiꞌ uvaꞌ nisaꞌ unqꞌa tenameꞌ ibꞌanat u vaꞌlexheꞌ. Pet yeꞌ nisaꞌ inimat u txijun tetz u taanxelaleꞌ. Estiꞌeꞌ at veꞌt tzan u kꞌaxkꞌoeꞌ tiꞌ unqꞌa tenameꞌ.
20 As jankꞌal unqꞌa tenameꞌ uveꞌ aꞌ kuxh u vaꞌlexheꞌ nibꞌaneꞌ as nichiꞌan taama tiꞌ u txijun tetz u taanxelaleꞌ. As ni teesa veꞌt el tibꞌ skꞌatz, tan aꞌ isaꞌ uvaꞌ yeꞌ la majax ivatz tiꞌ ipaavineꞌ.
21 Pet ech koj unqꞌa uxhchileꞌ uveꞌ ni bꞌanon u jikeꞌ, tan nijetzꞌen ok kꞌatz u txijun tetz u taanxelaleꞌ, aqꞌal uvaꞌ la tootzi unqꞌa tenameꞌ uvaꞌ aꞌ u Tiixheꞌ aqꞌol tetz vitxumbꞌaleꞌ tiꞌ ibꞌanat u bꞌaꞌneꞌ.
Niyolon u Xhun tiꞌ u Jesús
22 As xamtik veꞌt stuul, as el veꞌt u Jesús tu u Jerusalén tukꞌ unqꞌa ichusulibꞌeꞌ. As oon veꞌt Aak tu u Judea uvaꞌ nik taqꞌaxkat kuꞌ unqꞌa uxhchileꞌ xeꞌ u aꞌeꞌ taꞌn Aak.
23 As echat nik ibꞌan u Xhuneꞌ unpajte, tan nik taqꞌ kuꞌ unqꞌa uxhchileꞌ xeꞌ u aꞌeꞌ tu u tenameꞌ uvaꞌ Enón, najlich u Salim, tan tiꞌ uvaꞌ nim u aꞌeꞌ uvaꞌ atik tzitziꞌ. As yeꞌ saach unqꞌa uxhchileꞌ uli tiꞌ ikuꞌ xeꞌ u aꞌeꞌ,
24 tan yeꞌxnik oksal u Xhuneꞌ tu u kaarsa.
25 As nik iyaa tibꞌ unqꞌa ichusulibꞌ u Xhuneꞌ tukꞌ kaꞌt vimooleꞌ uvaꞌ tiaal Israel, tiꞌ uvaꞌ kam la tulbꞌe unqꞌa uxhchileꞌ teesat el u vaꞌlexheꞌ tu u taanxelaleꞌ vatz u Tiixheꞌ.
26 As ech bꞌex tal veꞌt unqꞌa ichusulibꞌ u Xhun ileꞌ ste: —Chusul, u najeꞌ uvaꞌ atik sakꞌatz jalit u nimla aꞌeꞌ uvaꞌ Jordán, uvaꞌ yolon axh stiꞌ, as ni taqꞌ kuꞌ naj unqꞌa uxhchileꞌ xeꞌ u aꞌeꞌ. As yeꞌ saach tok veꞌt unqꞌa tenameꞌ kꞌatz naj,— tiꞌk chajnaj.
27 Ech tal veꞌt u Xhun ileꞌ te chajnaj tiꞌ u Jesús: —Aꞌeꞌ nibꞌaneꞌ uvaꞌ alel tzan ste taꞌn u Tiixheꞌ, tan yeꞌxhkam la uch ibꞌanat umaj uxhchil, asoj jit u Tiixheꞌ tu almikaꞌ kat aqꞌon ste.
28 As an chit exeꞌ kat abꞌin vunyoleꞌ uvaꞌ ech kat val ileꞌ: Jit ineꞌ u Cristo, tan Tiixheꞌ kat chajon tzan in bꞌaxa vatz u Cristo,— chꞌin kat val sete,
29 tan ech vatineꞌ vatz u Cristo echeꞌ umaj tetz kꞌultziꞌ u tzumelaeꞌ uvaꞌ at txala, tan aꞌ kuxh u tzumelaeꞌ kꞌujleꞌl tiꞌ u ixqelaeꞌ. Pet ech koj u tetz kꞌultziꞌ u tzumelaeꞌ, tan nichiibꞌeꞌ tul ni tabꞌi u tuul iviꞌeꞌ. As echat chit bꞌan vaꞌn, tan vaꞌl chit unchiibꞌeꞌ.
30 As aal tuk oksaloj veꞌt iqꞌii Aak. Pet ech koj in, tan yeꞌl unqꞌii la oksal veꞌteꞌ.
Niyolon u Xhun tiꞌ u tijleꞌm u Jesús
31 Tan aꞌ tzaanajkat Aak tu almikaꞌ. As Aak veꞌteꞌ nim talcheꞌ tiꞌ unqꞌa tenameꞌ skajayil. Pet ech koj in, tan in kuxh vatz txꞌavaꞌil aama, as aꞌ kuxh u vatz txꞌavaꞌil yoleꞌ ni valeꞌ, tan aꞌ kuxh u vatz txꞌavaꞌil txumbꞌaleꞌ eqꞌomal svaꞌn. Pet ech koj u Jesús, tan aꞌ tzaanajkat Aak tu almikaꞌ. As taꞌn Aakeꞌ nim talcheꞌ tiꞌ unqꞌa tenameꞌ skajayil.
32 As aꞌeꞌ ni tal u Jesús kam uveꞌ kat til Aak tukꞌ uveꞌ kat tabꞌi Aak. As kaꞌl kuxh unqꞌa uxhchileꞌ ni niman viyol Aakeꞌ.
33 Pet abꞌil uvaꞌ ni niman u yoleꞌ uvaꞌ ni tal u Jesús, as nikꞌucheꞌ uvaꞌ jik chit u yoleꞌ uveꞌ ni tal u Tiixheꞌ ste,— tiꞌk u Xhuneꞌ.
34 Kat ichaj tzan u Tiixheꞌ u Jesúseꞌ. As tul uvaꞌ niyolon u Jesús, as an chit u Tiixheꞌ niyoloneꞌ. Tan ayaꞌl chit ikꞌuꞌl u Tiixheꞌ kat taqꞌ Aak viTiixhla Espíritu te u Jesús.
35 As xoꞌn chit viKꞌaol u Kubꞌaaleꞌ ste. As kat toksa Aak viKꞌaoleꞌ Bꞌooqꞌolil tiꞌ unqꞌa veeꞌ skajayil.
36 Estiꞌeꞌ uvaꞌ abꞌil la ikꞌujbꞌaꞌ ikꞌuꞌl tiꞌ viKꞌaol u Tiixheꞌ as at veꞌt itiichajil uvaꞌ yeꞌl iyaꞌtebꞌal. Pet abꞌil uvaꞌ yeꞌ la niman Aak as yeꞌl veꞌt itiichajil u taanxelaleꞌ kꞌatz u Tiixheꞌ, pet aꞌ veꞌt vitxꞌiꞌtziꞌl u Tiixheꞌ at veꞌt tzan stiꞌ.