U KAꞌBꞌ Uꞌ ITZꞌIBꞌA BꞌEN U XHAN XEꞌ QꞌU NIMAN TETZ U JESUUS
Yol tiꞌ u uꞌ tzaꞌ
Aꞌ tzꞌibꞌan u uꞌ tzaꞌ u Xhan. Aꞌ nital jeꞌ tibꞌ aas in “ansiano” chia. Aꞌ nitaqꞌvu bꞌen xeꞌ qꞌu aanima qꞌuꞌl “itxaaom Tioxh” chu tiꞌ. Ayaꞌ qꞌu niman tetz u Jesuus, niyolonka. Yeꞌ ootzajimal til itzꞌibꞌava utz, kam tuul itzꞌibꞌa. Pek kamal aꞌ itzꞌibꞌataꞌ aas maꞌtich ipaal u yaꞌbꞌ 90 m.t.J.
Aatz tu u uꞌ tzaꞌ, nikꞌam tiꞌ maꞌl txutx nitxaꞌ u Xhan tuchꞌ titzꞌin. Loqꞌ aꞌ nital maꞌl qꞌesala tuchꞌ qꞌu niman tetz u Jesuus. Yeꞌxhkam nital vatzsaj bꞌaꞌnil, abꞌil niqꞌila tan, kaanaich txaypichil tiꞌ u yolbꞌal Tioxh tu u tiempo tziꞌ, tikuenta u ijlenal tu Roma vaꞌl Domiciano ibꞌii. Ok tu u yaꞌbꞌ 81 utz, el tu 96 m.t.J.
Kam koj tokeꞌ aas itzꞌibꞌa u uꞌ tzaꞌ, pek tiꞌ qꞌu tzaꞌl nichpaalku qꞌu niman tetz u Jesuus tu u tiempo tziꞌ. Utz aꞌ nital tu qꞌu niman tetz u Jesuus aas sibꞌan kuenta tibꞌ tu qꞌu yeꞌxtxojla chaj chusul, qꞌu subꞌul qꞌuꞌl nichalon aas yitꞌ noj koj vaꞌl ninimaleꞌ aas ul u Jesuus tuchꞌ ichiꞌl. Ech nital u Xhan tu qꞌu aanima aas aꞌ tii saꞌatinku tiꞌ inimal vinujul; ayaꞌ qꞌu chusbꞌal kꞌatz u Jesuus. Utz nitaleꞌ aas tii tibꞌilaj siꞌaneꞌ.
Aꞌ u jatxbꞌal tibꞌ qꞌu yol tu u uꞌ tzaꞌ.
1) v. 1-3 Nitaqꞌ chajlichil.
2) v. 4-6 Nital tiꞌ u mantaar tiꞌ u tii uchchil ibꞌilaj.
3) v. 7-11 Nital tiꞌ u kꞌujeꞌich kꞌuꞌl tiꞌ u Jesuus.
4) v. 12-13 Ech vitzojpu qꞌu yol tu u uꞌ tzaꞌ.
1
U KAꞌBꞌ Uꞌ ITZꞌIBꞌA BꞌEN U XHAN XEꞌ QꞌU NIMAN TETZ U JESUUS
Ichajlichil qꞌu niman tetz u Jesuus
1 In Xhan, ansiano xoꞌl qꞌu niman tetz u Jesuus. Nuntzꞌibꞌa bꞌen u uꞌ tzexeꞌ tzaꞌ, ex itxaaom u Tioxh. Tan tiiꞌin setiꞌ tiꞌ inimal vinujul. Utz in koꞌnkoꞌxh tiiꞌin setiꞌ, pek antu tereꞌn qꞌu aanima ootzajin tetz vinujul majte. 2 Ech bꞌaꞌn in sete tiꞌ vinujul, vaꞌl atil tu kuxoꞌl. Utz ech koꞌxh tatin vinujul quxeꞌ bꞌenamen siꞌaneꞌ tziꞌ. 3 Ech taqꞌ koj vibꞌaꞌnil u Tioxh texoꞌl, ayaꞌ u kuTat, tuchꞌ u kuBꞌaal Jesucristo, viKꞌaol, vaꞌl nojchit inujul utz, tii qiꞌ. Utz itxum koj evatz. Taqꞌ koj u paas texoꞌl.
Vinimal vichusbꞌal u Jesuus
4 Kaana untxuqꞌtxuneꞌ aas vabꞌi ninima u yolbꞌal Tioxh unjolol qꞌu aanima niman tetz u Jesuus tzexeꞌ. Nojchit ech ipaaleꞌ vinujul, ayaꞌ u yolbꞌal Tioxh vaꞌl kꞌulel xeꞌ u kuTat qaqꞌo. 5 Pek nunjaj sete cheel, ex niman tetz u Jesuus, aas tiira sakubꞌan tiiꞌoꞌ qibꞌilaj. Loqꞌ yitꞌ anal koj nival vaꞌt u chusbꞌal sete tzaꞌ. Pek ankoꞌxhtuꞌ vaꞌl aqꞌelka tixeꞌtebꞌal.+. 5 Choktaj U Xhan 13.34; 15.12-27. Aatz u yol “tixeꞌtebꞌal” nital u Xhan tzaꞌ, aꞌ nital u oꞌtla mantaar aqꞌax koꞌxtene tikuenta u Moisees. 6 Utz sakubꞌan tiiꞌoꞌ qibꞌilaj atziꞌ oj sakunima kam nital qꞌul imantaar u Tioxh. Tan nital vimantaar u Tioxh aas sakubꞌan tiiꞌoꞌ tiꞌ kumol. Ech aꞌ vaꞌl abꞌimal qaqꞌo utz, chusel qaqꞌo tixeꞌtebꞌal.
U tuch kuentaibꞌtu qꞌu eesanal tu bꞌey
7 Sibꞌal koꞌxh chusul eesanal tu bꞌey cheey tu u vatz amlika txꞌavaꞌ tzaꞌ. Utz nimotxtaleꞌ aas yitꞌ tuchꞌ koj ichiꞌl u Jesucristo uli. Aꞌ nialon qꞌu kam tziꞌ qꞌu eesanal tu bꞌey, u xeꞌkꞌulan tetz u Cristo. 8 Ech tokeꞌ kuentaꞌex. Enimachi. Ech yeꞌk setzꞌej viqꞌaqꞌal vetaqꞌon vatz Tioxh. Pek tzꞌajel ikꞌulax u choobꞌal sebꞌaneꞌ vaꞌl sataqꞌ u Tioxh sete.
9 Abꞌiste qꞌuꞌl yitꞌ tii koj atoꞌk tiꞌ inimal u bꞌaꞌnla chusbꞌal tetz u Cristo, tzꞌejxichil niꞌaneꞌ. Utz yeꞌk u Tioxh kꞌatza atziꞌ. Pek abꞌiste qꞌuꞌl tii atoꞌk tiꞌ u bꞌaꞌnla chusbꞌal tetz u Cristo, aꞌ qꞌuꞌl atil u kuTat kꞌatza tuchꞌ viKꞌaol. 10 Ech abꞌil maꞌj soꞌopon tzexeꞌ utz, yitꞌeꞌch koj u chusbꞌal iqꞌomal taqꞌo vaꞌl niqaleꞌ, yeꞌ koꞌxh ekꞌul tetatibꞌal. Utz yeꞌ koꞌxh etal te aas: —¡Qeꞌl ulyaxh!— Chajkojex te. 11 Tan abꞌiste vaꞌl nikꞌulun utz, nialon te aas: —¡Qeꞌl ulyaxh!— Chu te, antu atoꞌk tiꞌ viyeꞌxtxojla chusbꞌal atziꞌ.
U taltu u Xhan aas soꞌoponxeꞌ qꞌu niman tetz u Jesuus
12 Sibꞌ tereꞌn koꞌxh kam saval sete, pek yitꞌ tzꞌibꞌamal koj talax sete sunbꞌaneꞌ. Tan jik soꞌoponin tzexeꞌ. Utz laval sete aas laqil qibꞌ. Ech tzꞌajel u kutxuqꞌtxun qibꞌilaj. 13 Nitaqꞌ opon echajlichil qꞌu niman tetz u Jesuus qꞌul itxaaom u Tioxh qꞌuꞌl atil tzaꞌ. Aꞌi.
+.1:5 5 Choktaj U Xhan 13.34; 15.12-27. Aatz u yol “tixeꞌtebꞌal” nital u Xhan tzaꞌ, aꞌ nital u oꞌtla mantaar aqꞌax koꞌxtene tikuenta u Moisees.