1-4 Okone angi, ipa peya-maiyane akali Jone oko bala Jutiya disitiki okona epoto, wandakali napalene yuu mindina ateaipia. Balana tona yia kamele itini-mane waa-pene mindi umbaininga piyu, matipu bulumako umbaini-mane waa-pene mindi pua atalaepia. Balato neme ipane-mane waa-pene tomo oni lene siapusa lialane tupapi, palai tupapi, utupane no atalaepia. Wamba potopesa akali Aisayato Jone andayo, Gotena pii mindi loto, akali mindimane wandakali napalene yuu mindina atoto, pii taimane loto, yakamato Akali Andane oko epolane asini mindi mandeke pua yata mawuato, balana asini aŋako tupa mo tika piyapape lo atolopeya leaipia. Potopesa akali Aisayato pii okone leane pua teke, Jone bala wandakali napalene yuu okonena atoto, Gotena pii oko wandakali tupa lamaiki puato, ati kenga yuu epene okona atalane akali okomane yakama moyo ando atoyale mandaka gulo epeya-ko. Yakamato yamapane peke lalapa lamaiki peaipia. * 2Ki 1:8; Ais 40:3; Mt 4:17

5 Joneto wuane loto, pii lamaiki pea-kola, Jutusaleme tanepi, Jutiya tanepi, ipa Jotane mandaka atalaini wandakali tupapi, utupane pitaka bala ateanga ipuku peainipia. 6 Ipuku puato, utupane-mane yakamana koo piyaini tupa lo pana aka peai-kola, Joneto ipa Jotane okona atoto, utupane ipa peya-maiki peaipia. 7 Joneto utupane ipa peya maiki pea-kola, Patasai tupapi, Satusi tupapi, utupanena kambua minditupa ipa mia-makale lama epeainipia. Epeai-kola, Joneto utupa andoto, yakama etulu gepo-mane mandiyene yame ateyai leaipia. Goteto yakama towa yataka wato, kenda-pene minditupa yakama gulupeya-ko. Apito wuane lo yakama langipia-kola, Goteto kenda-pene utupane yakamanga epeakale lolane lo yuku wato, yakama palaka epoto, ipa mia-makale leyaipe. * Mt 12:34-35; 23:33-36

8-10 Goteto ana oo eya utupa Apatakame yame gulalapa leando, ana utupa-mane katulo Apatakame yamena mandiyene wandakali tupa gulolo-peyai. Wuaneko, yakama teke-teke pii lalawa puato, nanima Apatakame yame wandakali ateyama-ko. Goteto nanima towa yataka wato, kenda-pene mindi nanima gii napulu-peya lolaini, ando atalapape. Goteto ita koo tupa yokoyale, uu mindi ita tenenga yata yane eya. Dini epene lia napiyane ita tupa pitaka balato yoko wato, ita too atene okona yangolo-peyako. Ita epene tupanga dini epene lialaini pua, yakama mini peke loto, mana epene tupa wato minalapape. * Mt 7:15-20; Lk 13:6-9; Jo 8:33,39; Lom 4:12

11 Akali mindi epolopeya okonena tai-lene okomane nambana tai-lene oko sia minulu-peyako. Nambato balana sukee pula oko ai maipe-pene namba akali epene mindi jia. Yakama yamapane peke leyai-kola, nambato ipa-mane yakama ipa peya-geyo tekeko, akali matili epolopeya okomane Oli Sipitisa okola, ita kaiyapiane okola, okonelapo-mane yakama ipa peya-gulupeya. * Jo 1:26-27,33; Ap 1:4-5 12 Balato sapolo mindi awua ateya okomane witi dini epene tupa balana tomo yalane anda okona yata wato, witi imbuni tupa aki puato, ita too koyo napiyane mindina yangolo-peya. Wuane piyu, balato utupanena minditupa balana piape piyane ama okonena mee yakale lo ando konda napulu-peya. Jia. Joneto wuane leaipia.

13 Okone angi, Joneto bala ipa peya-geakale nembo toto, Jisasa bala Galili disitiki oko tepa alu, ipa Jotane okona epeaipia. 14 Jisasa ipa molo epeane tekeko, Joneto bala lamawuato, nimbato namba ipa peya gipi-yale, okone kuai lapia-yaleko. Anu peakale nambato nimba ipa peya-gii lama epelepe leaipia. 15 Wuane lea-kola, Jisasato balana pii okone yano peyoto, nimbato namba ipa peya-geendo, mana okonemane Gotena mana epene tika-pene oko nalipato wato minulupa-kola pulu-peyako. Andipa nambato leyo pua nimbato nambanga pii leaipia. Wuane lea-kola, Joneto balana pii okone wato minuto, bala ipa peya-maiyaepia.

16 Jisasa bala ipa mialu, ipa oko tepa wato, andea-kola, ati iyu oko yapu lo toko lea-kola, Gotena Sipitisa oko eka uya gulo balanga epo peteanga andeaipia. * Jo 1:32-33 17 Okone angi, pii layene mindi ati kenga atala epeane okomane Jisasa andayo pii mindi loto, akali oo ateya oko bala nambana iwanane yamapane yene oko. Nambato balana mana tupa andoto, epele wetete eyo leaipia. * Sam 2:7; Ais 42:1; Mt 12:15-21; 17:5; Lk 9:35