2
1 Ha"in an hi Habakkuk ya umuya' hinan ata'nang an ihinan di mungguwalya
ta hodo' nan alyon Apo Dios ay ha"in ya hay pambalnah din inlili' ay Hiya!
Hay Nambal Apo Dios ay Habakkuk
2 At hiyah te nambal Apo Dios ay ha"in an inalinay,
“Ipaphodmun itudo' hinan ikab an batu nan ipa'innila' ay he"a
ta madadawoh hi pamahaan nan umuy an mangipa'innilah nan udum an tatagu.
3 Ya manu ay alyo' di itudo'mu nan ipa'innila' ay he"a ti madnoy di adatngan nan ipa'annungana
ti hay pohdonan ipa'innila ya hay ma'ma'at hi angunuhna.* Ipitudo' Apo Dios ay Habakkuk nan a'abakan nan Pumpapto'an nan iBabylon ti na'abak hidin October 29, 539 B.C. (Dan. 5:31).
Ya immannung an ma'at hana ti bo'on layah,
at anuhanyun hodon an ta"on un madnoy
ti hay gutud di a'atana ya immannung an ma'at an adi mibahhaw.† Heb. 10:37.
4 At itudo'mu hatu:
Immannung an mumpahiya nan iBabylon,
ya immannung goh an nappuhiy amnawanda,
mu makulug damdama an nan tagun ibilang Apo Dios an nahamad di ugalida
an dimmalat nan pangulugda ya diday mi'tagun Apo Dios hi munnononnong.‡ Rom. 1:17; Gal. 3:11; Heb. 10:38. Hiyah te verse an teman di Protestant hidin gutud di Nipaphodan nan Doctrina an ma'alih Protestant Reformation hidin amatagun Martin Luther ad Germany.
5 Ya bo'on hene ya anggay di aton nan mumpabagtu
ti adida mahenglah nan uminu'inumandah bayah,
at punlayahona dida,
at hiyanan adida ipogpog di pangipabagtuandah odolda.
Ya pohdondan am'amon an amin nan abablubabluy ta kaphulondan amin nan tatagu
an adida ipogpog nan ato'atondan nappuhi
an umatdah lubu' an adi mapogpog di matoy hi gun milubu'.
6 Mu danen tatagun makaphul ya hinhannulondan alyonday,
Mahmo' ayun nangamung hi inadangyan di udum!
Anuud nin di pangidinnganyun mangamangat hi umat hina
ta omod un ayu umadangyan hinan pamalbaliyanyuh nan tatagu?
Hiyah ne hanulda.
7 Undan adi la'tot ya ginubat da'yuh nan tatagu ti bumungotda,
ya mipanomnom ay dida nan ina'inatyu?
At ipata'ot da'yu,
ya nunhamhamadan amin nan gina'uyu,
at da'yu goh di tiliwonda.
8 Ya manu ay atondah ne ti nunhamhamyun amin di gina'un nan tataguh nan abablubabluy hitun luta,
ya numpatoyyu nan tatagu,
ya numpa"iyuy babluyda.
Mu nan na'angang an agguy natiliw ya diday mangiballoh ay da'yu ta hamhamonda nan gina'uyu!
9 Mahmo' ayu ti ma'itudan ayun tatagun hay kuluk di immadangyananyu,
ya henen inadangyanyuy dimmalat hinan immong'ongollanyu!
Ya ipadahyuy abalinanyun mangiyammah abungyuh nan lugal an alyonyuh mi'id di al'alih ma'at.
10 Mu dumalat nan inatyu an do'ol di numpa"iyuh nan abablubabluy ya da'yun hina"amay nabainan,
at mi'id mahkay di namnamayun mi'tagu.
11 Ya ta"on nan batun nidedeng hinan abungyu ya nan daladag hinan way atap
ya diday paddungnay mangit'u' an mun'ihtiguh nan ina'inatyun nun'appuhi!
12 Mahmo' ayun bumabluy hinan ohan lugal
an dumalat di pumatayanyu ya nan kuluk an ato'atonyun nun'appuhi!
13 Impa'annung'un Dios an nan aton nan nun'appuhin tatagu
ya mi'id ahan di hulbina an umat hinan dapul!
Mamablaydah nan puntamuanda,
mu mi'id ahan di pumbalinanah maphod
14 ti udum di algaw ya mipa'innila an munhinap hinan tataguh nan abablubabluy nan anabagbagtu' an Dios
an umat hinan danum an mane'nob hinan baybay.
15 Mahmo' ayun tatagun nidugah di pangiholholtapanyuh nan i'ibayun tatagu
an dumalat hinan punhinaggawanda an ayda nabutong,
ya unyuat goh pun'am'amlongan an tigon nan ayda numbobolladan!
16 Mu ma'at goh damdamay umat hina ay da'yu ta mabainan ayu!
Ya nan pummolta' an Dios di paddungnay inumonyu,
at munhinnigi ayu.
17 Da'yuy nangpuh hinan ayiw ad Lebanon§ Paddungnay pinnun nan iBabylon nan a'ayiw an cedar ad Lebanon ta ma'usal hinan timpluda ya palasyudad Babylon. ya numpatoyyu nan a'animal hidi,
at hiyaat un hi awni ya nidugah di ta'otyu ti ma'at goh damdama ay da'yu hanan ina'inatyun dida
ti numpatoyyu nan tataguh abablubabluy,
ya pina"iyuy babluydah punhituwanda an mi'id ah homo'yun dida.
18 Mi'id di hulbin nan bulul* Hay immannung hi itudun ten hapit hinan hapit di Hudyu ya nan ami'id. At ta"on hi un way mipattig an bulul mu paddungnay mi'idda damdama ti mid ah udumnan Dios an anggay hi Apo Dios. ti nan tagu ya anggay di nangiyamma,
at anaad udot ta dayawon di umat hina an umituduh layah?
Ya anaad ta nan nangiyamman nen bulul ya hiyay pangedenolana an ta"on un adi humapit?
19 At mahmo' ayun mumpabaliw hinan ayiw an bulul
ya umat goh hinan mumbagah batuh atona!
Ti undan hanan neyengngoh ya mi'hapitdan Ha"in an Dios?
Dida ya unda na'amyudan hi balitu' ya silver an adida humodohda!
20 Mu Ha"in an hi Apo Dios ya wagwadaa' hinan me'gonan an Timplu'
at mahapul an Ha"in pangedenolan an amin di tataguh tun alutaluta.”
*2:3 Ipitudo' Apo Dios ay Habakkuk nan a'abakan nan Pumpapto'an nan iBabylon ti na'abak hidin October 29, 539 B.C. (Dan. 5:31).
†2:3 Heb. 10:37.
‡2:4 Rom. 1:17; Gal. 3:11; Heb. 10:38. Hiyah te verse an teman di Protestant hidin gutud di Nipaphodan nan Doctrina an ma'alih Protestant Reformation hidin amatagun Martin Luther ad Germany.
§2:17 Paddungnay pinnun nan iBabylon nan a'ayiw an cedar ad Lebanon ta ma'usal hinan timpluda ya palasyudad Babylon.
*2:18 Hay immannung hi itudun ten hapit hinan hapit di Hudyu ya nan ami'id. At ta"on hi un way mipattig an bulul mu paddungnay mi'idda damdama ti mid ah udumnan Dios an anggay hi Apo Dios.