2
Keke kaliva tufoidi kanaꞋitalakalakavedi tu
tufoidi kanaꞋitahobuhobuyedi.
1 Tobohiyakweyao, omi yada Kaiwabu Yesu Keliso ana tovetumagana, BanaꞋe yana wamahalina veꞋakinamanamalina ma kalivai-nadi. Omi tovetumagana keke kaliva adi ita againe wanalagadi, au wanaꞋitadi leleleya. 2 WaꞋita, kaꞋi wakalivana ana wavaigau fatadi lakahina kadu ana wanimakwasi gola fatana lakahina yami manuwa-tafalolo againe ginaluku, kadu koyokoyo ana wavaigau koyona ginaluku, gavaimi wanahuluvidi? 3-4 KaꞋi wakalivana yami waveꞋamohimohina wanagahena wanagayo, “Kumani, hidei abavetoga hagihagina, au uhiyoto.” Tu kaꞋi koyokoyo wanagahena wanagayo, “Mene umidi,” o kaꞋi “Hidei efeꞋefeya agekuya uhiyoto.” KaꞋi mededemi wanahuluvidi, au adi ita againe ahe walagadi vaita yoꞋo luhei agaimiya hidamiyami, saꞋeyana kikaiwabudiyao saꞋeyana fanifanidiyao, kadu omi toꞋailaga taumiyao wakilakahimi au hida yami inuba koyo-moꞋena.
5 Tobohiyanuwakweyao, wanogali! Yaubada badi koyokoyo tomiyababi matadiya giluwafadi be keke lokoloko againe tu yadi vetumagana againe hinakaiwabu kadu Yaubada yana abavehimeyeya hinaluku-yo yana itaveꞋavina againe hinamiyami. Tuwai-moꞋena Yaubada badi Bana againe hinuwanuwa-ma hidedemi adi duꞋu faꞋina giwonadabedabedi. Mena koyokoyo adi lauwafa maꞋi wanuwenuwena o kaꞋi keke? 6 Tu omiꞋiyao ma koyokoyo waꞋihawadamanedi. Gavaiyami? Mene gaveyao hikikivekoyomi-yo kotu againe hisimadumadugemi? Me kikaiwabudiyao. 7 Wona velemona badi kikaiwabudiyao mena kalivai-dina yami Kaiwabu hihawahawatagona, BanaꞋe ana egana kikaiwabuna omi wawahina amanadi.
8 Gilubodami be yami Kaiwabu yana vehimeya lakahina wanaꞋitaveꞋavi-moꞋena. Vehimeyai-nadi Veyao Tuwaina ana bukiya gidadauda gigayo,
Tauni unuwakabubuye amine, tobohiya unanuwakabubuyena.
9 Atu kaꞋi kaliva adi ita againe walagadi tu keke wadaꞋitadi leleleya digo, omi vehimeyai-nadi ahe wayawelina ada omi vaita vehimeya ana toꞋaiyawela yami wakoyona Yaubada matane. 10 WaꞋita, gava kaliva Yaubada yana vehimeya matatabudi ginaꞋitaveꞋavidi tu vehimeya saꞋeyanaga againe ginakaliꞋuho, medema ana wavita vaita vehimeya matatabudi gidayaweli-Ꞌowodi. 11 Ide kahalamanena vehimeya matatabuna kayaweli-Ꞌowona faꞋina Bana Yaubada gigahe gigayo, “Keke unaꞋudo,” kadu Bana Kalivai-nadi gigahe gigayo, “Keke unaluveꞋalika.” KaꞋi keke wadaꞋudo tu waluveꞋalika, au ami egana vehimeya ana toꞋaiyawela.
12-13 Medema faꞋina yami gahe kadu yami gugai wanaꞋitaveꞋavina. Aimo tova mulina Yaubada kaliva moyaꞋaida ginavedewayaugida. KaꞋi keke kaliva kadahinekalikaliyedi digo, kadu keke-moꞋa Yaubada ide ginahinekalikaliyeda. Atu ide gaveyao Bana againe kahawahegeda-yo yana vehimeya tobohiyadeyao adi nuwakabubu faꞋina kaꞋitaꞋitaveꞋavina be vehimeya ana idibumuhiga againe ide kaliva yauyaugideyao ma kaꞋayaunena, medema Yaubada ginahinekalikaliyeda. E, vedewayauga ana toveya keke matahiwadi faꞋina kanamatauta, au yada wavemwamwala Yaubada yana hinekalikali kananuhagana. Au hidedemi hinekalikali matahiwadi gitubutagona. Af 10:34, 1Ti 5:21, Ye 2:9 Yo 7:24 Md 5:3 Af 16:19 Yem 20:13-14 Md 5:7
Omi tovetumagana keke vaita vetumaganagaga,
au yami waꞋigibagiba buyeꞋi.
14 Siule tobohiyakweyao, kaꞋi tamo hakwadi ginagahe ginagayo, “Iya Yaubada againe gavetumagana,” tu yana vetumagana keke igibagiba againe gidaseyemauneni, au hai ana yamumu? Keke. KaꞋi mene yana vetumagana againe ana kibababala ginanuhagana? Keke, keke-moꞋa! 15-16 WaꞋita, kaꞋi tobohiyami o noumi saꞋeyana Yesu Keliso yana yoꞋo agaidiya ana kaleko keke faꞋina givekwavekwadudu o kaꞋi mafu gilaulauna tu omi wanagahena wanagayo, “Siule, Yaubada ginanuwakabubuye. Keke unavekwadudu au aꞋa unaꞋa be unaꞋahiyauwa.” KaꞋi hidedemi wanagahe tu keke wowona ana gaitoma againe wanavelugani, yami gahe gahegaga. Au hai ana yamumu? Keke. 17 Meda anafaiweya kaꞋi yami vetumagana vetumaganagaga tu keke igibagiba againe wadaseyemauneni, au yami vetumagana gaitoma-kawowo.
18 Tu tamo hakwadi ginagahe ginagayo, “Kaliva saꞋeyana yana wavetumagana tu saꞋeyana ma yana waꞋigibagiba.” Ada iya ganabonalaufata ganagayo, “KaꞋi keke kaliva agaidiya unaꞋigibagiba, gavaiyaꞋamine o ya wavetumagana velemoꞋena unaseyemauneni? Tu iyaꞋeku ma yaku vetumagana yaku igibagiba againe ganaseyemaunena.” 19 WaꞋita, omi wanuwanuwa vaita vetumaganagaga gilubodana be wagayo, “Bana Yaubada anakaibeꞋu-moꞋa.” Au yamumuna tuꞋena balauma koyodiyao meda Yaubada anakaibeꞋu-moꞋa amine hivetumagana. Yaubada hivetumaganena tu keke yana nuwanuwa amine hidahawahegedi faꞋina yadi vetumagana yadi wamatauta buye hivetavetatava.
20 Siule kaliva kwavakwava! Gava tova-yo unahalamaneni vetumaganagaga tu keke igibagiba buyeꞋi ma gaitoma-kawowo? Unogali, iya ganavehawale. 21 Nagona bwaneneda Abelahamo againe ganaluvefosena. Natuna Aisake Bana Yaubada againe gihawahegena higa abaveyao amine atudidigeya gidamununa faꞋina Yaubada Abelahamo ginuwenuwena vaita yegayegana Bana matane. 22 KaꞋi mene nuwa a gimahalina? Bana yana wavetumagana kadu yana waꞋigibagiba buye gififaisewa. Yana igibagiba againe yana vetumagana ana abalauyabu giseyemaunena. 23 E, Abelahamo yana igibagiba Aisake ana hawahega againe giseyemaunena. Ada gahe saꞋeyana Veyao Tuwaina ana bukiya gidadauda-ma mena Abelahamo yana igibagiba againe ahe gilakayemu velemoꞋena. Gahe-nadi gigayo,
Abelahamo Yaubada givetumaganena ada yana vetumagana faꞋina Yaubada bana faꞋine gigahe gigayo, Bana kaliva yegayegana Iya matakuya. Ada au Yaubada Abelahamo givewagana ana kusebo.
24 Mema au waꞋitana keke kaliva yada vetumaganagaga tu yada igibagiba buyeꞋi faꞋina Yaubada giseda yegayegadeyao Bana matane.
25 Meda anafaiweya badi vineYeliko kwamayoku yamayamadadadi ma adi egana Leyabi yadi vetumagana yadi igibagiba againe hiseyemaunena. Hidema faꞋina Yaubada gisedi yegayegadi Bana matane. MiIsileli Yeliko ana fafaliya hiyemu-yo tolauyavaga adiꞋiselu hiꞋiveninisedi tu badi Leyabi yadi manuweya hivegaꞋauledi. Au muliya mali edeya hiꞋatuhegedi tu nibaidiyao hiꞋaiꞋava.
26 Au mema waꞋita, kaliva wowonaga tu aluꞋaluwana keke, medema kaliva aliꞋalikana. Meda hai vetumaganagaga tu igibagiba keke, medema vetumagana aliꞋalikana. Md 25:41-45, 1Yn 3:17 Aba 22:9-12, Hi 11:17 Yos 1:21, 6:17, Hi 11:31