8
Iyaw Nobya di Chadaw Na a Baro
1 “An imo sawen dyaken, ki akmay kakteh ko a mahakay
a napasoso di ānang ko!
Ta an komwan, an binayat koymo do gagan, as dadek koymo,
abaw mangiroromen dyaken.
2 Palongohen koymo kan isabat koymo
do bahay ni ānang ko a iyaw nangnanawo dyaken.
Torohan konchimo so nalaokan a palek a inomen mo
a iyaw maīmas a asoy dan asin granada ko.”
Iyaw Nobya a maynamot di Chadaw Na a Baro
3 Payponganen na yaken do kaholi a tachay na,
as kepkepen na yaken do kawanan a tachay na.
Iyaw Nobya dyirad Babbalāsang
4 Inyo a babbalāsang a taga Jerosalem, isapata nyo pa dyaken
a dyi nyo yokayen mana istorbwen adaw mandan kosto a ōras na.
No Chanem a Daniw
Siraw Babbalāsang
5 “Sino nya somongsongad a yapo do let-ang
a machinareng do chadaw na?”
Iyaw Nobya di Chadaw Na a Baro
Do abongan no kayo a mansanas yinokay koymo.
Dawriw nakaināwan dyimo ni ānang mo.
Dawriw nangyanakan na dyimo.
6 Payen mo yaken akmas silyo* 8:6 Kāda silyo, ki machitatārek a mangipaboya so akin dyira, kan taywara mapateg dya. Naikitikit sa do mangīna a bato, kayo mana pasek, as maparin a isingsing mana isāryo. do pōso mo
a akmas silyo a isingsing do kakamay mo.
Ta no adaw, ki akmay kabīleg no kadiman.
Kapangimon na, ki akmay karanggas no tanem.
Bomtak a somdeb, kan akmay somdesdeb a apoy.
7 Mamsomsot a ranom, ki makasboy aba so adaw.
Siraw ok-oksong, ki maparin daba a mailyod.
An myan asa a manoroh do adaw
so tabo kinabaknang no bahay na,
ki taywara a mairoromen anchi.
Siraw Kakakteh a Mahakay no Nobya
8 Ariw balasītang a kakteh namen,
kan ari pad namokeh.
Āngo parinen namen do kakteh namenaw
do araw a naikeddeng a maikasar?
9 An iya, ki akmay ahad,
mapatnek kami so pirak a pagwanawanan na.
An iya, ki akmay pantaw,
dibonen namen iya so tappi a sidro.
Iyaw Nobya
10 Do nakarahan, birhin ako akmay ahad.
Ki changori, akma saw pagwanawanan soso ko.
Dawa, do kaboya na dyaken ni Chadaw ko,
akmakoy asa a mangyangay so kapnek dya.
11 Myan kaobāsan ni Solomon do Baal-hamon.
Intoroh na dyirad nangipaabangan na.
Magbāyad kāda asa so asa rībo a pidāso a pirak
do kapamolas nas asi na.
12 Bōkod ko kaobāsan ko. Yaken lang magdisisyon.
Iyaw asa rībo a pirak dyira mom Solomon,
as dadwa gasot dyirad mangaywan so asi na.
Iyaw Baro di Ipatpateg Na a Nobya
13 “Imo a omyan dyirad minoyongan,
siraw rārayay ko, ki panadyitadyinya daw tīmek mo.
Palobōsan mo pa a adngeyen tīmek mwaw.”
Iyaw Nobya di Chadaw Na a Baro
14 “Belan mo mangay dyaken mo Chadaw ko
a akma kay mataray a ogsa mana bomaro a ogsa
do tokotokon a yanan dan tomobo a mababanglo.”
*8:6 8:6 Kāda silyo, ki machitatārek a mangipaboya so akin dyira, kan taywara mapateg dya. Naikitikit sa do mangīna a bato, kayo mana pasek, as maparin a isingsing mana isāryo.