1 Nachisisirin si ĀPO di Joswe a kāna, “Hapen mo tābo bōyot mo, kan somonget kamo a mangay do Ai. Mamo kaba kan maōpay kaba, ta iparawat konchi dyinyo iyaw āri no Ai, siraw tawotawo na, iyaw idi a pagtorayan na, kan tana na. 2 Parinen mo do Ai kan āri na a akmas pinarin mo do Jeriko kan āri naw. Ki do nya kangay nyo, maipalōbos a dyira nyo warawara kan animal a masamsam nyo. Saneben nyo sa do dichodan no idi.”

3 Dawa, naychakatkat sa Joswe kan tābo bōyot na a mangay a mangraot so Ai. Ki pinidi ni Joswe tatdo a poho a rībo a kagaganayan do soldādo saw a yapo do bōyot na, kan tinoboy na sa do kamahep. 4 Binilin na sa so nyaya: “Tomayo kamo do dichodan no idi a Ai, as kan saneben nyo sanchi. Makateng kamo aba, as nāw nyo a manadyitadyinya. 5 Yaken kan siraw natokos saya a bōyot ko, maypasngen kaminchi do idi. Ki anchan mohtot saw mahahakayaw a manggobat dyamen a akmas naparin do dāmo, payyayowan namen sa. 6 Lakatan danchi yamen mandan pachibawa namen sa do idi. Iktokto danchi a payyayowan namen sa a akmas nanmaw. 7 Do dāwri, magparang kamonchi yapo do tinaywan nyo, kan sakōpen nyo idyaw. Si ĀPO a Dyos nyo, ki itoroh nanchi dyinyo idyaw. 8 Anchan nasākop nyo naw idyaw, sosohan nyo a akmas inbilinaw ni ĀPO. Nya saw mandar ko dyinyo.” 9 Dawa, tinoboy sa ni Joswe, kan nangay sa do taywan daw a mangnanaya do laōdenaw no Ai a baet no Betel kan Ai. As si Joswe, nachipaychararakan dyirad tawotawo na saw.

10 Do somaronwaw a araw, nasāpa a naybangon si Joswe, kan pinaychichipeh na saw bōyot naw. Indaōlwan na sa kan siraw panglakayenaw no Israel a naypasngen do Ai. 11 Siraw bōyot naw a kinayrayay ni Joswe, ki tomnaraya sa a naypasngen do salapenaw no idyaw. Dawriw niyanan da do mangket do ammyānan, kan myan payahosongan do baet da kan do Ai. 12 Do dāwri a ahep, tinoboy naw dadimaw a rībo a mahahakay a tomnayo do laōden no idyaw do baet no Ai kan Betel. 13 Dawa, no bōyot a myan do ammyānan no idi iyaw kārwan so soldādo. As kan siraw kadwan saw a soldādo, ki do lāod. As si Joswe, nachipaychararakan do payahosonganaw.

14 Do nakaboyaw no āri no Ai siras soldādwaw ni Joswe, sināpa na ingodes no āryaw kontodo tabo mahahakay saw do idyaw minohtot, kan yangay da sa a binayat a gobaten Israelita saw do logaraw a malawngan payahosongan Araba a komwan do Jordan. Ki, chapatak naba a īto dana a saneben da sa a yapo do dichodan no idyaw. 15 Si Joswe kan siraw bōyot naw, ki sinsasanod sa napalakat a kominwan do let-ang. 16 Tabo saw mahahakayaw a yapo do idi, ki natawagan sa tan omarāyat sa a machipanglakat dyira. As do nakalakat daw sira, nachibawa dana sa do idyaw. 17 Abaw aran asa mahakay a nabidin do Ai mana Betel* 8:17 Do kadwan a manyoskripto, aba “Betel”. a dya nangay a manglakat siras Israelitaw. As iyaw idyaw, ki nainonolay a abaw manggwardya sya.

18 Sinpangan na, nachisisirin si ĀPO di Joswe a kāna, “Patongdohen mo chibot mo do Ai, ta iparawat ko dyimo.” Dawa, pinatongdo ni Joswe chibot naw do Ai. 19 Do nakapatongdwaw ni Joswe so chibot naw, insigīda sa naychakatkat mahahakayaw do tinaywan daw, kan nayyayo sa a lomnongo do idyaw. Somindep sa do idyaw kan sinākop da, as kan inalistwan da a sinosohan.

20 Do nakaydit daw no mahahakayaw a taga Ai, naboya da a nanghob danaw idi daw, kan naypatohos paw ahob do hanyit. Do dāwri, arabaw pamosposan da a domichan do aran dino. Ta siraw Israelitaw a nayyayo a lomnongo do let-ang, ki naybidi sa kan naybadiw a siraw nanglakat dyira.

21 Do nakaboyaw ni Joswe kan siraw tabo Israelita a nasākop dana no rārayay da saw idyaw kan nasosohan dana, naybidi sa kan diniman da saw mahahakayaw a taga Ai. 22 Minohbot saw Israelitaw a myan do idyaw, kan nachirapa sa a nachigobat do kabōsor da saw. Dawa, siraw taga Ai, ki nadibon dana sa no Israelita saw, as kan diniman da sa a abo nakalāsat mana nakapayyayo. 23 Ki tiniliw da iyaw āryaw no Ai a sibibyay, kan nakaiyangay da sya di Joswe.

24 Siraw Israelitaw, ki diniman daw kāda asa dyirad kabōsor da saw do let-angaw a nanglakatan da sira. Do dāwri, naybidi sa do Ai, kan diniman da tabo myan pa daw. 25 Nadiman saw tabo omidi do Ai do dāwri a araw. As no bidang no nadiman, ki asa poho kan dadwa rībo a mahahakay kan mababakes. 26 Ta nāw na pinatongdo ni Joswe iyaw chibot naw, kan pinabodis naba a manda do nakadiman da a tabo no omyanaw do Ai. 27 Sinamsam dan Israelitaw a dyira daw animal kan warawara saw do idyaw akmas inbaheyaw ni ĀPO di Joswe.

28 Dawa, inpasosoh ni Joswe iyaw idi a Ai, kan innonolay na a nāw narana a marārayaw. Komwan pa a mandas changori. 29 Inpalōdyit naw āryaw no Ai do kayo, kan innonolay na daw bangkay naw a naychamakoyaban. Do kapaysarisari naranaw, inmandar ni Joswe a pakarohen daw bangkayaw, kan pagsiden da do asdepanaw do rowanganaw no idi. Kinatohos da pinōnan so bato, kan ari pa daw a mandas changori.

30 Sinpangan na, inpapatnek ni Joswe iyaw altaraw do Tokon Ebal a para di ĀPO a Dyos no Israel, 31 akmas inbilinaw ni Moyses a pachirawatan ni ĀPO dyirad Israelita. Napatnek sigon do naitolasaw do Librowaw no Linteg ni Moyses a “Iyaw altar, ki naparin do bato sa a dya napōtar, kan polos a dya naosar do pasek a rimīnta.”† 8:31Eks. 20:25; Deot. 27:1-8 Do dyaya altar, inparawat da di ĀPO dāton da a sosohan daw animal a simememeh, kan inparawat da paw dāton a pachikapya do Dyos.‡ 8:31 No dāton da, ki sosohan daw partis lang no binyay, kan maipalōbos a kanen daw kadwan. Leb. 7:12-15 32 Dawri do salapen dan Israelita, intolas ni Joswe do bato saya do altar kopyaw no Linteg ni Moyses a intoroh na dyira. 33 Siraw tabo naibidang a Israelita, gan-ganaet kan siraw nayanak a Israelita kontodo siraw panglakayen, opisyalis, kan siraw hwis, ki naytēnek sa do maybītaw no Lakāsan no Tōlag ni ĀPO a machisalap dyirad papādi saw a yapo do trībo no Lebi a nangisiw so lakāsanaw. No godwa no tawotawo, ki naytēnek sa do anmo no Tokon Gerisim. As no godwa, ki naytēnek sa do anmo no Tokon Ebal a naybīt sa. Pinarin daw nya sigon do sīgod saw a bilin a intoroh ni Moyses a pachirawatan ni ĀPO an mangbindisyon saw papādyaw siras tawotawo no Israel.

34 Sinpangan na, inbāsa ni Joswe tabo Linteg pati siraw bindisyon kan siraw abay a akmas naitolas do Librowaw no Linteg. 35 Abaw aran asa a chirin do tabo inbilin naw ni Moyses a dya naibāsa ni Joswe dyirad tābo Israelitaw a naychichipeh a pakairamānan mababakes kan adedekey, as kan siraw gan-ganaet saw a omyan dyira.