1 Sinpangan na, minirwa dana inakpeh ni Dabid siraw pinidi naw a mahahakay no Israel a 30,000 sa a tabo. 2 Inpangōlwan na sa tabo bōyot naw a mangay do Baala do Joda* 6:2 “Baala do Joda,” ki matawagan pa so “Kiryat-jearim”. 1 Sam. 7:1-2 a mapaybidi so lakāsanaw no Dyos. Nya lakāsan, ki natawagan do ngaran ni ĀPO a Manakabalin do Tābo a maydisna do trono do payawan dan sinan parswa a naypanyid do hapotaw no lakāsanaw. 3 Pinadisna daw lakāsanaw no Dyos do bayo a karison, kan inyangay da a yapo do bahay ni Abinadab a myan do paytokonanaw. Sa Ossah kan Ahiyo a pōtot ni Abinadab, ki siraw mangipalongo so karisonaw 4 a myan iyaw lakāsanaw no Dyos. Si Ahiyo, ki mayam do salapenaw no lakāsanaw. 5 Si Dabid kan tabo a tawotawo no Israel, ki nagragragsak sa do tābo ayit da do salapen ni ĀPO. Nagkankanta sa kan nagtoktokar sa siras arpa, lyra, tamborin, changchang, kan pyangpyang.

6 Do nakapakarapit daw do yananaw no pangirkan ni Nakon, nadodog iyaw bākaw a manggoyod so karisonaw. Tinodah na inigpet ni Ossah iyaw lakasānaw no Dyos tan dya masday. 7 Taywara a nakasoli si ĀPO di Ossah, as diniman na iya maynamot do pinarin naw. Nadiman si Ossah daw do bīt naw no lakāsanaw no Dyos.

8 Nakasoli si Dabid maynamot ta pinabtak ni ĀPO kasoli naw di Ossah. Nawri a yanan, ki matawagan so Peres-ossah† 6:8 No chakey na batahen, ki “pinabtak no Dyos di Ossah”. a mandas changori.

9 Do dāwri a araw, mamo dana si Dabid di ĀPO kan inyahes na a kāna, “Maypāngo ko pa mapabidiw lakāsan ni ĀPO do aywan ko?” 10 Chinakey paba ni Dabid a inyonot iyaw lakāsanaw ni ĀPO do irahem no syodad ni Dabid. Basbāli a inyangay narana do bahayaw ni Obed-edom a taga Gat. 11 Iyaw lakāsanaw ni ĀPO, ki dinitā narana do bahay ni Obed-edom so tatdo a kabohan, kan binindisyonan ni ĀPO iya kan tabo kapamilyaan na.

12 Naibahey di Āri Dabid a kāna, “Si ĀPO, ki binindisyonan naw kapamilyaan ni Obed-edom kan tabo a myan dya maynamot do lakāsanaw no Dyos.” Dawa, minosok si Dabid, kan inhap naw lakāsanaw no Dyos a yapo do bahay ni Obed-edom a inyangay do syodad ni Dabid a siraragsak. 13 Do nakapakadakwang daw so anem no mayraraw so lakāsanaw, nangidāton si Dabid so asa a tōro a bāka kan napataba a orbon a bāka. 14 Naylaylay si Dabid so epod‡ 6:14 Iyaw epod, ki partis no laylay no pādi. 1 Sam. 2:18 a tomatāda do tabo ayit na do salapen ni ĀPO. 15 Dawa, si Dabid kan tabo tawotawo no Israel, ki insonget da iyaw no lakāsanaw ni ĀPO a mangngēngengey do ragsak da kan mangitangtanggoyob siras trompīta.

16 Do nakaisdep daw so lakāsanaw ni ĀPO do syodad ni Dabid, myan a magboybōya si Mikal a pōtot a mabakes ni Saulo do bintanaw. Do nakaboya naw si Dabid a homokhokso kan tomatāda do salapen ni ĀPO, inipsok na si Dabid do pōso na.

17 Inyangay daw lakāsanaw ni ĀPO, kan pinangay da do naikeddengaw a yanan na do irahem no toldaw a inpapatnek ni Dabid. As nangidāton si Dabid so masosohan a dāton kan pachikapya a dāton do salapen ni ĀPO. 18 Do nakatayoka naw a nangidāton siras nya dāton, binindisyonan na saw tawotawowaw do ngaran ni ĀPO a Manakabalin. 19 Somarono, binonōngan naw kāda Israelita a mahakay kan mabakes a myan daw so asa a tināpay, asa a kaydap a karni, kan asa a kaormaan a napihpih a pasas. Sinpangan na, somnabat dana saw tawotawowaw.

20 Do nakasabat danaw ni Dabid a mangbindisyon so bōkod naw a pamilya, minohtot si Mikal a pōtot a mabakes ni Saulo a minbayat sya kan binata na a kāna, “Samna, indāyawori no āri no Israel inaynawan nas changori a araw? Pi! Kabo pan asnek na a mangipaboyas kabo no laylay na dyirad adīpen saya mababakes no opisyalis na saw a akmayaw pariparinen no asa abo so arang!”

21 Ki binata ni Dabid di Mikal a kāna, “Do salapen ni ĀPO a namidi dyaken a dya si āmang mo mana aran sino a yapo do pamilya na, ki pinarin ko nawri! On, pinidi na yaken a mayparin a mangipangōlo so Israel a tawotawo ni ĀPO. Nyaw tongtongan ko a mangsilibrar sya do salapen na. 22 Makey ako a aran mangamangay pa kan nyayaw kapayparin ko a abos arang a aran masnekan akonchi do mismo a kapanyideb ko. As dyirad adīpen saya mababakes a inbahey mo, ki mapadayāwan akonchi dyira.”

23 Si Mikal a pōtot a mabakes ni Saulo, ki polos a dya natorohan so anak manda do nakadiman na.