1 Nyaw naynamotan kwaya a nagdisisyon a dyakwa mangay dyinyo daw tan dyakwa mirwa makachirin so pagmamaywan nyo. 2 Ta an pagmamayohen koynyo, sino paro panchiw mapasoyosoyot dyaken do inyowayaw yanan kasoyotan ko? 3 Dawa, nyaw paynamotan na a naytolas ako dyinyo do nakarahan, as kan nawri paw dyi kwaya nangayan dyinyo daw, ta āngonchan inyo a hahawen ko a mapasoyosoyot dyaken, as inyonchiw makaitoroh so pagmamaywan ko? Ta sigorādo ako a an āngo kasoyotan ko, ayket, komwan dyinyo a tabo. 4 Ta do kayan kwaw a naytolas so tolas ko dyinyo, ki oltimo a kariribok ko kan natookan ako a maynamot dyinyo, ta oyod a āro hō ko a naytetedted a maynamot dyinyo. Ki aran komwan, ki aba polos panggep ko a mapagmamayo dyinyo, basbāli a chakey ko a mapatakan nyo a oyod a rakoh kadaw ko dyinyo.

5 Sichangori, myan dyinyo daw napagmamayo dyaten. On, yaken aba lang napagmamayo na, an dyi pa kadwan dyinyo. Ibahey kwaba a napagmamayo na inyo a tabo, ta chakey kwaba tod a payparahmeten gatos na. 6 Iyaw namarinaw so komwan, ki manawob danaw nakadosāan naw a yapo do kārwan dyinyo. 7 No machita a parinen nyo sichangori, ki pakawanen nyo kan ahwahoken nyo, ta āngonchan mahmes do taywaraw a kapagmamayo na. 8 As dawa, pachichāsi ko dyinyo a mirwa ipadidiw nyo kadaw nyo sya. 9 Nawriw naynamotan kwaya a naytolas dyinyo do nakarahan, ta chakey koynyo a sōoten an ara kamo a nakasagāna a magtongpal so pamagbaga ko saya dyinyo. 10 Ki sichangori, napatakan ko a nagtongpal kamo do inbahey kwaw dyinyo. Dawa, aran sino a pakawanen nyo, ki pakawanen ko. No kaoyodan na, an myan machita ko a pakawanen, ki pinakawan ko na do salapen ni Kristo tan mabindisyonan kamo a tabo. 11 On, an parinen taw komwan, ki abaw ōras ni Satanas a omsikap dyaten, ta napatakan ta na saw panggep naw dyaten.

12 Do nakawara kwaw do syodad a Troas a nangay a nangikasaba so Maganay a Dāmag a maynamot di Kristo, natonngan ko a iniwangan ni Āpo rarahan a kapangasaba daw. 13 Ki aran komwan, taywara nabakel ako do dawri, ta nasarakan kwaba si kakteh ta a si Tito. Dawa, nagpakada ko dyirad kakakteh ta saw daw, as nakangay ko do Masedonya.

14 Magyāman ako do Dyos, ta pinachirayay na yamen Kristo do nakapagballīgi naw.* 2:14 No pinarin dan soldādo no Roma do kaychowa, ki an inābak daw kabōsor da, hapen no heneral daw soldādo naw, as kan pagmarchaen na saw kabōsoraw a inābak da do salapen āro a tawo tan ipaboya daw nakapagballīgi da. No batahen Pablo dya, ki akmay pinachirayay ni Kristo yaten a manganohed do nakapagballīgi naw. As maynamot dyamen, nagwaras danaw kapakatoneng so maynamot di Kristo do aran dino a angayan namen, as kan kayarigan naw kapagwarasaw no āngot no asa bangbanglo. 15 Ta maynamot do nyaya a kapangikasaba namen, ki maiyarig kami na do asaw a bangbanglo a dāton ni Kristo di Āpo Dyos, kan makarapit dyirad tabo tawotawo: siraw madama a maisalākan kan siraw madama a mangay do karārayawan da. 16 On, siraw madamaya a mangay do pakarārayawan da, ki mayparin a āngot no kadiman dyira. Ki siraw manganohed a madama a maisalākan, ki mabanglo kangotan da sya, ta mapalongo sa do rarahan a mangay do abos pandan a byay. Maynamot ta komwan, sino paro makarawa so nya tarabāko? 17 Ki makarawa kami a maynamot ta tinoboy yamen ni Āpo Dyos. As tabo ichirin namen, ki kosto kan oyod do salapen na maynamot do kapachichasa namenaw di Kristo. Akma kami aba siras kārwan a paychichwasan daw kapangasaba so chirin no Dyos tan bomaknang sa.