1 Nochi nonemilis huan para nochipa nimitzhueyimatis tinoTeco huan tinotlanahuatijca.

2 Mojmostla nimitzhueyichihuas.

Quena, ama huan para nochipa nimitzpaquilismacas.

3 Nelía tihueyi, TOTECO, huan quinamiqui ma timitzhueyimatica nochi timasehualme.

Amo aqui quitlamimachilía nochi mohueyitilis.

4 Nochi coneme catli moscaltijtiyase quielnamiquise catli tijchihua,

huan tepohuilise nopa tlamantli catli tijchijtihualajtoc ica mohueyi chicahualis.

5 Na san nimonejnehuilis tlen moyejyejca huan mohueyitilis,

huan nopa tlatlanextli catli mitzyahualohua.

Nimoilhuis tlen nopa huejhueyi tiochicahual nextili catli tijchijtoc.

6 Masehualme camanaltise tlen nopa huejhueyi tlamantli catli tijchijtoc.

Huan na nitepohuilis tlen mohueyitilis.

7 Nochi masehualme ipan tlaltipactli camanaltise para nelía ticuali huan hueyi moyolo.

Quiijtose para tijchihua san catli xitlahuac.

8 TOTECO, hueyi moyolo huan tlahuel titetlasojtla.

Amo nimantzi ticualani huan titeicnelía miyac.

9 TOTECO ta cuali moyolo ica nochi masehualme huan motlaicnelijcayo monextía ipan sesen tlamantli catli tijsencajtoc.

10 TOTECO, nochi tojuanti catli ta techchijchijtoc timitztlascamatij.

Quena, nochi tojuanti catli timitztoquilíaj timitzpaquilismacase.

11 Tojuanti sentic timocamanalhuise tlen ihueyitilis motlanahuatilis campa ta titlanahuatía,

huan ticamanaltise quenicatza tijpiya hueyi chicahualistli.

12 Titepohuilise tlen nopa huejhueyi tiochicahual nextili catli tijchijtoc,

huan tlen moyejyejca huan tlen ihueyitilis motlanahuatilis campa ta titlanahuatía.

13 Pampa motlanahuatilis amo quema tlamis.

Ta tijpiyas tlanahuatili ica nochi masehualme catli tlacajtiyase para nochipa.

14 Ta TOTECO tiquintlanana nochi catli huetzij,

huan tiquinfuerzajmaca catli itztoque ipan tequipacholi.

15 Nochi masehualme ipan tlaltipactli mitztemohuaj,

huan mitzchiyaj para xiquinpalehui.

Ta tiquinmaca inintlacualis quen quinmonequilijtihuala.

16 Ta ica momax tiquintiochihua nochi catli yoltoque,

pampa tiquinmaca catli quicuase huan catli quiijise.

17 TOTECO quichihua san catli xitlahuac,

huan quinextía para hueyi iyolo ipan nochi catli quichihua.

18 TOTECO itztoc ininnechca nochi catli quinotzaj.

Quena, itztoc ininnechca nochi catli quitemohuaj ica nochi ininyolo.

19 Yaya quinmaca catli quinequij nochi masehualme catli quiimacasij huan quitlepanitaj.

Quintlacaquilía quema quitzajtzilíaj ma quinpalehui huan quinmaquixtía tlen catli amo cuali.

20 TOTECO quinmocuitlahuía nochi catli quiicnelíaj,

pero nochi catli amo quitlepanitaj,

Toteco quintzontlamiltis.

21 Nijpaquilismacas TOTECO ica nocamac.

Nochi masehualme catli itztoque campa hueli quipaquilismacase para nochipa huan amo quema tlamis.