1 ¡Paquilistli!

Ica nochi noyolo nijnequi nijtlascamatis TOTECO,

campa mosentilíaj masehualme catli itztoque xitlahuaque.

2 Huejhueyi tlamantli quichijtoc TOTECO.

Nochi catli quiicnelíaj ma monejnehuilica tlen nochi ni tlamantli catli quichijtoc.

3 Pampa tlahuel yejyectzi nochi nopa huejhueyi tlatiochicahual nextili catli quichihua.

Huan technextilía ihueyitilis huan para yaya nochipa quichihua catli xitlahuac.

4 TOTECO quichijtoc huejhueyi tlamantli catli amo huelis tiquelcahuase.

Quichijtoc tlamantli catli technextilía para techicnelía huan para yaya quipiya hueyi iyolo ica tojuanti.

5 Yaya quinmaca tlacualistli nochi catli motemachíaj ipan ya.

Huan amo quema quielcahuas catli techtlajtolcahuilijtoc techchihuilis.

6 Toteco quinextijtoc ihueyi chicahualis ica imasehualhua pampa yaya quinmacac nopa tlali Israel,

masque achtihuiya eliyaya iniaxca sequinoc tlamantli masehualme.

7 Nochi catli Toteco quichihua eltoc senquistoc xitlahuac huan cuali.

Huan nochi itlanahuatilhua nelía temachtli.

8 Para nochipa technextilía catli melahuac huan catli xitlahuac,

huan monequi tijchihuase catli melahuac huan tiquinneltocase.

9 TOTECO ya tlaxtlajtoc nochi para quinmanahuis imasehualhua.

Huan quinilhuijtoc imasehualhua para quichihuas nochi catli quintencajqui ipan nopa camanal sencahuali.

¡Toteco nelía tlatzejtzeloltic huan temajmati!

10 Para tipehuase tijpiyase tlalnamiquilistli,

achtihui monequi tiquimacasise huan tijtlepanitase Toteco Dios.

Mochihuaj nelía tlalnamiquini nopa masehualme catli quintlepanitaj itlanahuatilhua.

Ma tijpaquilismacaca para nochipa.