1 ¡TOTECO tlanahuatía!

Nochi masehualme ipan nochi tlalme ma huihuipicaca ica majmajtli.

Isiya campa mosehuía para tlanahuatis quipiya más tlanahuatili huan eltoc más huejcapa que nopa querubines tequihuajme.

Nochi catli onca huan nochi catli itztoque ipan tlaltipactli,

ma moyolpitzahuilica.

2 Ipan Tepetl Sion nochi quimatij para TOTECO nelía hueyi.

Yaya más hueyi tlen nochi sequinoc tlanahuatiani ipan tlaltipactli.

3 Nochi ma quihueyichihuaca Toteco, yaya catli hueyi huan temajmati.

San ya nelía tlatzejtzeloltic.

4 Toteco yaya se tlanahuatijquetl catli quipiya nochi chicahualistli,

huan quipactía tetlajtolsencahuas xitlahuac.

Nochi catli quichihua senquistoc cuali.

Yaya quinchihuilijtoc catli xitlahuac nochi israelitame.

5 ¡Ma tijhueyitlalica TOTECO, yaya toDios,

yaya catli tlatzejtzeloltic!

Ma timotlancuaquetzaca huan ma timoixtlapachoca hasta tlalchi iicxitla,

pampa san yaya tlatzejtzeloltic.

6 Quema nopa totajtzitzi Moisés huan Aarón, huan nopa tlajtol pannextijquetl Samuel,

quitzajtziliyayaj TOTECO para quitlajtlanise itlapalehuil,

yaya quinnanquiliyaya.

7 Toteco quincamanalhui ipan se mixtli,

huan inijuanti quichijque nochi catli quiijto icamanal huan itlanahuatilhua.

Quena, inijuanti quichijque nochi catli quinilhui ma quichihuaca.

8 Quena, TOTECO, ta titoDios, ta tiquinnanquili.

Ta tieli se Dios catli tiquintlapojpolhuía inintlajtlacolhua masehualme.

Pero nojquiya tiquintlatzacuiltía quema quichihuayayaj tlamantli catli amo cuali.

9 Ma tijhueyitlalica TOTECO huan ma tijhueyichihuaca.

Ma timotlancuaixtlapachoca iixtla ipan nopa tepetl tlatzejtzeloltic catli itoca Sion.