1 ¡Ta, tinoTeco Dios catli techicnelía,

nimitztlajtlanía xijpiya hueyi moyolo ica na!

¡Techtlasojtla ta catli tijpiya miyac motlaicnelilis huan techtlapojpolhui nochi notlaixpanolhua!

2 ¡Techpajpaca huan techquixtili ni notlajtlacol para sempa nielis nitlapajpactic!

3 Pampa ya nimomacac cuenta para nelía nitlajtlacolchijtoc moixpa.

Huan san ya nopa nimosenilhuijtoc nochipa.

4 San ica ta nitlajtlacolchijtoc.

Quena, san ica ta nijchijtoc ni hueyi tlajtlacoli catli ta amo tijnequi tiquitas.

Ta tiquitac nochi catli nijchijqui huan xitlahuac techtlajtolsencajtoc.

5 Pero na ipa nitlajtlacolchijquetl hasta quema nitlacatqui.

Quena, ipa nitlajtlacolchijca masehuali hasta quema pejqui nimoscaltía iijtico nonana.

6 Ta tijnequi se masehuali ma mitztlepanita ipan iyolo;

tijnequi ma tijchihuaca san catli melahuac.

Techchihua na ma nijmati motlalnamiquilis hasta campa más tlatzintla ipan noyoltipa.

7 Xiquijtzelo nopani nopa estli catli tetlapajpacchihua,

huan quej nopa nimocahuas nitlapajpactic.

Quena, techpajpaca, huan nimocahuas onpano nichipahuac moixpa.

8 Huan teipa quema ya techtlatzacuiltijtos,

xijchihuas para sempa ma niyolpaqui.

Huan elis quen sempa moyancuilise noomiyohua catli tijtlatixchijtoc.

9 Amo xijsenhuiquili xijtlachilijto notlajtlacolhua.

Xiquixpolo tlen moixtla nochi catli amo cuali nijchijtoc.

10 NoTeco Dios, xijchihua para noyolo ma eli yancuic huan tlapajpactic.

Xijchihua para ma nimonejnehuilis san ipan tlamantli catli cuali,

huan para ma nijnequis nijchihuas san catli xitlahuac.

11 Amo techiyocacahua tlen ta moixtla,

niyon amo techquixtili moTonaltzi catli tlatzejtzeloltic.

12 Xijchihua para sempa ma nijmati nopa paquilistli catli nijpixqui pampa ta techmaquixti.

Ica moTonaltzi techchihua para nochipa ma nijnequis nimitztlepanitas.

13 Huan huajca niquinnextilis moojhui sequinoc tlajtlacolchihuani catli tlaixpanotoque quen na.

Huan tlajtlacolchihuani moyolcuepase huan hualase campa ta.

14 Toteco Dios, ta catli techmaquixtía,

techmanahui tlen ni tlaeticayotl catli nijpiya pampa nitemicti.

Huan huajca nihuicas tiohuicatl para niteyolmelahuas para ta tijchihua catli senquistoc xitlahuac.

15 Toteco, xijchihua para sempa ma nihuica,

huan nitepohuilis nochi catli techchihuilijtoc huan na nimitzpaquilismacas.

16 Pampa ta amo tijnequi ma nimitzmacas tlacajcahualistli para techtlapojpolhuis.

Sintla quej nopa elisquía,

huajca ica paquilistli nijchihuasquía.

Pero amo mitzpactía ma niquintlali tlapiyalme ipan tlaixpamitl para niquintlatis moixpa,

quen se tlacajcahualistli tlatlatili.

17 Ta tijnequi ma nimoyolcoco,

huan ma nimotequipacho ica nochi catli amo cuali nijchijtoc,

huan ma nimoyolcuepa.

Quena, nopa masehuali catli moechcapantlalía huan moyolcuepa,

ta tinoTeco Dios, temachtli tijtlacaquilía huan amo tijhuejcamajcahua.

18 Huan, Toteco, amo xijtlatzacuilti altepetl Sion por notlajtlacolhua.

Ta xiquinpalehui momasehualhua huan xijmocuitlahui moaltepe Jerusalén.

19 Huan quema noyolo ya eltos xitlahuac moixpa,

tipaquis ica catli cuali nijchihuas.

Huan tijselis nochi tlacajcahualistli quema niquinhuicas torojme para niquinmictis,

huan nimitzmacas ipan motlaixpa.