1 ¡Xijtlascamatica TOTECO pampa yaya nelía cuali!

¡Itlaicnelilis amo quema tlamis!

2 Nochi amojuanti catli TOTECO anmechmanahuijtoc, xitepohuilica.

Quena, xitepohuilica para yaya anmechmaquixtijtoc ininmaco amocualancaitacahua.

3 Yaya ya quinsentilijtoc nochi nopa masehualme catli itztoyaj campa hueli ipan tlaltipactli.

Quinsentili catli itztoyaj ica ajco, ica tlani,

ica campa hualquisa tonati huan ica campa calaqui.

4 Sequin nentinenque ipan huactoc tlali,

niyon amo quipiyayayaj ininchaj,

niyon amo quipixque se altepetl para ipan itztose.

5 Amictinemiyayaj huan mayantinemiyayaj,

hasta quimachiliyayaj para miquisquíaj pampa ayacmo quipiyayayaj chicahualistli.

6 Huajca quitzajtzilijque TOTECO para ma quinpalehui,

huan yaya quinpalehui.

7 Quinyacanqui xitlahuac ipan se ojtli catli temachtli.

Huan quinhuicac ipan se altepetl para nopona ma itztotij.

8 Xijhueyimatica TOTECO pampa yaya tlahuel tetlasojtla,

huan quichihua huejhueyi tlamantli catli nochi quisentlachilíaj.

9 Pampa Toteco quitlamaca catli teicneltzi huan mayantinemi.

Quiaixhuitis catli amictinemi.

10 Sequin inijuanti itztoyaj ipan tzintlayohuilotl ipan tlatzactli huan nechca para miquisquíaj.

Itztoyaj ilpitoque ica tepos cadenas.

11 Ya nopa ininpantic pampa inijuanti moyoltetilijque ica catli TOTECO quinnahuatijtoya,

huan amo quitlacaquilijque Toteco Catli Más Hueyi.

12 Yeca Toteco quincajqui ma tlaijiyohuica ipan nopa tequitl catli tlahuel teticayo.

Quena, huetzque huan amo aqui quinpalehui para sempa motlananase.

13 Huajca quema ayacmo quimatiyayaj tlaque quichihuase ica nopa tlaijiyohuilistli,

quitzajtzilijque TOTECO,

huan yaya quinmanahui tlen nopa tlaijiyohuilistli

14 Quinquixti ipan nopa tzintlayohuilotl huan quinmanahui para amo miquise.

Huan quicotonqui nopa tepos cadena catli ica quinilpijtoyaj.

15 Xijhueyimatica TOTECO pampa yaya tlahuel tetlasojtla huan quichihua huejhueyi tlamantli catli ica masehualme san quisentlachilíaj.

16 Pampa yaya quitlapanqui nopa puertas tlen bronce ipan tlatzacme,

huan quihuejhuelo nopa teposme catli ica quitzacuayayaj nopa puertas.

17 Sequin masehualme tlahuel mohualiquilijque tlaohuijcayotl,

pampa moyoltetilijque ica Toteco huan quiixpanoque.

18 Huan ipan nopa tlaijiyohuilistli ayacmo mayanayayaj por inincocolis huan pampa itztoyaj nechca para miquise.

19 Pero quema ayacmo quimatiyayaj tlaque quichihuase ica nopa tlaijiyohuilistli,

quitzajtzilijque TOTECO huan yaya quinmanahui.

20 Toteco camanaltic huan mochicajque.

Huan quej nopa quinmaquixti para amo miquise.

21 Xijhueyimatica TOTECO pampa yaya tlahuel tetlasojtla huan quichihua huejhueyi tlamantli catli nochi quisentlachilíaj.

22 Xijpaquilismacaca Toteco huan yaya quiitas quen elisquía se tlacajcahualistli.

Huan xihuicaca huan xitepohuilica nochi catli yaya quichijtoc.

23 Nopa masehualme catli nemij ica ininbarcos ipan hueyi atl,

huan yohuij ipan nochi tlaltipactli para tlanemacase huan tlacohuase,

24 nojquiya quiitztoque nopa yejyectzitzi tlamantli catli TOTECO quichijtoc ipan atl.

25 Quiitztoque quema TOTECO camanaltic huan quichijqui ma motlanana se ajacatl catli chicahuac,

huan quitlananqui nopa atl.

26 Nopa barcos motlananayayaj huan sempa atzintla huetziyayaj.

Huan nopa masehualme catli itztoyaj ipan nopa barcos pejque huihuipicaj huan majmahuij.

27 Inijuanti huihuipicaque huan momimilojque quen ihuintini,

huan ayacmo quimatque tlaque quichihuase.

28 Huajca quema itztoyaj ipan tlaohuijcayotl,

quitzajtzilijque TOTECO,

huan yaya quinmaquixti tlen catli quintequipacholmacayaya.

29 Quema tlaquiyahuiyaya huan tlaajacayaya chicahuac,

yaya quitlacahualti nopa hueyi atl para ma ayacmo molini,

huan mochijqui icamanal.

30 Huan inijuanti pajque miyac quema quiitaque ya moquetzqui nopa atl.

Huan quej nopa Toteco quinyacanqui ica yejyectzi hasta nopa ateno campa monequi ajsise ica ininbarcos.

31 Ma quihueyimatica TOTECO pampa yaya tlahuel tetlasojtla,

huan quichihua huejhueyi tlamantli catli nochi quisentlachilíaj.

32 Ma quipaquilismacaca Toteco tlamiyacapa iniixpa nochi masehualme huan iniixpa nopa huehue tlacame catli tlayacanaj ipan nopa tlali.

33 Toteco quinhuatztoc hueyame huan quinchijtoc quen huactoc tlali.

Nojquiya hueli quinhuatza campa meya atl.

34 Nopa cuali tlali catli tlahuel tlaeliltía quichijtoc ma ayacmo tlaelilti.

Huan ya ni quichijqui por inintlajtlacolhua nopa masehualme catli itztoyaj nopona.

35 Pero nojquiya nopa huactoc tlali campa amo tleno eli quichijqui ma tlaelilti.

Nojquiya quichijqui ma quipiya miyac atl catli meya campa hueli.

36 Huan quinhuicac nopa masehualme catli mayantinemiyayaj para ma itztoca nopona,

huan ma quichihuaca inialtepe.

37 Nojquiya quichijqui para ma tocaca ipan mila,

huan ma quichihuaca xocomeca mili,

huan ma quipixcaca tlahuel miyac inintlajca.

38 TOTECO tlahuel quintiochijqui.

Nojquiya momiyaquilijque huan quinpixque miyac ininhuacaxhua.

39 Teipa pejqui caxani ininmiyaca nopa masehualme,

huan nochi mocajque teicneltzitzi,

pampa quinajsic tlaohuijcayotl,

tequipacholi huan tlaijiyohuilistli.

40 Huan yaya quinechcapantlali nopa tlayacanani catli mohueyimatiyayaj,

huan quinchijqui ma mocuapoloca campa amo oncac ojtli huan amo quimatque campa yohuiyayaj.

41 Pero yaya quinmanahui nopa teicneltzitzi.

Quinmiyaquili ininconehua quen elisquíaj pilborregojtzitzi hasta mochijque onpanoc miyac.

42 Ma quiitaca nochi catli quichijtoc TOTECO nochi catli nemij xitlahuac iixpa,

huan ma paquica.

Pero nochi nopa fiero masehualme ma mocamatzacuaca.

43 Masehualme catli tlalnamiquini quimachilise nochi ni tlamantli catli Toteco quichijtoc,

huan quiajocuise ipan ininyolo.

Inijuanti monejnehuilise quenicatza TOTECO quintlasojtlatihualajtoc imasehualhua.