1 Lohiabada e, egu lalona ia metau momokani dainai,

oi dekenai lau tai noho!

2 Lohiabada e,

egu taitai mani do oi kamonai!

Durua totona lau noinoi noho,

be mani do oi kamonai!

3 Bema oi ese aiemai kara dika ibounai oi duahia neganai,

daika ese oiemu kota lalonai ia kwalimu diba?

4 To oi ese aiemai dika oi gwauatao noho,

unai dainai ai ese oi dekenai ai gari henia be namo.

5 Lau ura dikadika Lohiabada ese lau do ia durua,

bona iena hereva lau abidadama henia noho.

6 Lau ese Lohiabada totona lau naria noho,

lau ura bada ia ese lau do ia durua.

Bona inai Lohiabada dekenai lau naria kara ese,

hanua idia gimaia taudia edia naria kara ia hereaia noho,

idia ese daba rere totona idia naria neganai.

7 Israela taudia e,

Lohiabada do umui abidadama henia,

badina iena lalokau bona bogahisihisi idia noho hanaihanai,

bona nega ibounai ia ura taunimanima do ia hamauridia.

8 Lohiabada ese iena bese, Israela taudia,

edia kara dika ibounai dekena amo do ia hamauridia.