1 Lohiabada do umui hanamoa.

Iena kara maoromaoro taudia edia hebou badana lalonai,

lau ese Lohiabada do lau hanamoa, mai egu kudouna ibounai danu.

2 Lohiabada ena kara be badadia momokani.

Iena kara idia moalelaia taudia ese,

unai kara edia anina idia tahua noho.

3 Lohiabada ena kara be mai edia hairaina,

bona idia ese iena King siahuna idia hedinaraia.

Lohiabada ena kara maoromaoro,

be do ia noho ela bona hanaihanai.

4 Iena hoa karadia ia karaia vadaeni,

taunimanima ese unai kara do idia laloatao totona.

Lohiabada be mai ena hariharibada bona mai ena bogahisihisi.

5 Ia dekenai idia gari taudia dekenai,

be Lohiabada ese edia aniani ia henia.

Iena gwauhamata taravatuna be,

ia ese ia laloa noho nega ibounai, doko lasi.

6 Ia ese bese idauidau taudia edia tano,

be iena bese taudia dekenai ia henia.

Unai kara dekena amo,

ia ese iena bese taudia dekenai,

iena siahu ena bada ia hedinaraia vadaeni.

7 Lohiabada ena kara ibounai,

be mai momokani bona mai maoromaoro danu.

Iena taravatu ibounai ita abidadama henia diba.

8 Idia be do idia gini noho ela bona hanaihanai.

Dirava ese mai ena laloa maoromaoro bona momokani danu,

inai taravatu ia karaia.

9 Lohiabada ese iena bese taudia ia hoia lou,

bona ia ese idia danu gwauhamata taravatuna ia karaia.

Inai gwauhamata taravatuna do ia noho ela bona hanaihanai.

Lohiabada ena ladana be helaga,

bona mai garina danu.

10 Lohiabada gari henia kara be aonega hamatamaia ena dala.

Lohiabada ena hereva idia badinaia taudia ibounai ese,

diba namona idia abia noho.

Lohiabada do ita hanamoa noho ela bona hanaihanai.