1 Vadaeni Pilato ese Iesu ia abia, bona iena oda dekenai tuari taudia ese Iesu idia dadabaia. 2 Bona tuari taudia ese kwara gauna, ginigini dekena amo idia turia, Iesu ena kwarana dekenai idia atoa, bona dabua kakakaka idia atoa iena tauanina dekenai. 3 Vadaeni idia raka kahirakahira ia dekenai, idia gwau, “Iuda taudia edia King e, do oi mauri!” Vadaeni edia imana dekena amo idia botaia.

4 Vadaeni Pilato ma ia raka murimuri dekenai, ia gwau, “Umui itaia, umui emui vairana dekenai lau hakaua murimuri dekenai. Do umui diba, iena kerere ta lau davaria lasi.” 5 Iesu be ia raka murimuri dekenai, kwara gauna ginigini dekena amo idia turia gauna be iena kwarana dekenai, dabua kakakaka danu iena tauanina dekenai. Vadaeni Pilato ia gwau, “Itaia! Tauna be inai!”

6 Dubu biagudia bona edia gima taudia ese idia itaia, vadaeni idia boiboi, idia gwau, “Oi hasatauroa! Oi hasatauroa!”

Pilato ia gwau, “Umui sibona umui abia, umui hasatauroa. Badina be lau ese iena kerere ta lau davaria lasi.”

7 Iuda taudia idia haere henia, idia gwau, “Ai be mai emai taravatu, vadaeni aiemai taravatu hegeregerena ia be do ia mase be ia maoro, badina be ia sibona ia gwauraia, ia gwau ia be Dirava ena Natuna.”

8 Pilato be unai hereva ia kamonai neganai, be ia gari dikadika. 9 Kota henia gabuna dekenai ma ia raka vareai lou, Iesu ia nanadaia, ia gwau, “Edeseni dekena amo oi mai?”

To Iesu be ia haere lasi. 10 Vadaeni Pilato ia gwau, “Lau dekenai oi hereva lasi, a? Oi diba lasi lau be mai siahu oi do lau ruhaia, bona lau be mai siahu oi do lau hasatauroa, a?”

11 Iesu ia gwau, “Bema atai dekenai Diravana ese siahu ia henia lasi oi dekenai, oi be siahu lasi danu do oi noho. Unai dainai, lauegu mase dala ia karaia tauna ena dika ese oiemu dika ia hanaia.”

12 Unai hereva dainai Pilato ese Iesu ruhaia dalana ia tahua. To Iuda taudia be idia boiboi, idia gwau, “Unai tau bema oi ruhaia, oi be Kaisara ena turana lasi! Bema tau ta ia gwau ia be king, ia ese Kaisara ia hadikaia inai!”

13 Pilato ese unai hereva ia kamonai, vadaeni ia ese Iesu ma ia hakaua murimuri dekenai. Vadaeni ia ese kota henia gabuna dekenai ia helai diho, unai gabu ena ladana be Nadi Dehena. Heberu gado dekenai ena ladana be Gabata. 14 Unai be Pasova Aria idia karaia hegaegae ena dina, negana be dina tubua. Pilato ese Iuda taudia dekenai ia hereva, ia gwau, “Umui itaia, umui emui King be inai.”

15 Vadaeni idia boiboi, idia gwau, “Oi abia siri! Oi abia siri! Oi hasatauroa!”

Pilato ese ia nanadaia idia dekenai, ia gwau, “Umui emui King do lau hasatauroa, a?”

Dubu biagudia be idia gwau, “Ai be mai emai king ta lasi, Kaisara sibona.”

16 Vadaeni Pilato ese Iesu ia henia idia dekenai, do idia hasatauroa totona.

17 Unai dainai Iesu idia abia, idia hakaua lao. Ia ese iena satauro ia huaia lao, gabu ta dekenai idia lao, ena ladana be Kwara Koukouna Gabuna, Heberu gado dekenai ena ladana be Gologota. 18 Unuseni Iesu idia hasatauroa, bona tau rua danu, ta be kahana, ma ta be kahana dekenai, Iesu be idia edia huanai.

19 Vadaeni Pilato ese revareva ia torea, satauro ena ataiai ia atoa. Ia torea hereva be inai: “Iesu, Nasareta tauna, Iuda taudia edia King.” 20 Iuda taudia momo ese unai revareva idia duahia, badina be Iesu idia hasatauroa gabuna bona hanua badana ena padana be ia daudau lasi, bona unai revareva be Heberu gado dekenai bona Roma gado dekenai bona Helene gado dekenai ia torea. 21 Vadaeni Iuda taudia edia dubu biagudia ese Pilato idia hamaoroa, idia gwau, “Oi torea lasi ‘Iuda taudia edia King,’ to inai bamona oi torea, ‘Ia gwau, Lau be Iuda taudia edia King.’ ”

22 Pilato ia gwau, “Lau torea gauna be lau torea, vadaeni.”

23 Vadaeni tuari taudia, inai Iesu idia hasatauroa taudia, ese iena dabua idia abia, idia haria kahana 4 dekenai, vadaeni idia taudia 4 ta ta edia kahana idia abia. To iena dabua ta be turia hakapua lasi gauna, dabua badana tamona sibona. 24 Unai dainai, ta ta idia hereva henia, idia gwau, “Ita darea lasi, to laki gadara ita karaia, vadaeni do ita diba daika ese do ia abia.” Unai dekena amo Buka Helaga dekenai ia torea herevana ia momokani vadaeni, ia gwau,

25 Satauro ena badibadinai Iesu ena sinana bona iena sinana maragina bona Maria, Klopa ena adavana, bona Maria, Magadala hahinena, idia gini noho. 26 Iesu ese iena sinana bona ia lalokau henia diba tahua tauna ia itaia, ia kahirakahira idia gini noho. Vadaeni iena sinana dekenai ia hereva henia, ia gwau, “Hahine e, oi itaia, oiemu natuna be unai.”

27 Unai diba tahua tauna dekenai danu ia hereva henia, ia gwau, “Oi itaia, oiemu sinana be unai.” Unai negana ia lao, unai diba tahua tauna ese Maria ia abia dae iena ruma dekenai.

28 Unai murinai, Iesu ia diba iena gaukara ibounai ia karaia haorea vadaeni, vadaeni Buka Helaga ena hereva hamomokania totona ia hereva, ia gwau, “Lau ranu mase.”

29 Hodu ta be unuseni, uaina ena mamina ia namo lasi dekenai ia honu. Vadaeni sipanisi idia udaia, unai uaina dekena amo idia hahonua, au latana ta dekenai idia kwatua, vadaeni idia abia isi Iesu ena uduna bibina dekenai. 30 Iesu ese uaina ena mamina ia namo lasi gauna ia abia, vadaeni ia gwau, “Ia ore vadaeni!” Vadaeni iena kwarana ia atoa diho, iena lauma ia henia daekau.

31 Unai dina be Pasova aria karaia hegaegae dinana, ma kerukeru Sabati be idau, ia helaga momokani dinana ta. Unai dainai Iuda taudia idia ura lasi unai dina dekenai mase taudia idia noho satauro dekenai. Vadaeni Iuda taudia ese Pilato idia noia, unai mase taudia edia aena do ia makohia, bona edia tauanina do ia abia siri. 32 Unai dainai, tuari taudia idia lao, guna tauna ena aena idia makohia, ma tau iharuana ena aena danu, inai Iesu danu idia hasatauroa hebou taudia. 33 Vadaeni Iesu dekenai ma idia lao, to idia itaia ia be ia mase vadaeni, unai dainai iena aena be idia makohia lasi. 34 To tuari tauna ta ese Iesu ena ohena ia gwadaia io dekenai, vadaeni rara bona ranu idia diho. 35 Inai kara ia itaia taunaa “Inai kara ia itaia tauna” be Ioane, Iesu ese ia lalokau henia diba tahua tauna. Badina be inai buka Ioane 19:26,27 ia gwau inai tau Ioane be satauro kahirakahira ia gini noho. ese ia gwauraia hedinarai, bona iena hereva be momokani. Ia be ia diba iena hereva be momokani, unai dainai umui danu do umui abidadama henia diba. 36 Badina be unai kara ia vara, Buka Helaga ena hereva hamomokania totona, ia gwau, “Ena turiana ta idia makohia lasi.” 37 Ma ta danu, Buka Helaga ia gwau, “Idia gwadaia tauna be taunimanima ese edia matana dekenai do idia itaia.”

38 Unai kara ia ore murinai, Iosepa, Arimatea tauna, ese Pilato ia noia, Iesu ena tauanina do ia abia siri. Iosepa be Iesu ena diba tahua tauna ta, to Iuda taudia dekenai ia gari dainai, iena abidadama ia hunia. Pilato ese maoro ia henia, vadaeni Iosepa ia lao, Iesu ena tauanina ia abia siri. 39 Nikodemo danu, gunaguna neganai Iesu dekenai ia lao hanuaboi lalonai tauna ia mai. Ia ese muro bona aloe edia muramura idia mikisi gauna ia abia lao, edia metau kilogaram 50 bamona. 40 Vadaeni idia ese Iesu ena tauanina idia abia, dabua aukana mai muramura danu dekenai idia kumia, Iuda taudia edia mase guria karana hegeregerena. 41 Iesu idia hasatauroa gabuna dekenai be uma gabu ta, bona unai uma gabu lalonai be guria gabuna matamata ta, ena lalonai mase tauna ta do idia atoa lasi. 42 Unai dainai, idia ese Iesu unuseni idia atoa, badina unai dina be Pasova aria karaia hegaegae dinana, bona unai guria gabuna be kahirakahira.