48
Lohiabada ena peroveta hereva Moaba taudia totona
1 Siahu Ibounai Lohiabada, Israela ena Dirava ese inai bamona hereva ia gwauraia Moaba tano totona:
“Nebo taudia madi do idia dika,
badina be edia hanua be tuari taudia ese,
do idia hadikaia ore.
Kiriataimi hanua be do ia hemarai bada,
tuari taudia ese idia halusia,
bona idia abia dainai.
Iena kohoro, gabu aukana badana be do idia botaia,
do ia moru diho,
hemarai gauna do ia lao.
2 Taunimanima ese Moaba do idia hanamoa lou lasi.
Hesebona dekenai tau haida,
be idia hereva hebou noho,
Moaba do idia hadikaia totona, idia gwau,
‘Umui mai, inai basileia,
be do ita haorea momokani be namo.’
Mademene hanua danu be do ia regena lasi,
tuari taudia ese do idia hadikaia dainai.
3 Kamonai! Horonaimi hanua dekenai,
taunimanima idia taitai noho, idia gwau,
‘Hisihisi bona dika bada herea!’
4 Moaba be idia hamakohia vadaeni,
natuna maragidia edia taitai do umui kamonai.
5 Idia be Luhiti dekenai ia daekau lao dalana dekenai idia raka noho,
mai taitai danu.
Bona Horonaimi dekenai ia diho lao dalana dekenai,
hisihisi dainai taunimanima idia tai regena do umui kamonai.
6 Do umui heau!
Do umui mauri totona do umui heau,
tano kaukau dekenai ia heau noho uda doniki bamona!
7 Badina be, umui ese emui goada karadia,
bona emui kohu momo umui abidadama henia dainai,
umui danu be tuari taudia ese,
do idia abia mauri.
Vadaeni emui dirava Kemoso,
be umui danu mai guia danu,
gabu daudau dekenai do umui noho.
Kemoso ena hahelagaia taudia,
bona iena lohia taudia danu be unai gabu do idia lao.
8 Hadikaia ore tauna ese,
hanua ibounai do ia hadikaia,
hanua ta taudia do idia heau mauri lasi.
Koura ibounai be anina lasi do idia noho.
Tano palaka gabudia ibounai,
be do idia dika momokani.
Lau inai Lohiabada,
lau hereva vadaeni.
9 Moaba totona mase guria gabuna ta do umui haginia,
badina nega sisina lalonai do ia dika ore.
Iena hanua ibounai,
be anina lasi gabudia do idia lao.
Taunimanima unuseni do idia noho lasi.”
10 Mai lahedo danu Lohiabada ena gaukara ia karaia noho tauna be lau hadikaia inai. Iena tuari kaia dekena amo ia gwadaia lasi bona ta ia alaia lasi tauna danu be lau hadikaia inai.
Moaba ena hanua ibounai idia hadikaia ore
11 Moaba be ia mero negana dekena amo,
ia noho namonamo vadaeni,
uaina be iena hodu dekenai ia noho bamona,
hodu ta dekena amo hodu ta dekenai,
be nega ta idia bubua lasi bamona.
Bona nega ta gabu daudau dekenai idia abia lao lasi.
Unai dainai iena mamina be do ena lalonai ia noho,
bona iena bonana be ia idau lasi.
12 Unai dainai Lohiabada ia gwau, “Dina do idia ginidae lau ese uaina bubua taudia do lau siaia, idia ese Moaba do idia bubua. Moaba ena uaina hodu do idia bubua ore, bona ena hodu ibounai do idia hamakohia. 13 Unai neganai Moaba taudia ese Kemoso dirava dainai do idia hemarai, Israela taudia ese Betele dirava, idia abidadama henia dirava, dainai idia hemarai hegeregerena.
14 “Moaba taudia e, badina dahaka umui gwau,
‘Ai be tuari dekenai manada taudia,
ai be tuari dekenai goada herea taudia?’
15 Moaba bona iena hanua gabudia,
be tuari dekena amo do idia hadikaia ore.
Iena eregabe taudia namo herea momokani,
be do idia mase ore.
Lau be King, Siahu Ibounai Lohiabada,
bona lau hereva vadaeni inai.
16 Moaba ena dika bada negana,
be ia kahirakahira vadaeni,
iena hisihisi dinana ia mai noho haraga.
17 Moaba umui noho hagegea taudia ibounai e,
Moaba ena ladana bada umui diba taudia e,
do umui gwau, ‘Dagi auna namo herea,
au mai ena hairai bada,
madi ia makohia vadaeni.’
18 “Dibona hanua umui noho taudia e,
emui hairai gabudia dekena amo do umui diho mai,
bona tano kaukau,
kahu ena latanai do umui helai.
Badina be Moaba do ia hadikaia ore tauna ia mai vadaeni,
umui do ia hadikaia totona.
Emui hanua mai magudia do ia hamakohia ore.
19 Umui Aroere dekenai noho taudia e,
dala ena isena dekenai do umui gini,
do umui naria noho.
Heau tauna bona heau mauri hahine taudia,
be do umui nanadaia,
do umui gwau, ‘Dahaka ia vara?’
20 Do idia haere, do idia gwau,
‘Moaba be ia moru vadaeni,
Moaba totona do umui tai,
badina ia be ia hemarai bada noho.
Aranona Sinavai ena isena idia noho taudia,
dekenai do umui gwauraia hedinarai, inai bamona:
Moaba be ia dika vadaeni!’
21 “Inai ataiai dekenai idia noho tano palaka hanua ibounai be lau Lohiabada ese lau kota henidia, bona edia dika davana lau henidia vadaeni: Holona, Iahasaha, Mepata, 22 Dibona, Nebo, Bete Dibilataimi, 23 Kiriataimi, Bete Gamulu, Bete Meono, 24 Kerioto, Bosera, bona Moaba tano ena hanua ibounai, daudau bona kahirakahira, edia latanai. 25 Moaba ena goada be lau utua vadaeni, iena siahu be lau hadikaia ore. Lau inai Lohiabada lau hereva vadaeni.”
Moaba be do ia manau lao
26 Lohiabada ia gwau, “Moaba dekenai muramura aukana do umui henia, vadaeni do ia kekero. Badina be ia sibona ia habadaia, bona ia ese lau ia dagedage henia. Unai dainai Moaba be sibona ena mumuta dekenai do ia hekure giroagiroa, bona taunimanima ese do idia kirikirilaia. 27 Moaba e, oi laloa, nega ta Israela oi kirikirilaia lasi, a? Nega haida oi ese Israela taudia dekenai oi dagedage henia, henaoa taudia dekenai do oi dagedage henia bamona, ani?
28 “Moaba lalonai noho taudia e,
hanua do umui rakatania,
nadi badadia lalonai do umui noho.
Nadi kohua vareai gabuna dekenai,
emui ruma do umui karaia,
pune manu bamona.
29 Moaba ena hekokoroku sivarai ita kamonai.
Ia be hekokoroku bada herea.
Ia sibona ia abia isi, ia hereva dagedage,
bona ia laloa ia sibona be namo herea.
30 Lau Lohiabada be Moaba ena hekokoroku lau diba,
to unai be hekokoroku kava.
Moaba ena hekokoroku hereva be koikoi,
iena kara danu be koikoi.
31 Unai dainai lau be Moaba totona lau tai noho.
Moaba taudia ibounai dainai lau tai noho.
Kiri Here taudia dainai lau tai noho.
32 Sibima taudia dainai lau tai bada noho,
Iasere taudia totona lau tai maragi lasi noho.
Sibima hanua e, oi be vain badana bamona.
Oiemu vain rigina be davara idia hanaia noho,
bona edia lata ia lao ela bona Iasere dekenai.
To hadikaia taudia ese,
emui au huahuadia bona emui vain huahuadia be,
idia ibounai idia hadikaia ore vadaeni.
33 Moaba tano, au huahua momo ena tano,
ia dekena amo moale bona laloa namona idia haorea.
Lau Lohiabada ese vain ena huahua moia gabudia dekenai,
uaina ena heau lao lau hadokoa vadaeni.
Unai dainai tau ta lasi ese,
vain huahua ia moia noho mai moale ena boiboi danu.
Iena boiboi be moale ena boiboi lasi.
34 “Hesebona bona Eleale taudia idia tai noho, mai boiboi danu. Edia taitai ena regena be Iasere dekenai noho taudia idia kamonai diba. Soara dekena amo ela bona Horonaimi bona Egelata Silisia dekenai noho taudia danu ese unai tai ena regena idia kamonai. Badina be Nimirimi ena ranu gabudia idia kaukau lao vadaeni.”
35 Lohiabada ma ia gwau, “Moaba taudia ese edia ataiai tomadiho gabudia dekenai bonana namo muramura idia gabua kara, bona edia dirava dekenai bouboudia idia henia karadia, be do lau hadokoa.
36 “Momokani egu kudouna be ia tai noho, ivilikou bamona, Moaba dainai, bona egu kudouna be ivilikou bamona ia tai noho Kiri Here taudia dainai. Idia ese kohu momo idia haboua vadaeni, to idia ibounai be idia boio ore vadaeni. 37 Unai taudia ibounai ese edia auki huidia bona kwaradia huidia idia kakasia ore. Idia ibounai ese danu edia imadia idia utua, bona edia gabadia dekenai puse dabua idia kwatua.
38 “Moaba taudia edia ruma ibounai edia guhi latanai bona hanua ariaradia edia lalonai, taunimanima idia tai noho, tai noho sibona, badina be lau Lohiabada ese Moaba lau hamakohia vadaeni, tau ta ese ia ura lasi hodu bamona. 39 Moaba ia makohia maragimaragi vadaeni. Madi Moaba taudia idia taitai noho, mai boiboi danu. Moaba, madi, hemarai dainai iena doruna sibona ia hedinaraia. Unai dainai Moaba be taunimanima ese idia kirikirilaia noho. Idia hagegea besedia ibounai ese do idia itaia, mai gari bona badu danu.”
Moaba be do ia heau mauri lasi
40 Badina Lohiabada be inai bamona ia gwau:
“Itaia! Ugava manu bamona,
bese ta do ia roho diho haragaharaga,
iena hanina do ia atoa maoromaoro,
Moaba do ia hadikaia totona.
41 Moaba ena hanua bona edia gabu aukadia,
be tuari taudia ese do idia halusia,
do idia abia.
Unai dina dekenai Moaba ena tuari taudia,
be do idia gari bada,
natuna ia havaraia noho hahine ia gari bada noho bamona.
42 Moaba be do idia hadikaia ore,
bona do idia gwauraia lou lasi bese ta,
badina be ia sibona ia habadaia,
bona ia ese Lohiabada ia dagedage henia.
43 Moaba dekenai noho taudia e,
gari bada, guri dobudia bona tarapu,
be emui vairana dekenai idia noho.
Lau Lohiabada lau hereva inai.
44 Bema gari bada gauna dekena amo tau ta ia heau,
ia be guri dobuna lalonai do ia moru diho.
Bema ia be guri dobuna dekena amo ia daekau mai neganai,
ia be tarapu lalonai dika do ia davaria.
Badina be lau ese nega lau gwauraia vadaeni,
Moaba edia dika davana do lau henia totona.
Lau Lohiabada lau hereva inai.
45 Tuari dekena amo idia heau mauri taudia,
be Hesebona lalonai idia heau vareai,
mauri gabuna idia tahua,
edia goada ia ore dainai.
To lahi be Hesebona dekena amo ia toreisi.
Lahi be king Sihona ena ruma dekena amo ia toreisi.
Inai lahi ese Moaba taudia, hekokoroku taudia,
edia tano hetoa gabudia dekenai ia lao,
bona ena ororo gabudia do ia gabua ore.
46 Moaba taudia e, madi do umui dika!
Kemoso dirava idia tomadiho henia taudia,
be bese ta taudia ese idia hadikaia ore,
bona edia natudia,
tau bona hahine, be mai guia danu,
unai bese tuari taudia ese idia abidia lao vadaeni.
47 To gabeai dinadia lalonai,
lau Lohiabada ese Moaba ena noho do lau hanamoa lou.”
Inai karadia ibounai be Lohiabada ese ia gwauraia hedinarai do idia vara Moaba dekenai.