32
1 Guba e, oi kamonai, do lau hereva,
tanobada e, lauegu hereva do oi kamonai.
2 Lauegu hereva be medu bamona do ia diho.
Lauegu hadibaia hereva,
be hanuaboi ena paripari bamona do ia hedinarai,
medu maragina rei matamata ena latanai bamona,
medu bada aniani avadia edia latanai bamona.
3 Lohiabada ena ladana do lau habadaia.
Iseda Dirava do lau hanamoa.
4 Ia be Nadi Badana,
iena gaukara be namo momokani.
Iena dala ibounai be maoro,
bona iena kota be momokani.
Ia be abidadama ena Diravana,
ia kara dika lasi.
Ia be momokani bona maoromaoro.
5 To umui be iena vairana dekenai umui kara dika noho.
Umui be iena natuna taudia lasi,
badina umui be mai emui miro.
Umui be dagedage bona gagevagageva besena.
6 Kavakava bona laloa metau taudia e,
Lohiabada dekenai unai bamona umui karaia, a?
Ia be umui emui tamana lasi, a?
Mauri be umui dekenai ia henia lasi, a?
Ia ese umui ia karaia, bona umui ia haginia.
7 Nega gunadia do umui laloa,
idaunegai momokani idia vara gaudia do umui laloa.
Emui tamana taudia do umui nanadaia,
idia ese unai kara gunadia do idia hadibaia.
Tau badadia do umui nanadaia,
idia ese dahaka idia vara vadaeni gaudia,
be do idia hamaoroa umui dekenai.
8 Ataiai Herea Diravana ese,
bese ta ta dekenai tano ia haria henidia neganai,
taunimanima ibounai edia noho gabudia ia gwauraia neganai,
ia ese bese ta ta edia tano hetoadia ia henidia.
Ia ese bese ta ta ibounai dekenai,
edia dirava ta ta ia henia.
9 To Lohiabada ese iena bese korikori,
be Iakobo dekena amo ia abia hidi.
10 Ia ese taunimanima noho lasi tano dekenai,
idia ia davaria.
Rei lasi tano dekenai idia ia davaria.
Lohiabada ese idia ia naria bona ia ubua.
Ia ese idia ia gimaia,
sibona ena lalokau tauna ia gimaia bamona,
11 ugava manu bamona,
iena natuna be roho dalana ia hadibaia neganai.
Ia be iena natuna ugava danu ia roho noho,
bona iena natuna idia moru, o roho hegeregere lasi neganai,
ugava ese iena hanina ia atoa maoromaoro,
hanina dekena amo iena natuna ia gobea,
bona natuna be iena sinana ena hanina dekenai do idia helai,
do idia moru garina.
12 Lohiabada sibona ese Israela ia hakaua,
dirava idauna ta ese idia ia durudia lasi.
13 Lohiabada ese iena bese,
be ororo gabudia dekenai ia siaia lao.
Idia ese uda dekenai idia vara aniani idia ania.
Dirava ese nadi dekena amo,
hani idia dekenai ia henia.
Nadi aukana dekena amo,
olive dehoro idia dekenai ia henia.
14 Edia boromakau edia bata, edia mamoe edia rata,
bona edia mamoe natudia tau edia digara idia ania,
Basana dekenai noho boromakau, bona nani danu.
Uiti namo herea umui ania,
bona uaina namona umui inua.
15 To Lohiabada ena bese edia tauanina idia bada lao,
vadaeni idia dagedage.
Aniani dekenai idia honu,
vadaeni idia metau.
Vadaeni idia ese ia karadia Diravana idia rakatania.
Idia ia hamauria Nadi Badana,
be idia ese idia negea momokani.
16 Idia ese dirava idaudia idia tomadiho henidia,
unai dainai Lohiabada ia badu.
Idia edia kara dika dekena amo Lohiabada idia habadua.
17 Lauma dikadia dekenai boubou idia henia.
Idia ese Dirava lasi laumadia,
bona idia diba lasi dirava dekenai, boubou idia henia.
Dirava matamatadia, vanegai sibona idia davaria gaudia,
dekenai boubou idia henia.
Emui tamadia idia diba lasi diravadia be unai.
18 Edia Dirava, edia Hamauria Tauna badana,
be idia laloaboio.
Idia ia karaia Diravana idia laloa lasi.
19 Lohiabada ese inai bamona kara ia itaia,
vadaeni ia rakatanidia,
badina be iena natuna, tau bona hahine,
edia kerere ese ia idia habadua dainai.
20 Ia gwau, “Lauegu vairana be idia dekena amo do lau hunia,
bona edia dokona be do lau itaia,
badina idia be dagedage taudia.
Idia be mai edia abidadama lasi taudia.
21 Edia dirava, anina lasi gaudia,
dekena amo idia ese lau idia habadua.
Edia kaivakuku dekena amo,
lauegu dagedage idia havaraia.
Vadaeni bese kavakavana ta dekena amo,
lau ese idia do lau habadua,
bona anina lasi oreana dekena amo,
edia mama do lau havaraia.
22 Badina be lauegu badu ese,
lahi ia havaraia vadaeni.
Tanobada ena gau ibounai do ia gabua ore,
bona mase taudia edia dobu herea gabudia do ia araia,
ororo badinai ia noho tanona danu do ia gabua ore.
23 “Dika idauidau be idia edia latanai do lau siaia,
bona lauegu diba ibounai,
be idia dekenai do lau pidia haorea,
24 Hitolo ese edia tauanina do ia hamaragia.
Lahi ena siahu ese idia do ia alaia mase.
Mase gorere ese idia do ia hamasea.
Uda ena dagedage gaudia do lau siaia,
idia ese idia do idia darea mase,
bona gaigai, mase gaudia, do lau siaia,
idia do idia koria totona.
25 Ariara gabuna dekenai,
tuari kaia ese idia do ia alaia,
bona ruma lalonai danu,
gari bada ese idia do ia hadikaia.
Uhau taudia bona kekeni do idia mase,
natuna maragidia bona tau burukadia danu do idia mase.
26 Lau gwau, ‘Idia do lau hadikaia ore momokani,
taunimanima ibounai ese idia do idia laloaboio totona.’
27 To idia dekenai idia dagedage taudia,
edia hevaseha hereva dekenai lau laloa momo,
do idia laloa kerere garina,
do idia gwau, ‘Ai ese Lohiabada ena bese ai halusia, to
to Lohiabada ese gau ta ia karaia lasi.’ ”
28 Badina Israela be aonega lasi besena.
Idia edia lalona be idia kehoa lasi.
29 Idia kwalimu lasi ena badina, idia diba lasi,
bona dahaka ia vara ena anina, be idia laloa lasi.
30 Badina dahaka tau tamona sibona ese,
Israela ena tatau 1000 ia lulua diba?
Bona tau rua sibona ese Israela tatau 10,000,
edena bamona idia halusia diba?
Badina be inai:
Edia Dirava ese idia ia rakatania vadaeni.
Edia Siahu Ibounai Dirava ese idia ia negea vadaeni.
31 Badina be Israela dekenai idia dagedage henia taudia,
be idia diba vadaeni, edia dirava be idia manoka,
bona mai edia siahu lasi.
Idia diba edia dirava be Israela ena Siahu Diravana bamona lasi.
32 Israela idia dagedage henia taudia be miro bona kerere,
Sodoma bona Gomora idia miro bamona.
Idia edia vain ese huahua dikadia,
mase gaudia idia havaraia vadaeni.
33 Edia uaina be gaigai ena mase muramura bamona,
gaigai ena koria mase poisini bamona.
34 To Lohiabada ese Israela dekenai idia dagedage taudia,
edia kara ia laloatao noho.
Nega korikori dekenai edia dika davana do ia henia.
35 Lohiabada ese dika ena davana do ia henia,
bona namo ena davana danu.
Unai dagedage taudia edia aena be do idia dedi.
Idia edia moru dinana be kahirakahira.
Lohiabada ese idia do ia hadikaia ore haraga.
36 Lohiabada ese ita ia itaia noho,
bona iena bese edia goada ia ore neganai,
ia ese idia do ia hamauria.
Ia ese ia itaia noho,
vadaeni iena hesiai gaukara idia karaia noho taudia,
be durua ta lasi neganai,
ia ese idia do ia bogahisihisi henia.
37 Unai neganai Lohiabada ese iena bese do ia nanadaia,
do ia gwau,
“Unai dirava goadadia,
umui abidadama henidia gaudia, be edeseni?
38 Emui boubou edia digara dekena amo umui ubudia,
bona emui inua boubou uaina idia inua, ani?
Namo, idia be do idia toreisi,
bona umui do idia durua, a?
Harihari idia ese umui do idia hamauria, a?
39 “Harihari umui itaia, lau Dirava inai.
Dirava ta be lasi, lau sibona.
Lau ese taunimanima lau alaia noho,
bona taunimanima lau hamauria noho.
Lau ese lau haberoa noho,
bona lau ese bero lau hanamoa noho.
Bona lauegu kara be tau ta ese ia koua diba lasi.
40 Badina be lauegu imana be guba dekenai lau duduia,
lau gwau, lau be lau noho hanaihanai hegeregerena,
41 lauegu tuari kaia do lau segea,
bona kota maoromaoro be ia dekena amo do lau karaia.
Lau dekenai idia tuari henia taudia,
edia kerere davana do lau henia,
lau dekenai idia dagedage taudia danu,
edia dika davana do lau henia.
42 Lauegu diba bona peva dekena amo,
rara momo do ia diho.
Lauegu tuari kaia ese,
lau idia koua gwauraia taudia do ia alaia mase ore.
Lau dekenai idia tuari henia taudia ibounai,
be do lau alaia mase.
Bero taudia bona abia mauri dibura taudia danu,
be do idia mase ore.”
43 Bese idauidau e,
Lohiabada ena bese do umui hanamoa,
badina be, Israela taudia idia alaia taudia ibounai,
be Lohiabada ese ia panisia noho.
Ia idia dagedage henia taudia dekenai,
be ia ese edia dika davana ia henia noho.
To iena bese taudia edia kara dika,
be ia ese ia gwauatao noho.
44 Mose bona Iosua Nunu ese inai ane ena hereva ibounai idia gwauraia, Israela taudia do idia kamonaia totona.
Mose ena hadibaia hereva dokona
45 Mose ese Lohiabada ena hadibaia hereva Israela taudia ibounai dekenai ia hamaoroa vadaeni. 46 Vadaeni ia hereva lou, ia gwau, “Hari dina dekenai umui lau hamaoroa herevadia ibounai do umui laloatao, emui natudia dekenai danu do umui hadibaia. Inai lau hadibaia taravatu ena hereva ibounai do idia badinaia bona edia kara do idia karaia. 47 Badina be inai herevadia be gau maragina lasi umui dekenai. Lasi, idia be emui mauri. Idia do umui kamonai henia, vadaeni Ioridane Sinavai unai kahana dekenai do umui noholaia tano dekenai emui mauri dinadia do idia momo.”
48 Unai dina dekenai Lohiabada ese Mose ia hereva henia, ia gwau, 49 “Abarima Ororo dekenai do oi daekau lao. Unai be Nebo Ororo, Moaba tanona dekenai, Ieriko unai kahana dekenai. Unai gabu dekena amo oiemu matana do oi negea, Kanana tano, Israela taudia dekenai do lau henia tano, do oi itaia. 50 Vadaeni unai oi daekau lao ororona dekenai do oi mase, oiemu kakana Arona be Horo Ororo dekenai ia mase hegeregerena. 51 Badina be Israela taudia edia vairana dekenai umui ruaosi ese lau dekenai umui kamonai henia lasi, Meribata Kadesi ena ranu gabuna badibadinai, Sini ena tano, taunimanima noho lasi gabuna dekenai, lau umui matauraia lasi, Israela taudia edia vairana dekenai. 52 Unai dainai unai tano be daudau dekena amo sibona do oi itaia. To Israela taudia dekenai lau henia tano be do oi ginidae lasi, bona unai tano lalonai do oi raka vareai lasi.”