1 Mose ma ia gwau, “Inai hanamoa bona hadikaia herevadia be umui emui vairana dekenai lau gwauraia inai: Vadaeni hanamoa do umui abia hidi, o hadikaia do umui abia hidi? Lohiabada emui Dirava ese bese idauidau momo edia huanai umui do ia lulua neganai, inai hanamoa kara bona hadikaia kara umui dekenai do idia vara. Unai neganai inai abia hidi kara be do umui laloatao. 2 Bona bema Lohiabada, emui Dirava dekenai umui bona emui natudia ese do umui giroa lou, bona iena hereva, hari dina umui dekenai lau henia gauna do umui kamonai henia, mai emui lalona ibounai bona kudouna ibounai neganai, 3 Lohiabada emui Dirava ese umui do ia bogahisihisi henia. Ia ese bese idauidau dekena amo umui do ia hagiroa mai, bona umui do ia haboua lou, bona hanamoa lou. 4 Sedira umui haida be tanobada ena daudau herea momokani gabudia do umui noho, to Lohiabada ese umui do ia haboua lou, bona unai gabudia dekena amo umui do ia hakaua mai. 5 Lohiabada emui Dirava ese emui sene taudia edia tano dekenai umui do ia hakaua vareai lou, do umui abia, emui tano. Ia ese umui do ia hanamoa, bona emui bese do ia habadaia bada herea, ela bona emui sene taudia edia momo herea do umui hanaia.

6 “Lohiabada, emui Dirava ese umui emui lalona bona kudouna do ia hahelagaia, vadaeni ia do umui lalokau henia, mai emui lalona ibounai, bona mai emui kudouna ibounai. Vadaeni do umui mauri noho unai tano dekenai. 7 Vadaeni Lohiabada, emui Dirava, ese inai hadikaia herevadia ibounai, be umui dekenai idia dagedage taudia edia latanai do ia atodia. Unai umui idia badu henia taudia ese unai hadikaia herevadia do idia davaria. 8 To umui be Lohiabada ena hereva do umui kamonai henia, bona iena oda, hari dina lau henia gaudia, do umui badinaia. 9 Lohiabada, emui Dirava ese umui do ia hanamoa, emui gaukara ena anina do ia habadaia, bona natudia momo do umui havaraia. Emui boromakau bona mamoe orea danu do ia habadaia, emui uma ena anina do ia habadaia danu. Bona Lohiabada ese mai moale danu, kohu momo umui dekenai do ia henia, emui sene taudia dekenai kohu momo ia henia bamona. 10 To Lohiabada, emui Dirava ena hereva do umui kamonai, bona iena taravatu, inai Taravatu Buka lalonai idia torea vadaeni gaudia do umui badinaia, bona Lohiabada, emui Dirava dekenai do umui giroa lou, mai emui lalona ibounai, bona mai emui kudouna ibounai danu.

11 “Badina be hari dina dekenai umui lau oda henia herevadia be auka momokani lasi, bona idia ese emui goada idia hanaia lasi. 12 Inai taravatu be guba dekenai ia noho lasi. Vadaeni, inai bamona do umui henanadai lasi, ‘Daika be ita dainai do ia daekau guba dekenai, inai taravatu do ia abia mai, bona ita dekenai do ia gwauraia? Unai neganai do ita kamonai henia, bona iena kara do ita karaia.’ 13 Bona inai taravatu be davara unai kahana dekenai lasi. Vadaeni, inai bamona do umui henanadai lasi, ‘Daika be ita dainai davara unai kahana dekenai do ia lao, ita dekenai do ia mailaia, vadaeni do ita kamonai bona karana do ita karaia?’ 14 To unai taravatu be oiemu badibadinai ia noho, oiemu uduna lalonai, bona oiemu kudouna dekenai, ena kara do oi karaia totona.

15 “Hari dina dekenai, namo bona dika, mauri bona mase, be umui emui vairana dekenai lau atoa. Idia huanai dekena amo, edena do umui abia hidi? 16 Lohiabada emui Dirava ena oda, hari dina umui dekenai lau henia gaudia do umui kamonai henia. Bema unai bamona umui karaia, bona bema Lohiabada umui lalokau henia, iena dala do umui raka, bona iena taravatu ibounai do umui badinaia, umui be do umui mauri. Bona Lohiabada ese umui do ia hagoadaia, vadaeni emui bese do ia habadaia. Oibe, Lohiabada ese umui do ia hanamoa, do umui raka vareai bona abia tanona lalonai.

17 “To bema emui lalona idia auka, bona Lohiabada dekenai umui kamonai henia lasi, bona bema dirava idaudia umui tomadiho henia, bona edia hesiai gaukara umui karaia neganai, 18 lau ese hari dina umui lau hamaoroa, umui be do umui mase ore. Ioridane Sinavai do umui hanaia, to unai tano, do umui abia bona noholaia tanona dekenai do umui mauri daudau lasi.

19 “Hari dina, guba bona tanobada dekenai lau boiboi noho, idia ese umui do idia uitnesi henia. Badina lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho. 20 Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo. Unai neganai ia be emui mauri ena badina, bona ia ese mauri lagani momo herea umui dekenai do ia henia. Bona emui sene taudia Aberahamo bona Isako bona Iakobo dekenai Lohiabada ese ia gwauhamata henidia tano lalonai do umui noho daudau herea.”