1 Lau inai Paulo, lau be Keriso Iesu ena aposetolo tauna, Dirava ena ura dainai. Lau bona iseda varavara Timoteo ese inai revareva ai torea umui Dirava ena taudia Kolose dekenai, Keriso Iesu umui abidadama henia taudia.

2 Lau ura be Dirava iseda Tamana ese hariharibada bona maino umui dekenai do ia henia.

3 Umui dainai ai ruaosi ai guriguri negadia ibounai, Dirava, iseda Lohiabada Iesu Keriso ena Tamana ai tanikiu henia noho. 4 Badina be ai kamonai vadaeni umui ese Keriso Iesu umui abidadama henia noho, Dirava ena taudia ibounai umui lalokau henia danu. 5 Guna, umui ese Sivarai Namona ena hereva momokani umui kamonai neganai, guba ena mauri namona laloa ese umui ia hamoalea. Unai laloa namona ese emui abidadama bona lalokau ia havaraia. Bona umui diba vadaeni, guba ena davana namona dohore umui davaria. 6 Umui dekenai Sivarai Namona ia ginidae, tanobada ibounai dekenai ia ginidae hegeregerena. Bona tanobada ibounai ese Sivarai Namona ena hanamoa idia davaria, umui ese ena hanamoa umui davaria hegeregerena. Io, inai hanamoa umui dekenai ia noho, Keriso Iesu dekenai umui abidadama henia dinana ia mai bona harihari. Unai dainai, umui be Dirava ena hariharibada umui diba momokani. 7 Dirava ena hariharibada ena Sivarai namona be aiemai lalokau tauna Epafra, ese umui dekenai ia hadibaia. Ia be aiemai gaukara durua tauna ta, bona ia be Keriso ena hesiai tauna namona ta danu, ma umui totona ia gaukara noho. 8 Ia ese emui lalokau namona kara, be ai ruaosi dekenai ia hamaorolaia. Unai lalokau be Lauma Helaga ese umui dekenai ia henia vadaeni.

9 Unai dainai emui sivarai ai kamonai dinana ia mai bona harihari, guriguri umui dainai ai ruaosi ese ai hadokoa lasi. Dirava ai noia, ia ese iena ura dalana umui dekenai do ia hadibaia, bona Lauma Helaga ena diba bona diari umui dekenai do ia henia. 10 Vadaeni Lohiabada ena ura hegeregerena do umui noho, bona nega ibounai umui ese ia do umui hamoalea. Emui mauri ese kara namodia edia anina do idia havaraia, bona Dirava ena diba bona diari ese umui do idia hatubua daekau. 11 Ai ruaosi ai noinoi danu, Dirava ese umui do ia hagoadaia, vadaeni iena siahu dekena amo, metau ibounai lalonai do umui gini goada, mai haheauka danu. Bona emui hisihisi lalonai, mai moale danu do umui noho. 12 Tamana ita tanikiu henia be namo, badina be ia ese iseda kara ia hagoevaia. Vadaeni ita be hegeregere, Dirava ena taudia danu, ahuna do ita davaria, diari ena Basileia dekenai. 13 Dirava ese dibura ena siahu dekena amo ita ia hamauria vadaeni, bona iena Natuna, iena lalokau, ena Basileia lalonai ita ia abia vareai vadaeni. 14 Dirava ena Natuna ese ita ia hoia lou, bona iseda kara dika ia gwauatao, iena rarana dekena amo.

15 Dirava be ita ese ita itaia diba lasi. To Dirava ena Natuna be Dirava ena toana hegeregerena. Ia be vara guna Natuna, ia be Dirava ese ia karaia gaudia ibounai edia biaguna momokani. 16 Badina be ia dekena amo Dirava ese gau ibounai ia karaia, guba dekenai bona tanobada dekenai. Ita itaia diba gaudia bona ita itaia diba lasi gaudia, siahu laumadia ibounai, king ibounai, gavana ibounai, siahu taudia ibounai be Dirava ese ia karaia Keriso dekena amo. Oibe, Dirava ese Keriso dekena amo gau ibounai ia karaia, do idia be Keriso ena totona. 17 Gau ibounai idia do noho lasi neganai Keriso be ia noho. Iena siahu dekena amo, gau ibounai be edia gabu edia gabu dekenai idia noho, ia ese idia ia naria noho. 18 Ia be ekalesia ena kwarana, bona ekalesia be iena tauanina. Ia be unai tauanina ena mauri badina. Ia be vara guna Natuna, Dirava ese mase dekena amo ia hatorea isi tau ginigunana, unai dainai ia sibona be gau ibounai edia kwarana momokani. 19 Badina be Dirava ena ura be inai: Sibona ena mauri ibounai be iena Natuna lalonai do ia noho. 20 Unai dainai, iena Natuna dekena amo Dirava ese maino karaia dalana ta ia laloa. Inai maino be ia bona tanobada taudia bona guba taudia edia huanai. Keriso ena rarana satauro dekenai ia bubua dekena amo, Dirava ese ibounai danu maino ia karaia, bona ia dekenai idia mai dalana ia ese ia kehoa vadaeni. 21 Gunaguna, umui be daudau Dirava dekena amo, kara dikadia umui laloa bona karaia dainai. 22 To harihari, Keriso ena tauanina ia mase dekena amo, Dirava ese umui danu turana ia karaia. Ma keriso ese umui do ia hakaua vareai, vadaeni Dirava ena vairanai dohore umui gini, helaga, goevagoeva, bona kerere ta lasi. 23 To umui ese Keriso do umui abidadama henia noho, bona do umui gini goada. Sivarai Namona ena hereva do umui dogoatao namonamo, bona iena davana namona do umui laloa bona naria, haida ese emui lalona do idia ania garina. Lau Paulo be inai Sivarai Namona ena hesiai tauna, bona ai ese tanobada ibounai dekenai ai harorolaia vadaeni.

24 Bona harihari, mai moale danu, umui dainai hisihisi lau davaria noho. Lau ura Keriso ena ekalesia, iena tauanina, do lau durua. Keriso ena hisihisi haida, ekalesia durua totona, be idia do noho. Vadaeni lauegu tauanina ena hisihisi dekena amo Keriso ena hisihisi, ia ore lasi gauna, lau karaia haorea gwauraia. 25 Dirava ese iena ekalesia ena hesiai tauna lau ia halaoa. Ia ese inai dagi lau dekenai ia henia, be umui do lau durua totona. Bona Dirava ia ura iena hereva ibounai do lau harorolaia haorea momokani. 26 Gunaguna negadia ibounai inai Dirava ena hereva be hunia dekenai ia noho, taunimanima ibounai idia diba lasi. To harihari Dirava ese iena bese, iena helaga taudia dekenai unai hereva edia anina ia hedinaraia. 27 Dirava ena palani be inai bamona: Iena hunia hereva be iena bese taudia dekenai do ia hedinaraia. Io, Dirava ia ura umui, iena bese taudia, be do umui diba, inai hunia hereva be namo herea momokani, bona mai ena diari bada. Ia be bese idauidau ibounai totona. Inai hunia hereva ena anina be inai: Keriso be umui emui kudouna edia lalonai ia noho, bona umui ese ia do umui naria noho, vadaeni ia ese umui do ia abia lao guba dekenai. Unuseni Dirava ena gau namodia, mai edia hairai danu, do umui abia momokani. 28 Unai dainai Keriso ai harorolaia goada noho, bese ibounai edia taunimanima dekenai. Mai aonega idauidau dekena amo, taunimanima ai sisiba henia, ai hadibaia noho, idia ta ta ibounai ese Keriso danu do idia hakapua. Vadaeni idia be Dirava ena vairanai do idia gini goada diba, Keriso lalonai, bona namo momokani vadaeni taudia. 29 Unai totona lau hekwarahi, bona egu goada ibounai lau gaukaralaia noho. Keriso ese inai goada bona siahu, be egu lalona dekenai ia havaraia noho.