16
Disi 7, Dirava ena badu toana
1 Vadaeni, gado badana ta lau kamonai guba ena dubu helaga dekena amo, unai aneru 7 dekenai ia hereva henia, ia gwau, “Umui lao, unai disi 7, Dirava ena badu toana, do umui bubua diho tanobada dekenai.”
2 Aneru ginigunana ese ia lao, iena disi tanobada dekenai ia bubua. Dagedage gauna ena maka idia abia taudia, bona dagedage gauna ena laulauna idia tomadiho henia taudia ibounai ese toto dikadia mai hisihisi danu idia abia.
3 Aneru iharuana ese iena disi davara dekenai ia bubua. Vadaeni davara ena ranu be mase tauna ena rarana hegeregere ia lao. Bona davara lalonai idia noho gaudia ibounai idia mase vadaeni.
4 Aneru ihatoina ese iena disi sinavai bona ranu guri dekenai ia bubua. Vadaeni idia be rara dekenai idia lao. 5 Vadaeni ranu ia biagua noho aneru ena gadona lau kamonai, ia gwau,
“Helaga Diravana e, gunaguna oi noho, harihari oi noho.
Oiemu kota henia karadia be maoromaoro momokani.
6 Badina be taunimanima ese Dirava ena helaga taudia,
bona peroveta taudia edia rarana idia habubua.
Unai dainai unai taunimanima dikadia dekenai rara oi henia, idia inua totona.
Edia kara hegeregerena, mamina idia abia inai!”
7 Unai neganai gado ma ta pata helagana dekena amo lau kamonai, ia gwau,
“Lohiabada Dirava e, Siahu Ibounai Diravana e, momokani,
oiemu kota henia kara be momokani bona maoromaoro.”
8 Vadaeni aneru namba 4 ese iena disi be dina ena latanai ia bubua. Bona Dirava ese ia koua lasi dainai, dina ese taunimanima ia araia, lahi bamona. 9 Siahu bada herea ese taunimanima ia araia dikadika. Vadaeni idia ese Dirava ena ladana idia hadikaia dikadika, badina be ia be mai ena siahu unai hisihisi do ia havaraia, o do ia koua. To unai taunimanima ese edia dika dekena amo edia lalona idia giroa lasi. Bona idia ese Dirava ena ladana idia hanamoa lasi.
10 Vadaeni aneru namba 5 ese dagedage gauna ena helai gabuna badana latanai iena disi ia bubua. Dibura ese unai dagedage gauna ena basileia ia koua. Bona iena taudia ese hisihisi dainai edia malana idia koria. 11 Bona guba ena Dirava idia hereva dika henia, edia hisihisi bona edia toto dainai. To edia kara dikadia dekena amo edia lalona idia giroa lasi.
12 Unai neganai aneru namba 6 ese iena disi be sinavai badana, ladana be Euperate, lalonai ia bubua. Vadaeni ranu ia ore, sinavai ia kaukau. Bona dina daekau kahana dekena amo king do idia mai dalana ia kehoa vadaeni. 13 Vadaeni lauma dikadia toi lau itaia, edia toana be paroparo bamona. Idia ese huala badana ena uduna dekena amo, bona dagedage gauna ena uduna dekena amo, bona peroveta koikoi tauna ena uduna dekena amo idia mai noho. 14 Idia be lauma dikadia momokani, mai edia siahu hoa kara do idia karaia. Idia be tanobada edia king ibounai dekenai idia lao. Vadaeni unai king ibounai be do idia haboua, Siahu Ibounai Diravana ena Dina Badana neganai, be do idia tuari hebou totona.
15 “Kamonai! Lau be henaoa tauna bamona umui dekenai do lau mai. Ia noga noho, bona iena dabua ia atoa hegaegae noho tauna be namo. Ia namo lasi, mai kopina kavakava do ia loaloa, badina be unai bamona iena hemarai do ia hedinaraia garina.”
16 Unai lauma dikadia ese king ibounai idia haboua gabu ta dekenai. Inai gabu ena ladana Heberu gado dekenai be Aramagedono.
17 Vadaeni aneru namba 7 ese iena disi be ataiai, guba ena hodahoda dekenai ia bubua. Unai neganai guba ena dubu helaga ena helai gabuna badana dekena amo gado badana ta ia hereva badabada, ia gwau, “Ia ore vadaeni.” 18 Vadaeni kevaru, bona guba boiboi ena regena bada, bona tano mareremarere bada herea momokani idia vara. Unai tano mareremarere be idau momokani, tanobada ia karaia negana ia mai bona hari, be ta unai bamona ia vara lasi. Ia sibona be dika herea. 19 Unai hanua badana, be ia parara, kahana toi, bona bese ibounai edia hanua badadia be idia makohia ore. Ma Dirava ese unai Babulonia badana ia laloa, bona iena badu toana kapusi Babulonia dekenai ia henia. Vadaeni Dirava ena badu siahu herea uaina be unai hanua dikana ese ia inua ore. 20 Motumotu ibounai idia mutu ore, bona ororo ibounai danu be idia ore vadaeni. 21 Bona medu, aisi nadi badadia bamona idia diho. Inai aisi nadi ta ta edia metau be 50 kilogaram bamona, guba dekena amo idia moru diho, taunimanima edia latanai. Vadaeni taunimanima ese Dirava idia hereva dika henia, unai medu, aisi nadi bamona dainai. Badina unai be hisihisi dika herea momokani dainai.