1 Aiemai hesiai mai guia danu negana, ena lagani namba 10, hua namba 10, ena dina namba 12 dekenai Lohiabada ese lau dekenai ia hereva, ia gwau, 2 “Tanobada tauna e, Aigupito ena king Farao ia noho gabuna dekenai oiemu matana do oi negea, bona iena latanai do oi peroveta, 3 do oi gwau, lau Dirava, Lohiabada ese inai bamona lau hereva noho, lau gwau:

6 “Unai neganai Aigupito dekenai noho taudia ibounai be do idia diba, lau be Lohiabada. Badina Israela taudia ese umui Aigupito taudia idia abidadama henia umui ese idia do umui durudia, to idia umui durua lasi, umui be siriho manokana bamona dainai. 7 Israela taudia ese edia imadia dekenai umui idia dogoatao neganai, siriho bamona umui makohia, bona edia pagadia umui gwadaia. Bona Israela taudia be umui dekenai idia tabekau neganai umui makohia, vadaeni edia dorudia idia dika.

8 “Unai dainai lau, Lohiabada Dirava be inai bamona lau hereva noho, lau gwau: Aigupito e, oi kamonai, tuari kaia be oiemu latanai do lau mailaia, vadaeni oiemu taunimanima bona ubua gaudia do lau alaia mase. 9 Aigupito be tuari orea ta ese do idia hadikaia, bona anina lasi gabuna do idia halaoa. Unai neganai do umui diba lau be Lohiabada.

“Aigupito e, oi ese hereva oi gwauraia, oi gwau, ‘Naila Sinavai be lauegu, lau ese lau karaia,’ 10 unai dainai, oi kamonai, lau ese oi do lau dagedage henia, bona oiemu sinavai ibounai do lau dagedage henidia danu. Lau ese Aigupito tano be do lau hadikaia, bona anina lasi gabuna do lau halaoa, Migidola dekena amo ia lao bona Asiwana, ia lao bona Etiopia ena tano hetoana. 11 Unai tano dekenai, taunimanima ta o boroma ta ese do ia raka hanaia lasi. Lagani 40 lalonai taunimanima bona boroma be unuseni do idia noho lasi. 12 Lau ese Aigupito do lau hadikaia momokani, vadaeni ia be lagani 40 lalonai anina lasi do ia noho, bona iena hanua uma tano edia dika ese idau bese edia uma tano ena dika do ia hanaia. Ma lau ese danu Aigupito taudia be heau mauri taudia do lau halaodia. Idia be tano idauidau momo dekenai do idia heau lao, edia huana dekenai do idia noho.”

13 Lohiabada Dirava ese ma ia gwau, “Lagani 40 do idia ore, vadaeni Aigupito taudia be edia huanai idia noho besedia dekena amo ma do lau haboua lou. 14 Vadaeni Aigupito ena noho namo do lau havaraia lou, bona Pataro tano, edia sene taudia edia tano, lalonai ma do lau hakaudia vareai lou. Unai gabu dekenai, Aigupito be basileia manokana ta do lau halaoa. 15 Basileia ibounai edia huanai ia be do ia maragi herea. Bona ia ese nega ta basileia idauidau do ia biagudia lou lasi. 16 Israela besena taudia ese Aigupito do idia abidadama henia lou lasi, bona durua totona Israela taudia ese Aigupito do idia noia lou lasi, badina hari Israela ia diba unai tano dekenai noinoi be kara kerere. Unai neganai Israela taudia be do idia diba lau be Lohiabada Dirava.”

17 Aiemai hesiai mai guia danu negana, ena lagani namba 27, hua ginigunana ena dina ginigunana dekenai, Lohiabada ese lau Esekiela dekenai ia hereva, ia gwau, 18 “Tanobada tauna e, Nebukanesa, Babulonia ena king ese iena tuari orea ia siaia, Turo hanua do idia tuari henia totona. King ese iena tuari taudia dekenai gaukara metau ia henidia dainai, tuari taudia edia kwaradia idia kebere lao, bona edia pagadia idia toto dikadika. To king bona iena tuari taudia ese gau ta Turo dekena amo idia abia lasi, edia tuari auka, bona edia gaukara bada ibounai be hekwarahi kava. 19 Unai dainai lau Lohiabada Dirava be inai bamona lau hereva noho, lau gwau: Kamonai, lau ese Aigupito tano be Nebukanesa, Babulonia ena king dekenai do lau henia. Ia ese Aigupito ena kohu namodia do ia abia lao, do ia henaoa ore momokani. Unai kohu dekena amo iena tuari taudia edia hekwarahi davana do ia henia. 20 Lau ese Aigupito tano Nebukanesa dekenai do lau henia, iena hekwarahi ena davana, badina be Babulonia tuari taudia be lau dekenai idia gaukara noho. Lau, Lohiabada Dirava ese lau hereva noho inai.

21 “Unai bamona ia vara neganai, lau ese Israela taudia do lau hagoadaia, doa ta bamona. Bona lau ese oi Esekiela, oiemu dala do lau karaia, vadaeni oi ese hereva do oi gwauraia hedinarai mai goada danu, bona taunimanima ibounai ese oi dekenai do idia kamonai. Unai neganai do idia diba lau be Lohiabada.”