1 Tau ta ladana be Korenelio, Kaisarea hanua dekenai ia noho, ia be tuari biaguna, kapena ta, tuari orea ladana Italia dekenai. 2 Ia be Dirava badinaia tauna, ia bona iena ruma bese taudia ibounai Dirava dekenai idia gari. Ia danu Iuda ogogami taudia dekenai harihari gaudia momo ia henia, bona nega ibounai Dirava dekenai ia guriguri. 3 Adorahi ta, hora gauna 3 okaloka bamona ia mata hanai, Dirava ena aneru ia itaia, ia dekenai ia mai, bona ia gwau, “Korenelio e!”

4 Korenelio ese aneru ia itaia mai gari bada danu, ia gwau, “Lohiabada e, dahaka?”

Aneru ia itaia noho, ia gwau, “Oiemu guriguri bona oiemu harihari gaudia be Dirava dekenai idia daekau vadaeni, bona Dirava ese danu oi ia laloa noho. 5 Harihari tatau haida Iopa dekenai oi siaia lao, idia ese Simona, ena ladana ta be Petero, do idia boiria mai. 6 Ia be Simona, boromakau kopina ia gaukara tauna danu idia noho, ena ruma be kone dekenai.”

7 Ia dekenai ia hereva aneru ese ia rakatania neganai, Korenelio ese iena hesiai mero rua ia boiboi idia mai, bona tuari tauna ta danu, Dirava badinaia bona nega ibounai Korenelio ena hesiai gaukara ia karaia tauna ta. 8 Hereva ibounai idia toiosi dekenai Korenelio ese ia hamaoroa, gabeai ia siaia, idia lao Iopa dekenai.

9 Kerukeru, dala dekenai idia lao, bona Iopa kahirakahira idia ginidae. Dina tubua neganai, Petero be ruma ena guhi ataiai kahana dekenai ia daekau, guriguri totona. 10 Vadaeni, ia hitolo, bona ia ura aniani. To aniani idia karaia neganai, ia mata hanai. 11 Bona ia itaia, guba ia kehoa, bona gau ta, dabua bada herea bamona, iena daiguni 4 dekena amo ia diho mai tanobada dekenai. 12 Inai gau lalonai be mauri gaudia idauidau ibounai idia noho, raka gaudia, gaigai bamona gaudia, bona ataiai idia roho manudia danu. 13 Bona gado ta ia dekenai ia hereva, ia gwau, “Petero e, oi toreisi, oi alaia oi ania.”

14 To Petero ia gwau, “Lohiabada e, lasi momokani, badina lau be miro gaudia bona mai helaga gaudia lau ania diba lasi.”

15 Gado ese ma Petero dekenai ia hereva lou, ia gwau, “Dirava ese ia hagoevaia vadaeni gaudia, oi gwauraia lasi miro.” 16 Nega toi inai bamona ia vara murinai, inai dabua badana ia daekau lou haraga, guba dekenai.

17 Bona Petero ia laloa momo inai mata hanai ena anina be dahaka. Inai bamona ia laloa noho neganai, Korenelio ena hesiai taudia idia mai, Simona ena ruma idia tahua, bona idia gini noho iduara dekenai. 18 Idia boiboi, idia gwau, “Simona, ena ladana ta be Petero ia noho iniseni o lasi?”

19 Petero be unai mata hanai dekenai ia itaia gaudia ia laloa noho nega lalonai, Lauma ese ia dekenai ia gwau, “Tatau toi idia tahua oi. 20 Oi toreisi, oi diho, idia danu oi lao, oi daradara lasi, badina be lau ese idia lau siaia.”

21 Petero ia diho tatau toi dekenai, bona ia gwau, “Umui tahua tauna be lau, dahaka totona umui mai?”

22 Idia haere, idia gwau, “Korenelio, tuari taudia edia kapena, ia be kara maoromaoro bona Dirava dekenai gari tauna. Iuda taudia ibounai idia gwau ia be tau namona. Aneru helagana ta ese Dirava ena hereva Korenelio dekenai ia hamaoroa, ia gwau, ‘Oi ese Petero do oi boiria mai oiemu ruma dekenai, bona iena hereva do oi kamonai.’ ”

23 Vadaeni, Petero ese unai tau toiosi ia hakaua vareai iena ruma lalonai, unai hanuaboi unuseni idia mahuta.

Dabai Petero ia toreisi, idia danu ia lao, bona varavara haida Iopa dekena amo ia danu idia lao. 24 Kerukeru Kaisarea hanua dekenai idia ginidae. Korenelio ese iena ruma dekenai Petero ena ginidae ia naria noho, bona iena varavara, bona iena turana korikori taudia ia boiria, idia hebou noho. 25 Petero ia raka vareai noho neganai, Korenelio ese ia danu idia hedavari, bona Petero ena aena badinai ia moru diho, ia tomadiho henia. 26 To Petero ese ia veria isi, ia gwau, “Oi toreisi, lau danu taunimanima.” 27 Bona ia raka vareai, Korenelio danu ia herevahereva, bona hebou taudia momo ia davaridia.

28 Vadaeni Petero ese idia dekenai ia hereva, ia gwau, “Umui diba Iuda taudia be idau bese taudia danu idia noho hebou o vadivadi hebou be mai taravatu. To Dirava ese lau dekenai ia hadibaia, tau ta lau gwauraia lasi ia be miro o dika. 29 Unai dainai umui boiboi neganai, mai laloa namo lau mai, lau noho siri lasi. Bona hari lau nanadaia, badina dahaka umui boiboi lau dekenai?”

30 Korenelio ia gwau, “Dina 4 ia lao vadaeni, adorahi 3 okaloka bamona egu ruma lalonai lau guriguri noho, inai hari hora bamona. Bona tau ta lauegu vairana dekenai ia gini, iena dabua be kurokuro momokani. 31 Ia gwau, ‘Korenelio e, oiemu guriguri be Dirava ese ia kamonai vadaeni, bona oiemu harihari gaudia be Dirava ese ia laloa noho. 32 Unai dainai hereva oi siaia lao Iopa dekenai, Simona, ena ladana Petero oi boiria. Ia be Simona, boromakau kopina gaukara tauna ena ruma dekenai ia noho, kone dekenai.’ 33 Vadaeni karaharaga hereva lau siaia oi dekenai, bona oi mai dainai lau tanikiu henia. Hari ai ibounai be Dirava ena vairanai iniseni ai hebou, gau ibounai Dirava ia hadibaia oi dekenai, do ai kamonai totona.”

34 Vadaeni Petero ese iena hereva ia matamaia, ia gwau, “Hari lau diba momokani Dirava ese taunimanima edia toana ia laloa lasi. 35 To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae. 36 Dirava ese iena hereva ia siaia Israela taudia dekenai umui diba vadaeni. Ia ese maino ena Sivarai Namona ia gwauraia Iesu Keriso dekena amo, taunimanima ibounai edia Lohiabada. Inai Iesu ese ita bona Dirava huanai maino dalana ia karaia vadaeni. 37 Umui diba danu, unai hereva Galilea dekenai idia gwauraia hamatamaia, ia lao bona Iudea kahana ibounai, Ioane ese ia harorolaia bapatiso murinai. 38 Inai hereva be Iesu, Nasareta tauna, ena hereva. Dirava ese iena Lauma Helaga dekena amo Iesu ia hasiahua, bona ia lao gabu idauidau, kara namodia ia karaia, bona ia ese Diabolo ia hadikaia taudia ibounai ia hanamodia, badina be Dirava ia noho ia dekenai. 39 Vadaeni, ai be hereva gwauraia hedinarai taudia, gau ibounai ia karaia dekenai, Iudea tano ibounai dekenai, bona Ierusalema lalonai. Idia ese au ena latanai idia taua dae, idia alaia mase. 40 To Dirava ese Iesu ia hatorea isi dina ihatoina dekenai, bona taunimanima dekenai ia hedinaraia. 41 Taunimanima ibounai dekenai ia hedinaraia lasi, to ai sibona dekenai, badina be Dirava ese ai ia abia hidi guna, hereva do ai gwauraia hedinarai totona. Mase dekena amo ia toreisi lou murinai, ai be Iesu danu ai aniani bona inuinu. 42 Ai dekenai ia hadibaia, taunimanima ibounai dekenai do ai haroro, bona do ai gwauraia hedinarai, Dirava ese inai Tau ia abia hidi vadaeni, mauri taudia bona mase taudia edia kota biaguna gaukara do ia karaia totona. 43 Peroveta taudia ibounai ese Iesu idia gwauraia hedinarai vadaeni, idia gwau, ‘Ia dekenai idia abidadama henia taudia ibounai edia kara dika be do idia gwauatao, iena ladana dainai.’ ”

44 Petero ia hereva noho neganai, Lauma Helaga ese hereva idia kamonai taudia ibounai dekenai ia diho. 45 Iuda taudia, Iesu idia abidadama henia bona Petero idia bamoa taudia, be idia hoa, badina be Lauma Helaga ese idau bese taudia dekenai ia diho dainai. 46 Badina be, idia kamonai be, gado idauidau dekenai idia hereva, bona Dirava idia hanamoa noho. Bona Petero ia gwau, 47 “Daika ese ranu dekenai taravatu do ia atoa, inai taudia bapatiso idia abia lasi? Lauma Helaga idia abia vadaeni, ita abia hegeregerena.” 48 Bona idia dekenai ia hereva, ia gwau, “Iesu Keriso ena ladana dekenai bapatiso do umui abia.” Inai murinai idia ese Petero idia noia, idia dekenai do ia noho dina haida.