1 Unai neganai, Iesu ena diba tahua taudia idia momo daekau. Bona Helene gado idia hereva Iuda taudia, ese Heberu gado idia hereva Iuda taudia dekenai idia maumau. Idia gwau, “Dina ibounai, aniani idia haria neganai, aiemai vabu dekenai umui henia hegeregere lasi.” 2 Inai dainai aposetolo ese diba tahua taudia ibounai idia boiridia hebou, idia gwau, “Ia namo lasi Dirava ena hereva haroro gaukara ita hadokoa, aniani haria gaukara karaia totona. 3 Aiemai varavara e, umui emui huanai tatau 7 umui abia hidi, ladana namo taudia, Lauma Helaga bona aonega dekenai idia honu taudia, idia dekenai inai gaukara do ita henia. 4 To ai be guriguri bona haroro do ai goada karaia noho.”

5 Inai hereva be ibounai idia abia dae, bona haida idia abia hidi, Stefano, abidadama bada bona Lauma Helaga dekenai ia honu tauna, bona Filipo, bona Prokoro, bona Nikanoro, bona Timona, bona Pamena, bona Nikolao, ia be Antioka tauna, Iuda tauna dekenai idia halaoa. 6 Inai taudia idia haginia aposetolo edia vairanai, bona aposetolo idia guriguri murinai, idia edia imana idia atoa edia latanai.

7 Bona Dirava ena hereva ia bada daekau, bona diba tahua taudia idia momo daekau Ierusalema dekenai, bona hahelagaia taudia momo danu ese Iesu ena dala idia abia dae.

8 Stefano be abidadama bona siahu dekenai ia honu, bona ia ese hoa kara bona toa kara badadia taunimanima edia vairanai ia karaia. 9 To dubu orea ta ena ladana be “Ruhaia Taudia,” ena taudia haida, bona Kurene bona Alesandria bona Kilikia bona Asia taudia haida, ese Stefano danu idia hepapahuahu. 10 To idia be hegeregere lasi Stefano idia koua, badina be ia hereva neganai, Lauma Helaga ese aonega bada ia henia dainai. 11 Inai taudia ese haida ma idia abia, edia lalona idia ania, bona idia gwau, “Ai ese iena hereva dikana ai kamonai. Stefano ese Mose bona Dirava danu edia ladana ia hadikaia.” 12 Inai dala dekenai idia ese hanua taudia bona tau badadia bona taravatu hadibaia taudia idia habadua, bona Stefano dekenai idia heau lao, idia dogoatao, bona kaunsolo taudia vairanai idia abia lao. 13 Unuseni samania koikoi taudia idia haginia, idia gwau. “Inai tau be nega ibounai iena hereva dekenai inai Dubu Helaga bona Mose ena taravatu ia hadikaia. 14 Ai danu iena hereva ai kamonai, ia gwau Iesu, Nasareta tauna ese inai Dubu Helaga do ia kokia, bona Mose ese ai dekenai ia henia karadia do ia haidaua.” 15 Bona kaunsolo lalonai idia helai taudia ibounai ese Stefano ena vairana idia itaia noho neganai, iena vairana be aneru ta ena vairana hegeregerena.