1 Isiboseta, Saulo ena natuna ese sivarai ia kamonai Abinere ia mase neganai, ia gari bada herea. Bona Israela taudia ibounai danu idia hoa mai gari danu.

2 Isiboseta be mai ena tuari orea maragidia biagudia rua, edia ladana be Banaha bona Rekaba. Idia ruaosi be Rimono, Beroto tauna ena natuna. Inai Beroto hanua be Beniamina iduhu ena hanua ta. 3 Beroto taudia be guna idia heau, Gitaimi dekenai idia lao, bona unuseni idia noho ia mai bona hari.

4 Saulo ena tubuna ta danu be Ionatana ena natuna tau, Mepiboseta. Saulo bona Ionatana be tuari dekenai idia mase neganai, Mepiboseta ena mauri lagani be 5 sibona. Edia mase sivarai be Ieserele dekena amo ia ginidae neganai, Mepiboseta ia naria hahine ese Mepiboseta ia abia isi bona ia heau. To ia heau haraga dainai, ia ese mero ia hamorua, bona madi mero ena aena idia dika.

5 Vadaeni inai Banaha bona Rekaba, Beroto tauna, Rimono ena natuna ruaosi be Isiboseta ena ruma dekenai idia lao. Dina tubua dekenai, Isiboseta ese iena laga-ani ia abia neganai, iena ruma dekenai idia ginidae. 6 Iduara ia naria hahine ese uiti ia hagoevaia gaukara ia karaia dainai, iena matana idia metau, vadaeni ia mahuta. Unai dainai Rekaba bona iena tadina Banaha, be hunia dekenai ruma idia raka vareai.

7 Ruma lalonai idia itaia, Isiboseta be iena mahuta daiutu dekenai ia mahuta noho. Vadaeni idia ese Isiboseta idia gwadaia mase. Idia ese iena kwarana idia utua oho. Vadaeni iena kwarana idia abia, bona unai hanuaboi lalonai Arabaha tano idia raka hanaia.

8 Idia ese Isiboseta ena kwarana be Davida dekenai idia henia, Heberona hanua dekenai. Idia gwau, “Oi dekenai ia dagedage henia, bona oi ia alaia gwauraia tauna Saulo, ena natuna Isiboseta, ena kwarana be inai. King badana e, hari dina Lohiabada ese Saulo bona iena bese taudia edia kerere davana ia henia vadaeni.”

9 To Davida ese Rekaba bona iena tadina Banaha dekenai ia haere, ia gwau, “Ia mauri noho Lohiabada, dika ibounai dekena amo lau ia hamauria Dirava ena ladana dekenai lau hereva momokani inai: 10 Hereva gwauraia tauna ta be lau dekenai ia mai Sikilaga dekenai, bona ia laloa lau totona sivarai namona ia mailaia, ia gwau, ‘Saulo be ia mase vadaeni.’ To unai tau lau dogoatao, bona lau oda dainai, unai tau idia hamasea. Iena sivarai ena davana be unai bamona lau henia. 11 Bona hari umui ruaosi ese iena ruma dekenai tau ta ia mahuta neganai umui alaia mase! Umui be tau dikadia momokani, bona umui laloa emui kerere davana do lau henia lasi, a? Lasi momokani. Umui do lau alaia mase!”

12 Vadaeni Davida ese iena tuari taudia dekenai ia oda henia, bona idia ese Rekaba bona Banaha ruaosi idia alaia mase, bona edia imana bona aena idia utua oho. Edia tauanina be Heberona ena gohu maragina ena badibadinai idia taua dae. To Isiboseta ena kwarana idia abia, Abinere ena guria gabuna lalonai idia guria, Heberona dekenai.