1 Satani ese Israela taudia hadikaia dalana ia tahua, vadaeni ia ese Davida ia koia, Israela taudia be hida, be Davida ese do ia duahia gwauraia. 2  Vadaeni Davida ese Ioaba bona iena tuari biagudia ia hamaoroa, ia gwau, “Israela ena kahana ibounai do umui lao, Dano dekena amo ela bona Bere Sieba, bona taunimanima ibounai do umui duahia, do lau diba iseda bese be hida.”

3 To Ioaba ese king ia hamaoroa, ia gwau, “Lohiabada ese iena bese be nega 100 dekena amo edia namba ia habadaia diba, bona inai be lau ura. To egu lohia bona egu king e, idia ibounai be oiemu hesiai taudia, ani? Badina dahaka oi ura inai kara do oi karaia? Egu lohia e, badina dahaka inai kara dekena amo Israela besena ibounai do oi hakererea?”

4 To king Davida ese Ioaba ena hereva ia koua. Unai dainai Ioaba ia toreisi, Israela ena tano ibounai ia raka hanaia, vadaeni Ierusalema dekenai ia giroa mai. 5 Vadaeni Ioaba ese taunimanima duahia gaukara ena ripoti be king Davida dekenai ia henia, gauna inai: Israela be mai edia tuari diba taudia 1,100,000, bona Iuda dekenai tuari diba taudia be 470,000.

6 To Ioaba ese Levi taudia bona Beniamina taudia ia duahia lasi, badina be king ena oda be Ioaba ia ura lasi.

7 Dirava ese inai duahia kara dekenai ia badu, vadaeni ia ese Israela ia hisihisi henia. 8 Vadaeni Davida ese Dirava ia hamaoroa, ia gwau, “Inai duahia gaukara dekena amo kara dika bada herea lau karaia vadaeni! Lohiabada e, oi dekenai lau noinoi, egu kara dika do oi gwauatao, badina unai kara dekenai lau be kavakava momokani.”

9 Vadaeni Lohiabada ese Gadi, Davida ena peroveta tauna ia hamaoroa, ia gwau, 10 “Oi lao, Davida do oi hamaoroa, oi gwau, ‘Lohiabada be inai bamona ia hereva: Gau toi be oiemu vairanai lau atoa, tamona do oi abia hidi, bona unai gauna be do lau havaraia.’ ”

11 Vadaeni Gadi be Davida dekenai ia lao, Lohiabada ena hereva gauna ia hamaoroa, bona ia gwau, “Inai gau toi be edena oi ura? 12 Lagani toi lalonai hitolo ese oiemu tano do ia hadikaia? O, hua toi lalonai taunimanima ese oi do idia tuari henia, bona idia dekena amo do oi heau noho? O, dina toi lalonai Lohiabada ena tuari kaia, unai anina be, hanaia gorere dikana, be oiemu tano ena taunimanima do ia hadikaia? Unai be Lohiabada ena aneru ese Israela tano ibounai lalonai mase do ia havaraia. Inai gau toi do oi laloa, bona idia ta do oi abia hidi, vadaeni Lohiabada dekenai oiemu haere do lau henia.”

13 Davida ese Gadi dekenai ia haere, ia gwau, “Lauegu lalona ia hisihisi bada herea momokani, to lau laloa Lohiabada ena bogahisihisi be bada. Unai dainai Lohiabada ese lau ia panisia be namo, to taunimanima ese lau idia panisia be dika.”

14 Unai dainai Lohiabada ese Israela taudia edia latanai hanaia gorere ia siaia, bona taunimanima ibounai 70,000 idia mase. 15 Vadaeni Dirava ese aneru ia siaia lao, Ierusalema do ia hadikaia ore totona, to aneru ese kahirakahira ia karaia neganai, Lohiabada ese iena lalona ia giroa, bona taunimanima alaia aneruna ia hamaoroa, ia gwau, “Vadaeni, oiemu kara oi hadokoa.”

Unai neganai unai aneru be uiti kwadia gabuna ena badibadinai ia gini noho. Unai uiti kwadia gabuna be Arauna, Iebusu tauna, ena.

16 Davida ese iena matana ataiai dekenai ia negea, Lohiabada ena aneru ia itaia, tanobada bona guba edia huanai ia gini noho, iena imana dekenai tuari kaia be Ierusalema ena ataiai ia duduia. Vadaeni Davida bona hanua tau badadia ese puse dabua idia atoa, idia tui diho, bona tano dekenai edia vairadia idia atoa.

17 Davida ese ia guriguri, ia gwau, “Dirava e, lau sibona ese oda lau gwauraia, taunimanima be hida do idia duahia totona. Lau sibona ese kara dika lau karaia, bona lau sibona be lau kerere. To inai taunimanima be madi dahaka kerere idia karaia? Idia be mamoe sibona bamona. Lohiabada, egu Dirava e, oi ese lau, bona lauegu bese sibona do oi panisia be namo, to mani emu kara inai hanaia gorere be oiemu bese taudia dekena amo do oi hadokoa.”

18 Vadaeni Lohiabada ena aneru ese Gadi ia oda henia, ia ese Davida do ia hamaoroa, Davida be do ia lao, Lohiabada ena boubou patana ta Arauna ena uiti kwadia gabuna dekenai do ia haginia. 19 Unai dainai Davida ia lao, Lohiabada ena oda, Gadi ena hereva dekenai gauna hegeregerena.

20 Unai neganai Arauna be uiti ia kwadia noho. Vadaeni iena kwarana ia giroa neganai ia ese aneru ia itaia. Arauna ena natuna tau 4 ese aneru idia itaia neganai idia heau, bona gabu ta dekenai idia hunia.

21 Davida be Arauna dekenai ia lao neganai, Arauna ese iena matana ia negea, Davida ia itaia, vadaeni uiti kwadia gabuna dekena amo ia raka mai, tano dekenai iena vairana ia atoa, Davida ena vairana dekenai ia tomadiho. 22 Davida ese ia dekenai ia hereva, ia gwau, “Oiemu uiti kwadia gabuna lau dekenai mani do oi hoia, vadaeni lau ese Lohiabada ena boubou patana ta do lau haginia, hanaia gorere be taunimanima dekena amo do ia doko totona. Lau ese inai oiemu gabu totona ena davana korikori oi dekenai do lau henia.”

23 Vadaeni Arauna ese Davida ia haere henia, ia gwau, “Egu lohia bona egu king e, oi abia, bona do oi gaukaralaia oiemu ura hegeregerena. Boromakau tau idia noho inai, gabua boubou totona gaudia, bona uiti kokia audia be lahi audia totona do oi abia. Uiti danu ia noho, boubou totona do oi henia. King e, lau Arauna ese inai gau ibounai be oi dekenai lau henia inai, davana lasi.”

24 To king Davida ese Arauna dekenai ia haere, ia gwau, “Lasi, lau be do lau abia kava lasi, inai gabu be oiemu dainai, ena davana korikori oi dekenai do lau henia. Badina lau ura lasi lau dekenai ia mai kava gauna ta Lohiabada dekenai do lau henia, boubou gauna totona.”

25 Vadaeni Davida ese uiti kwadia gabuna bona boromakau tau ia hoia, edia davana ia henia, golo moni 600.

26 Davida ese boubou patana ta unuseni ia haginia, Lohiabada ena. Bona gabua bouboudia bona maino karaia bouboudia Lohiabada dekenai ia henia. Davida be ia guriguri, bona Lohiabada ese guba dekena amo lahi ia siaia, unai boubou ia gabua ore. Unai dekena amo Lohiabada ese Davida ena guriguri dekenai ia haere.

27 Vadaeni Lohiabada ese unai aneru ia oda henia, bona aneru ese iena tuari kaia be ena udaia gauna dekenai ma ia atoa vareai.

28 Unai neganai Davida ese ia itaia, Lohiabada ese iena guriguri ia haere henia vadaeni. Unai dainai Davida ese unai Iebusu tauna Arauna ena uiti kwadia gabuna dekenai, boubou patana dekenai, boubou gaudia ia henia. 29 Unai neganai Lohiabada ena Palai Dubu, Mose ese tano kaukau dekenai ia karaia gauna, bona boubou patana be ataiai gabuna, Gibeona dekenai idia noho. 30 To Davida be mai ena dala lasi Gibeona do ia lao, Lohiabada tomadiho henia totona, badina be ia ese Lohiabada ena aneru ena tuari kaia dekenai ia gari bada.