1 Beniamina iduhu tauna ta ena ladana be Kisa. Ia be Abiele ena natuna. Abiele be Seroro ena natuna. Seroro be, Bekorata ena natuna. Bekorata be Apia ena natuna. Inai Kisa be Beniamina ena iduhu tauna, bona ia be mai kohu momo. 2 Kisa be mai ena natuna tau ta, iena ladana be Saulo. Ia be toana namo tauna, Israela taudia ibounai be ia ese idia ia hereaia. Iena lata danu ese idia edia lata ia hanaia, edia kwarana be iena pagana danu hegeregere.

3 Saulo ena tamana Kisa ena doniki idia boio. Unai dainai Kisa ese iena natuna Saulo ia hamaoroa, ia gwau, “Hesiai tauna ta do oi abia, ia ese oi danu do ia lao, vadaeni umui ruaosi do umui toreisi, doniki do umui tahua.”

4 Vadaeni idia ese Eparaima ena ororo bona Salisa tano idia raka hanaia, to doniki idia davaria lasi. Salima tano danu idia raka hanaia, to doniki be lasi. Unai murinai Beniamina tano idia raka hanaia, to idia davaria lasi.

5 Idia be Supu tano dekenai idia ginidae, vadaeni Saulo ese iena hesiai tauna, ia danu ia raka tauna ia hamaoroa, ia gwau, “Mani egu tamana dekenai ita giroa lou. Ia be doniki totona ia laloa, to inai bamona laloa do ia hadokoa, bona ita totona do ia laloa momo garina, harihari do ita giroa lou.”

6 To hesiai tauna ia gwau, “Oi itaia, Dirava ena tau ta inai hanua dekenai ia noho. Ia be taunimanima ese idia matauraia, bona iena hereva ibounai be edia anina idia vara momokani. Mani unai tau dekenai ita lao. Sedira ia ese doniki idia noho gabuna ita dekenai do ia hadibaia.”

7 Saulo ese iena hesiai tauna ia nanadaia, ia gwau, “To bema unai tau dekenai ita lao neganai, dahaka harihari gauna do ita henia? Iseda aniani be ia ore vadaeni. Ita be harihari gauna ta lasi unai Dirava ena tau dekenai henia totona. Ita dekenai dahaka gau ia noho?”

8 Hesiai tauna ese Saulo dekenai ia haere, ia gwau, “Siliva ena kahana maragina ta be inai, lau dekenai. Lau ese Dirava ena tau dekenai do lau henia, vadaeni ia ese iseda dala do ia hadibaia.”

9 Gunaguna Israela dekenai, bema tau ta ia ura gau ta Dirava ia nanadaia neganai, ia be inai bamona do ia gwau, “Oi mai, mata hanai tauna dekenai ita lao.” Badina be hari idia gwauraia “peroveta” tauna, be gunaguna “mata hanai” tauna idia gwauraia.

10 Vadaeni Saulo ese iena hesiai tauna ia hamaoroa, ia gwau, “Oiemu hereva ia namo, mani ita lao.” Vadaeni idia ese idia herevalaia Dirava ena tau ia noho hanua dekenai idia lao.

11 Ororo dekenai idia daekau, vadaeni idia ese kekeni haida danu idia hedavari. Unai kekeni be ranu utua totona idia raka lao. Vadaeni idia ese kekeni idia nanadaia, idia gwau, “Mata hanai tauna be iniseni ia noho, a?”

12-13 Kekeni idia haere, idia gwau, “Io, umui itaia, ia be umui emui vairana dekenai ia raka noho. Umui raka haraga, ia be hari sibona hanua dekenai ia raka vareai, badina be hanua taudia be hari dina dekenai boubou karana do idia karaia ataiai dekenai, boubou patana helagana ena latanai. Ataiai boubou gabuna dekenai taunimanima idia do aniani lasi neganai, unai tau ese boubou gaudia do ia hanamoa guna. Do umui raka haraga, bona ataiai ia do daekau lasi neganai do umui davaria.”

14 Unai dainai Saulo bona iena hesiai tauna be hanua dekenai idia daekau lao. Hanua lalonai idia raka vareai neganai, idia ese Samuela idia itaia, idia dekenai ia raka mai noho, tomadiho gabuna dekenai do ia lao totona.

15 Saulo be Samuela dekenai ia do ginidae lasi dina dekenai, Lohiabada ese Samuela dekenai ia hedinarai, ia hereva henia, ia gwau, 16 “Kerukeru, nega inai bamona neganai, lau ese Beniamina iduhu tauna ta oi dekenai do lau siaia. Vadaeni oi ese unai tau ena latanai olive dehoro do oi bubua, ia be lauegu bese Israela edia gunalaia tauna. Ia ese lauegu bese Pilistia taudia edia siahu dekena amo do ia hamauria, badina be lauegu bese taudia edia hisihisi lau itaia vadaeni, bona edia taitai lau dekenai ia daekau vadaeni.”

17 Vadaeni Samuela ese Saulo ia itaia neganai, Lohiabada ese ia dekenai ia hereva, ia gwau, “Lau gwauraia tauna be inai, ia ese lauegu bese do ia gunalaia.”

18 Saulo ese Samuela kahirakahira ia raka lao, hanua ena ikoukou dekenai, ia gwau, “Mani emu kara, lau ura diba mata hanai tauna ena ruma be edeseni?”

19 Samuela ese Saulo ia haere henia, ia gwau, “Mata hanai tauna be lau inai, lauegu vairana dekenai do oi raka guna, ataiai gabuna dekenai do oi raka daekau. Hari dina dekenai, ita ruaosi do ita aniani hebou, bona kerukeru dabai oi do lau ruhaia. Unai neganai oiemu henanadai gaudia ibounai edia anina do lau hedinaraia. 20 To oiemu doniki, dina toi lalonai idia boio gaudia do oi laloa lasi, badina unai be idia davaria vadaeni. To daika tauna be Israela taudia ese idia ura henia bada noho? Tauna be oi, ani? Bona oiemu tamana ena famili taudia, ani?”

21 Saulo ia haere, ia gwau, “Be, lau be Beniamina iduhu tauna, iduhu maragi herea Israela besena ena huanai, bona lauegu famili be maragi herea, Beniamina iduhu lalonai. Badina dahaka inai bamona lau dekenai oi hereva noho?”

22 Vadaeni Samuela ese Saulo mai ena hesiai tauna danu aniani daiutu dekenai ia hakaudia vareai, bona helai gabudia namo herea idia dekenai ia henia, idia helai, idia boiria taudia ibounai edia vairanai. Idia ibounai be taunimanima 30 bamona. 23 Vadaeni Samuela ese aniani nadua tauna ia hereva henia, ia gwau, “Oi dekenai lau henia vamu, lau gwau, ‘Oi atoa siri,’ gauna do oi mailaia.”

24 Vadaeni aniani nadua tauna ese vamu, aena namo herea ta Saulo dekenai ia henia. Samuela ia gwau, “Oi itaia, idia atoa siri gauna be oiemu vairana dekenai lau atoa inai. Do oi ania, badina be oiemu abia hidi nega laloa totona inai aria lau karaia, bona idia boiria taudia danu do umui aniani hebou totona.” Unai bamona be Saulo bona Samuela idia aniani hebou unai dina dekenai.

25 Ataiai gabuna dekena amo idia diho, bona hanua lalonai idia raka vareai, vadaeni Saulo ena mahuta gabuna idia abia hegaegae, ataiai daiutuna dekenai. 26 Unuseni ia hekure diho, ia mahuta.

Daba rere neganai Samuela ese Saulo ia boiria, ataiai daiutuna dekenai, ia gwau, “Oi toreisi, oi do lau siaia, oiemu dala dekenai do oi lao.” Vadaeni Saulo ia toreisi, Samuela danu ia diho, hanua ena ariara dekenai idia raka lao.

27 Idia be hanua ena murimuri dekenai idia raka lao, vadaeni Samuela ese Saulo ia hamaoroa, ia gwau, “Oiemu hesiai tauna do oi hamaoroa, ia be iseda vairanai do ia raka guna.” Vadaeni, hesiai tauna unai bamona ia karaia. Samuela ma Saulo ia hamaoroa, ia gwau, “To oi be iniseni do oi noho, nega sisina, Dirava ena hereva be oi dekenai do lau hedinaraia.”