परमेश्‍वरए मिं क्वेबर प्रिंबै भजनमैं नेरो प्राथनामैं स्योंम्बै ल्हें म्हिमैंइ चु कितबर प्ह्रिइमुँ। छले इस्राएलीमैंइ परमेश्‍वरए मिं क्वेबै त्हेर चु ताँमैं लमल। लिउँइ चमैंइ चु पबित्र भजनमैं नेरो प्राथनामैं खेंमैंए छ्वेर कोंइ।

भजनमैंए कितबर ल्हें खालर्बै भजनमैं मुँ। कोइ परमेश्‍वरए मिं क्वेबै भजनमैं, कोइ परमेश्‍वरउँइँले आशिक योंबै ल्हागिर लबै प्राथनामैं, कोइ आशिकए ल्हागिर परमेश्‍वरलाइ धन्यबाद पिंबै ताँ, कोइ के न्होंवामा क्षेमा ह्रिबै ताँ, कोइ शत्तुरमैंलाइ दण्ड पिंन् बिसि लबै प्राथना मुँ। चुर मुँबै प्राथनामैं ह्रोंसए ल्हागिर मत्‍त्रे आङिं, ह्‍युलर मुँबै ताँन् म्हिमैंए ल्हागिर केर फेम्। चु भजनमैं कोइर म्हिए सैं न्होंरबै ताँमैं मुँ, कोइर परमेश्‍वरए फिर बिश्‍वास लबै ताँन् म्हिमैंए सैंर्बै ताँमैं मुँ।

यशू ख्रीष्‍टजी म्हिमैंलाइ लोमिंमा चु कितबर्बै ताँमैं पोंइ। धै “छारा बाछा” न्होंर्बै कितबमैं प्ह्रिबै म्हिमैंइ चु भजनमैंए कितबर्बै ताँमैं पोंइ। छले ओंसों ओंनोन येशू ख्रीष्‍टए फिर बिश्‍वास लब्मैंए छ्हर चु भजनमैंए कितब बेल्‍ले केर त्हुबै पबित्र छ्वे तइ।

चु कितबर को-कोइ ताँफुँमैं स्यो स्यो मुँलेया चमैंए अर्थ घ्रिन् मुँ:

चु कितबर्बै भजनमैंने हिब्रू क्युइर कोइने “क्वे”, कोइने “भजन” बिम्। “भजन” ह्राबै सैमैं ह्रासि प्रिंबै क्वे ग; “क्वे” बिब ह्राबै सैं मुँलै तम् आरेलै तम्।