10
Yeisu ina livalakaibala sipi,
totom, be sipi ana tomatakavata manudi
totom, be sipi ana tomatakavata manudi
1 Tuwaina Yeisu idigo kana,
‘Moe nakae, tauna ame alatuuwokoimi konōve: Avatau neta sipi adi kali ana kaba siu goi geya isiuta, go sem ali toluyena goi imweratáwana, amo tauyana tovaináwana be tobugoyo. 2 Go avatau neta aba siu goi isiu moe sipi adi torugwáuta. 3 Ame tauyana manuna totom ana tomatakavata sipi idi kali ana kaba siu ikatupáeve. Sipi ana torugwautayana toinina ina sipiyao niyana sikinane; tauyana yoidi tamo tamo ivaatoidi iduuduwedi simamaima be ivaakededi siisowóduwo. 4 Tutayana toinina ina sipiyao bogina ikaiwoduwedi, ivakededi. Niyana siiyagoi, tauna sisabookuliye. 5 E kidi go ituli ta tomota niyana geya siyagoiyeta, tauna geya sisabookuliye, go sem siisiyae.’
6 E ame livalakaibalayana Yeisu ilatuwokoidi go, tauyadi geya siyagoiyeta kaga idigedige.
7 E tuwo Yeisuyana aiyuwoina idigomna kana,
‘Kaga adige moe moitamo go, ame alatuuwokoimi konōve: Yau sipi adi kaba siu. 8 Kidi torugwauta polapola boi sivaakumgo madabokidi tovaináwana be tobugoyo go, niyadi kidi sipiyadi geya sinoveyeta.
9 Yau aliyana ana kaba siu. Avatauwa neta yau goi sisiu, bei adi yava sibabane. Tauyadi itoboinedi bei sisiu be nakae sisowóduwo sina avadi dedevina sibabane. 10 Iya go tovaináwana ina guinuwa tauna ame nakae: Ima bego ivaináwana be ikaumata be ibugoyo. Yau ama bego tomota yawoidi vau sibabane go, yawoidiyadi kayaaodaidi.
11 Yau Tauyagu sipi adi torugwáuta dedevina. Torugwáuta dedevina yawoina bei ikasale ina sipiyao manudi. 12 Topaisewa iya geya moitamo torugwáuta geya. Tauyana geya toni sipi geya, tauna neta weiniya woliwoli tayamo igite imamaima, sipi ikalavedi go, isiyamo. Tuwo weiniyayana ima sipiyadi maniyedi ikatupedi go, maniyedi ikasapesapedi. 13 Sipiyadi ikalavedi isiya unana tauyana topaisewa tauna. Manudi geya inuwonuwoneta.’
14 Yeisu tuwaina kana,
‘Yau sipi adi torugwáuta dedevina. Toinigu guna sipiyao ayaagoidi, e tauyadi siyaagoigu 15 nakae Tamagu iyaagoigu, e yau Tamagu aayagoi.† Mad 11:27; Luk 10:22. Go yawoigu aakasale guna sipiyadi manudi. 16 Guna sipi maniyedi ituli sikaaiyaka. Moe tauyadi guna kali goi tuta ame geya sikaiyaketa. Itoboine akabidi amedi bei niyagu sinove be madabokidi sieboda tayamo, yau adi torugwáuta. 17 Tamagu imatakooiyegu unana ame: Yau yawoigu akasale ámasa goi bego aiyuwoina ababanemnei. 18 Geya vatau tayaamo itoboine yawoigu ikabi, go sem yau toinigu yawoigu akasale ámasa goi. Magu lovina akasale, magu lovina ababanemnei. Moe lovinayana yau Tamagu ivinigu.’
19 Yeisu ina livala pasidi Diyuu yaidi goi livisi isowoduwomna. 20 E tomota badabadaidi sidigo kadi,
‘Amo tauyana naagovaina! Tauyana iyaluwo! Kaga unana kotaaiyakeke?’
21 Go maniyedi kadi,
‘Amo livalayadi geya kada tomota naagovaina ina livala nakae geya. Dimoni geya itoboineyeta tokebo matadi ikidedevinedi!’
Yeisu Guyau, Tauyana
Yaubada Natuna, ina guinuwa tetelina
Yaubada Natuna, ina guinuwa tetelina
22 Amo tutayana Yerusalema goi áika siguinuwe; aikayana Vada Kimaasabaina ana kimavada ana nuwokavata manuna. Moe tula ana tuta. 23 Tuwo Vadayana goi Yeisu iiketoiya moe vada geya ana vabodamo yoina Solomoni ina veranda. 24 E Diyuuyadi sima Yeisu sitaoyakobu silatuwoko sidigo kadi,
‘Tuta maanawena kaatuyáwata be nakae kanuwonúwana kom manum go, nuwoma geya kulumavivisiyeta kom avatau. Neta kom moitamo Guyau, Yaubada ana Vadámana, e kulatuwokodokōima!’
25 Iya Yeisuyana kana,
‘Komi bogina alatuwokoimi go, geya konumiseguta. Guinuwayadi bogina yau Tamagu yoina goi aguinuwedi moe sitalavaitegu, tauna itoboinemi koyagoigu. 26 Go komi geya yau guna sipiyao geya, tauna geya konumiseguta. 27 Guna sipiyao niyagu sinovenove, e yau ayaagoidi, tauna sisabokuuliyegu. 28 Yau yawoidi vata aavinidi, tauna geya sikamakámasa nakae geya vatau tayaamo nimagu goi bei ivasebukoigu. 29 Liliudi Tamagu nimagu goi bogina iyatoidi. Geya vatau tayaamo itoboine Tamagu nimana goi ivasebuko unana kaga liliuna itogagasavedi. 30 Yau ma Tamagu kaspwagógana tayamo.’
31 Tuwo kidi Diyuuyadi aiyuwoina gurewa sikabidi bego Yeisu sikaumate. 32 Go iya Yeisuyana kana,
‘Guinuwa dedevidi badabadaidi Tamagu ina togaga goi aguuinuwedi bogina koogitedi go, ava guinuwa pasina gurewa goi bego kokaumategu?’
33 Go kidi Diyuuyadi kadi,
‘Geya kada im guinuwa dedevidi pasidi bego gurewa goi kakaumatem geya, go sem im digopopóita pasina. Kom tauna tomota go, bego kueyaubada!’† Vin 24:16.
34 Go iya Yeisuyana kana,
‘Manakae? Imi Gínina Kimaasabaina goi Yaubada idigo kana,
“Bogina adigo komi yaubadao”?
Same 82:6
Nakae ae? 35 Bogina tayagoi Gínina Kimaasabaina geya itoboinedeta tatavivili. E tomotayadi boi Yaubada ina livala ivinidi, iduduwedi yaubadao, 36 tauna kaga unana komi kowowokoigu kodigo kami, “Kom kudigoopopóita”, tutayana kagu, “Yau Yaubada Natuna”? Yau Tamagu ikimasabegu nakae ietunegu ama poyapoya ame goi. 37 Neta yau Tamagu ina guinuwa geya aguinuwedita, taabu konuumisēgu. 38 Go moitamo Tauyana ina guinuwa aguuinuwedi, tauna nakona guna livala pasina geya konumiseguta, moe tuwo, go sem guna guinuwa pasidi konumisēgu bego kokinane be nakae koyagoi yaigu goi Tamagu ikaaiyaka nakae Tauyana yaina goi yau akaaiyaka.’
39 E tauna kidi Diyuuyadi aiyuwoina sipoikíkina bego Yeisu siyoisi go, nimadi goi ivasiyasiya. 40 Ivasiyasiya go, ikaluvila ina sákala Iyoridani isaidámana ina bomatu dadavina goi ina asayana boi Iyoni igimisayóyova goi.† Iyo 1:28. Amoko goi ikaaiyaka. 41 Ago boda badabadaaidi simamaima Yeisu yaina unana taudiva sidigo kadi,
‘Iyoni geya tayaamo aba kinana iguinuwe go, kaga liliuna Iyoni iidigedi ame Tauyana manuna mooitamoina!’
42 Tuwo tomota badabadaidi amoko goi Tauyana sinumise.