16
Isileli tubunao sikaukuulukúluwo awoinu pasina tetelina
1 E kai Isileli tubunao madabokima kataoya, Elim kakalave, kana Sini Yoyowoina. Siniyana ikaaiyaka Elim be Sainai go, nauyayanaidi. Ame bogina tukówana tayamo ikavava be nakae maliyalina yawou ainima bogina sikavava ima sowóduwo Itipita goi mlina. 2 E Sini yoyowoina goi kakaaiyaka go, aiyuwoina Isileli tubunao madabokidi sikaukulukuluwomna Eroni be yau yaima awoinu pasina, 3 sidigo kadi,
‘Neta boi Itipita goi Yauwe nimana goi kakámasa! Amo tutayana ima kaiyaka goi anina be beredi gagaidi kakakáika gamoma! Neta amoko goi kakámasa dedevina. Moitamo. Komi komema yoyowo goi bego ame bodayama madabokima loga goi kokimatema.’
4 E Yauwe ilatuwokoigu idigo kana,
‘Kunōve. Yau yábana goi ami beredi bei aetunedi sisou kúwana nakae†a Sam 78:24. go, maliyalina tamo tamo tomotayadi sisowóduwo sina berediyadi siseoseo amo maliyalina tayamo manuna bei avakakonedi. Bei guna katukeda sikabikaone o geya?†b Iyo 6:31. 5 Maliyalina ainima tayamoina goi‡a Maliyalina ainima tayamoina goi: Ame Paraide, tauna siseo maliyalina aiyuwo manudi unana itomo moe Satade. Go Satade moe kidi Isileli tubunao adi maliyalina aba waiwasi. Sande moe idi wiki ana maliyalina vakuumgoina. tutayana sisowóduwo sina siseo, e siseo maliyalina aiyuwo manudi. Itomo moe maliyalina aba waiwasi.’‡b Aba waiwasi: Isileli tubunao niyadi goi ame livalayana moe Sabati go, Sabati ana yagoina moe waiwasi.
6 E tuwo Eroni be yau kana Isileli tubunao kalatuwokoidi kadigo kama,
‘Lavilavi goi bei koyagoi bego Yauwe kina Itipita goi ikabimi be imemi. 7 E imi kaukulukúluwo Yauwe yaina bogina inove, tauna itomo nobuyana ana káeyana bei kogite. Bogina koyagoi. Kai bego avatauwa kokaukulukúluwo yaima? Geya!’
8 Kagu,
‘Ame bei koyagoi tutayana Yauwe lavilavi goi bei ada kanina ivinida nakae nobuyana goi ada beredi ivinida, takáika bogina gamoda. Ivinida unana imi kaukulukúluwo Tauyana yaina bogina inove. Kai bego avatauwa kokaukulukúluwo yaima? Geya! Moe bego Yauwe yaina kokaukulukúluwo.’
9 Tuwo yau siyagu Eroni alatuwoko adigo kagu,
‘Isileli tubunao madabokiidi kulatuwokōidi kam,
“Kōma Yauwe matana goi. Imi kaukulukúluwo bogina inove.” ’
10 E tuwo moitamo Eroni ina Isileli tubunao madabokidi ilatuuwokoidi go, tauyadi sikandobala yoyowo goi Yauwe ana káeyana tomoéyala nakae sigite gaota sinaena goi isowóduwo, e sigite sikaliwoisa kadi, ‘Iyaa!’
11 E Yauwe ilatuwokoigu idigo kana,
12 ‘Isileli tubunao idi kaukulukúluwo bogina anove. Tuwo kulatuwokōidi kudīgo kam,
“Lavilavi goi anina bei kokakāika go, nobuyana goi beredi kokakāika gamomi. Moeko goi bei koyagoidokoigu bego Yau Yauwe imi Yaubada.” ’
13 E asa bogina lavilavi, koroita siyova sima ima tunagu sivakayaodei, e kakabidi avama. Go asa itomo, númla sigugumina ikaiyaka ima tunagu ana madabokina goi. 14 Tutayana sigugumayana iyápasa, poyapoya yatana tayamo dogoi yatana katuvaapopoina be kakaaraiina toina ikaaiyaka. 15 E Isileli tubunao sigite, sediyao silatuwokoidi sidigo kadi,
‘Amo kaga?’
Bogina koyagoi. Dogoiyana geya siyagoiyeta. Tuwo yau alatuwokoidi adigo kagu,
‘Amo ada beredi Yauwe ivinida.† Sam 78:24, 105:40; Iyo 6:31; 1Ko 10:3. 16 Ame nakae Yauwe ilovina, idigo kana,
“Tomota tamo tamo kōna kosēo nakae itoboinemi kokáika go, paseku tamo tamo kododōidi, avami nakae imi bodao imi yoyou goi avadi.” ’
17 E moitamo nakae kaguinuwe. Maniyedi kidi siseo tupwana ibadabada go, maniyedi sivakakayuwomo. 18 E sima idi paseku goi sivadodoidi sigitedi. Avatau neta iseo badabada, ikanisave, geya tayaamo ikesa. Go avatau neta ivakakayuwomo, e nakae ikáika gamona. Tauna tomota liliudi siseo nakae yoiyadi sikáika.† 2Ko 8:15.
19 E alatuwokoidi adigo kagu,
‘Geya vatau tayaamo maniyedi iyatōidi itomo manuna.’
20 Go kidi sopagu geya sikabikaoneyeta. Maniyedi siyatoidi bego itomo manuna go, niga itomo nobuyana berediyadi goi motemoteta sisowóduwo be nakae sibówana. Tuwo agitedi, gamogu igoyo. 21 Nobuyana tamo tamo kana kaseoseo yoiyama nakae kaga itoboinema kakáika. Go níyala ituko, berediyadi ivaedi, e poyapoya goi sisewaya kówasa.
22 E maliyalina ainima tayamoina goi tomota tamo tamo sina sivayuwo siseoko maliyalina aiyuwo manudi, idi paseku tamo tamo goi sivadodoidi. Ikavava, Isileli tubunao adi tomoyamoyayao liliudi sigite sitainasi, e maniyedi madi kaukulukúluwo sima yaigu sitalavaita tomota idi seo maliyalina aiyuwo manudi. 23 Go yau kagu,
‘Geya. Yauwe ilatuwokoida ame nakae: Itomo moe maliyalina aba waiwasi go, aba waiwasiyana moe kimaasabaina Yauwe umana.† Tat 20:8-11. Kaga latuwomi kokaigabu, ame kokaigābu. Kaga latuwomi kovaipolu, ame kovaipōlu, e kokāika go, kaga ikesa koyāto avami itomo manuna.’
24 Tuwo sikáika gamodi go, kaga sikesa, siyatoidi itomo manuna nakae alatuwokoidi. Go vanuwo itomo, berediyadi sigitedi, geya sibowoneta be nakae sinaena motemoteta geya sisowoduwoita. 25 E tuwo alatuwokoidi adigo kagu,
‘Ame tuta imi kuleya kokāika. Maliyalina ame moe maliyalina aba waiwasi Yauwe umana. Ame neta kōna moteo goi bego latuwomi beredi koseo, e geya kada tayaamo bei kobabane geya. 26 Maliyalina ana badabada ainima tayamo goi kōna imi beredi koseosēo go, maliyalina ainima aiyuwoina moe aba waiwasi, beredi geya.’
27 E maliyalina ainima aiyuwoina goi tomota maniyedi sina bego siseo go, sinonoina geya kada tayaamo sibabane geya. 28 E Yauwe ilatuwokoigu idigo kana,
‘Tomotayadi kulatuwokōidi kudīgo kam,
“Sivavina Yauwe ina lovina nakae ina vatulúkwana bei kokapipilavekoidi? 29 Konuwāisi bego maliyalina aba waiwasi Yauwe ivinimi. Ame pasina maliyalina ainima tayamoina goi ami beredi iivinimi moe maliyalina aiyuwo manudi. Tuwo maliyalina ainima aiyuwoina goi omi inuwa. Geya vatau tayaamo ina yoyou goi isowóduwo ina iseo.” ’
30 Tuwo maliyalina ainima aiyuwoinayana idi paisewa goi siwaiwasi.
31 E berediyadi kidi Isileli tubunao sivayou yoina mana.‡ Mana: Isileli tubunao niyadi goi ame livalayana ana taiyakeka nakae amo kaga (Tat 16:15).† Yoy 11:7-8. Manayana kutukutu giyaidi nakae go, poowouna. Beredi kakaaraiina nakae go, ana káika mokava nakae.
32 E yau alatuwokoidi adigo kagu,
‘Ame Yauwe ilovina, idigo kana,
“Beredi kosēo paseku tayamo goi kovadodōi, koyāto ikaiyaka, e bei nava tubumiyao itoboinedi sigite ava beredi goi boi avakanimi yoyowo sinaena tutayana Itipita goi akabimi, amemi.” ’
33 Tuwo siyagu Eroni alatuwoko adigo kagu,
‘Mana ma pasekuna kwābi, manayana botori goi kuvadodōi. Ikavava, Yauwe matana goi kuyāto, e bei ikaiyaka tubudao manudi.’† Ibe 9:4.
34 Tuwo moitamo Eroni ina mana ma pasekuna ikabi, botori goi ivadodoi. E niga tutayana aba vatulúkwana siwodugu ikavava, sinaena goi botoriyana idodoi nakae Yauwe ilatuwokoigu.
35 E kidi go Isileli tubunao tala ana badabada poti (40) mana sikakáika. Sikakáika ana kadókana sina poyapoya dedevina, moe asa Kenani ana túwana.† Iys 5:12.
36 Paseku yawou moe nakae bayao tayamo.
†a16:4 Sam 78:24.
‡a16:5 Maliyalina ainima tayamoina goi: Ame Paraide, tauna siseo maliyalina aiyuwo manudi unana itomo moe Satade. Go Satade moe kidi Isileli tubunao adi maliyalina aba waiwasi. Sande moe idi wiki ana maliyalina vakuumgoina.
‡b16:5 Aba waiwasi: Isileli tubunao niyadi goi ame livalayana moe Sabati go, Sabati ana yagoina moe waiwasi.
†16:15 Sam 78:24, 105:40; Iyo 6:31; 1Ko 10:3.
‡16:31 Mana: Isileli tubunao niyadi goi ame livalayana ana taiyakeka nakae amo kaga (Tat 16:15).
†16:31 Yoy 11:7-8.
†16:35 Iys 5:12.