18
Avatau toolagaina
Yaubada ina kalibúbuna goi tetelina
Yaubada ina kalibúbuna goi tetelina
(Maki 9:33-37; Luke 9:46-48, 15:3-7)
1 Tuta amo goi kai ina tovatotowanayao kama Yeisu yaina kadigo kama,
‘Yaubada ina bodayauwo liliudi ina kalibúbuna sinaena goi sikaaiyaka go, yaidi goi avatau toolagaina?’† Luk 22:24.
2 Tuwo Yeisu gómana tayamo iduduwe ima, e matama goi ivatáoe, 3 idigo kana,
‘Ame gómana tayamo go, ame alatuuwokoimi konōve: Imi sinapu kokaigavilēdi bei komalagogómana. Go geya, e geya itoboinemita Yaubada ina kalibúbuna sinaena goi kosiu.† Mak 10:15; Luk 18:17. 4 Tauna avatauwa neta sinuwotokai ame gomanayana nakae, e tauyadi toolagaidi Yaubada ina kalibúbuna sinaena goi.
5 Avatauwa neta toosobudi gómana ame nakae yau yoigu goi siiuyaone, e yau nakae siuyaaonegu. 6 Go avatauwa neta tayamo toosobuna guna tonumisayao yaidi goi sivakapusiye, e liuna gagaina toina bei sibabane. Neta gurewa gagaidi sikabidi, nukotodi goi sisikoidi go, tauyadi silavedi sisou sina négwasa dimówana goi sisou sisalili, moe liuna giiyaina, go sem Yaubada ina liuna bei gagaina.
7 O komi da poyapoya ami toovalugo unana imi kaba kapusi badabadaidi sikaaiyaka. Moitamo aba kapusi bei sisowóduwo yaimi go, avatauwa neta tovakapusi, adi toovalugo toina unana idi liuna gagaina toina bei sibabane!† Mak 9:42-47; Luk 17:1-2. 8 E, ava nímana o ava káena ami píkwana ana toyomátula, e kokūpo kokalāve. Neta ma nimakuuponimi o nakae ma kaekuuponimi go, yawoimi vata kobabane, e moe dedevina, go sem neta ma nimayuwoyuwoimi o ma kaeyuwoyuwoimi silavemi kosou yeu aiyako vaatayaina goi, e moe igoyo toina.† Mad 5:30; Mak 9:43. 9 Matami nakae. Ava mátana ami píkwana ana toyomátula, e kokipōsi kokalāve. Neta mata tayataya go, yawoimi vata kobabane, e moe dedevina, go sem neta mata yuwoyuwo sikabimi silavemi kosou asagabugabu sabeninimina goi, e moe igoyo toina.† Mad 5:29; Mak 9:47.
10 Ami dodōkana. Guna tonumisayao nuwotookaidi taabu kokubuuyevēdi. Ame alatuuwokoimi konōve: Guna tonumisayao nuwotookaidi idi aneroseyao tuta liliuna Tamagu guma yábana matana goi sikaaiyaka. [ 11 Moitamo. Tomalatomota ima bego tauyadi tosuláiga iyavedi.]‡ Ame tomwanayana nakona Madiu geya iginiyeta, go sem tokaidámana nakona toinina ina nuwonúwana igini.† Isi 34:11,16; Luk 19:10.
12 Manakaemi konuwonúwana? Neta koroto tayamo mana sipi adi badabada tayamo andedi (100) go, tayamo itagau, bei kaga iguinuwe? Ina sipi naintinain (99) deedevidi koya goi bei ikalavedi sikaaiyaka go, ina ina sipi taagáuna ilusale ae? 13 Ame alatuuwokoimi konōve: Neta sipiyana ibabane, sipiyana manuna bei iuyáwana gagaina toina namliyeta sipiyadi naintinain (99) deedevidi manudi. 14 Tauna nakae Tamada guma yábana geya latuwona bego kidi nuwotokaidiyadi yaidi goi tayamo itagau.’
Siyada ina bágala ana kitotótona manuna
15 Tuwaina Yeisu kana,
‘E, neta siyami goyo iguinuwe yaimi, tauyana kokābi amitava, e kokamamaetāli. Neta inovemi, e moe dedevina. Siyami bogina kobuvile ima Yaubada ina bodayauwo goi.† Vin 5:19; Luk 17:3; Gal 6:1; Yem 5:19-20. 16 Go neta geya inovemita, e tonumisa tayamo o adi taiyuwo kokabīdi kōna tauyana kogīte bego tauyadi itoboinedi imi wowókana sikamoitamoe. Moeko goi Yaubada ina Katukeda bogina kokabikaone. Atukedayana kana,
“Totalavaita adi taiyuwo o adi taito goi itoboine tomota ina wowókana takamoitamoedi.”
Atukeda 19:15
17 Go neta tobagalayana geya inovemita, e Yaubada ana totugugunayao kolatuwokōidi tauyana manuna. Go neta Yaubada ana totugugunayao nakae geya inovedita, e tauyana kovayōko kina Totuyoyowo o takisi ana togogo nakae. 18 U, moe nakae koguinūwe go, ame alatuuwokoimi konōve: Kaga poyapoya goi kosanabode, e Yaubada yábana goi nakae isanabode. Aiyuwoina kaga poyapoya goi kotagone, e Yaubada yábana goi nakae itagone.† Mad 16:19; Iyo 20:23. 19 U, moe nakae go, ame alatuuwokoimi konōve: Neta ami taiyuwo poyapoya goi imi nuwonúwana tayamo kokawanoi dogoi tayamo manuna, e Tamagu guma yábana nakae bei iguinuwe komi manumi. 20 Moitamo. Neta ami taiyuwo o ami taito yoigu goi kootugúguna bei kokaawanoi, yaimi goi bei akaaiyaka.’
21 E tuwo Pita ima Yeisu ilumadade idigo kana,
‘Tomoya, neta siyagu tuta liliuna goyo iguuinuwe yau yaigu, e sivavina itoboinegu ina goyo anuwotaoidi? Neta ana badabada sivanima sivayuwo moe itoboine gea geya?’
22 Go kina Yeisu idigo kana,
‘Sivanima sivayuwo geya, go sem kunuwotaovāta.† Luk 17:3-4; Kol 3:13. 23 Nuwotao ame nakae Yaubada ina bodayauwo itoboinedi ina kalibúbuna sinaena goi. Ame tolovina tayamo tetelina nakae.
Tolovinayana latuwona bego ina pakonayao toolagaidi idi rowaga tauyana yaina goi igogo. 24 E ivatowo go, tolovina ina tovayaviyayao ina pákwana toolagaina tayamo sime ina rowaga ivakaigaga toina, nakona aivina miliyoni‡ Aivina miliyoni: Kidi da Giriki niyadi kadi, ‘Talent.’ Talent tayamo moe sikisi tausani (6,000) denerai. Ago denerai tayamo moe nakae aivina mani koroto tayamo ibabane neta ipaisewa maliyalina tayamo goi. Tauna korotoyana ina rowaga nakae ava mani koroto tayamo ibabane neta ipaisewa maliyalina ana badabada sikisi miliyoni (6,000,000). nakae. 25 Go geya itoboineyeta ina rowaga iyotuli, tauna ina tomoyayana ilovina bego ina tovayaviyayao sina tauyana ma monena be natudiyao be nakae konadiyao liliudi sikaigimonedi, kidi ituli ta tomota idi pakonayao go, maisadi sikabi sime tomoyayana sivini. Moe bego kina ina pakonayana ina rowaga ana yótula. 26 Tuwo ina pakonayana inove, tauna ikanakabobo ikawanoi ina tomoyayana yaina goi idigo kana,
“Guna tomoya, kutuyāwata go, kaga liliuna nava bei ayotuli!”
27 E tomoya ina pakonayana igite, tuwo inuwokapisiye, tauna tauyana ana mou goi italigei be nakae ina rowaga goi inuwotao.
28 E amo pakoninayana isowóduwo ina go, ina tosavaiyuwo tayamo ibabane. Tosavaiyuwoyana ina rowaga paakonina yaina moe tupwana, nakae tayamo andedi (100).‡ Tayamo andedi: Da Giriki niyadi kadi, ‘Denerai.’ Denerai tayamo moe nakae aivina mani koroto tayamo ibabane neta maliyalina tayamo goi ipaisewa. Tauna amo korotoyana ina rowaga nakae neta maliyalina ana badabada tayamo andedi (100) goi ipaisewa. E ina tosavaiyuwo ibabane, nukotona iyoisi, imelu go, idigo kana,
“Im rowaga yau yaigu ame tuta kuyotūli!”
29 Tuwo tosavaiyuwoyana ikanakabobo ikawanoi makimaki pakoninayana yaina goi idigo kana,
“Siyagu, kutuyāwata go, kaga liliuna nava bei ayotuli.”
30 Go pakoninayana tuyáwata ikatae, go sem itaoya ina tovayaviyayao yaidi goi ina tosavaiyuwoyana italavaite. Tuwo sima siyoisi sibiusalesale sinave deri goi silave isiu go, ikaiyaka ana kadókana itoboine ina rowaga iyotuli.
31 Tauna pakoninayana ina tosavaiyuwo maniyedi sikaaiyaka, siyadi ina guinuwa liliuna sigite. Tauna sikategeda gagaina. Tuwo sina idi tomoya yaina goi kaga liliuna iisowóduwo sigite sitalavaite. 32 E tuwo idi talavaitayana inove, pakoninayana iduduwe ima ibove idigo kana,
“Kom guna pákwana goyogoyoim! Boi im rowaga madabokina goi anuwotaoim unana kom kukawanoi makimaki yau yaigu. 33 Manakae? Itoboine im tosavaiyuwo paakonina kunuwokapisiye nakae boi yau nakae anuwokapisiyem?”
34 Tuwo tomoyayana mana egamogamogu ina deri ana tomatakavatayao iduduwedi sima ilatuwokoidi idigo kana,
“Ame pakoninayana koyōisi, konāve deri goi kovaisīu koliūne. Amoko goi bei ikaaiyaka ana kadókana ina rowaga madabokina iyotuli.”
35 Tauna nakae neta komi tamo tamo atemi goi semiyao geya konuwotaoidita, e liunayana nakae Tamagu guma yábana bei iguinuwe komi yaimi.’
†18:7 Mak 9:42-47; Luk 17:1-2.
‡18:11 Ame tomwanayana nakona Madiu geya iginiyeta, go sem tokaidámana nakona toinina ina nuwonúwana igini.
†18:11 Isi 34:11,16; Luk 19:10.
†18:15 Vin 5:19; Luk 17:3; Gal 6:1; Yem 5:19-20.
‡18:24 Aivina miliyoni: Kidi da Giriki niyadi kadi, ‘Talent.’ Talent tayamo moe sikisi tausani (6,000) denerai. Ago denerai tayamo moe nakae aivina mani koroto tayamo ibabane neta ipaisewa maliyalina tayamo goi. Tauna korotoyana ina rowaga nakae ava mani koroto tayamo ibabane neta ipaisewa maliyalina ana badabada sikisi miliyoni (6,000,000).
‡18:28 Tayamo andedi: Da Giriki niyadi kadi, ‘Denerai.’ Denerai tayamo moe nakae aivina mani koroto tayamo ibabane neta maliyalina tayamo goi ipaisewa. Tauna amo korotoyana ina rowaga nakae neta maliyalina ana badabada tayamo andedi (100) goi ipaisewa.