42
Iyosepa senao sina Itipita avadi manuna tetelina
1 E Yakobo vala inove bego Itipita goi witi ikaaiyaka, tuwo natunao iduduwedi sima ilatuwokoidi idigo kana,
‘Komi kaga kokaiyakoe? 2 Konōve. Vala anove Itipita goi witi ikaaiyaka. Tauna komi kosōu kōna ada witi kogimōna, govila bei loga takámasa.’† Gui 7:12.
3 E tuwo moitamo Iyosepa tuwowonao yawou sina Itipita goi bei witi sigimona. 4 E kina go Iyosepa ana gómana Beniyamina ikaaiyaka; Yakobo geya ietuneyeta senao taiyao. Imatoita; ina nuwonúwana kana,
‘Nakona bei vailai ibabane.’
5 E tuwo Isileli natunao be Kenani tomotaidi taiyao sina Itipita goi bego adi witi sigimona. Bogina kuyagoi; Kenani asaina tomota loga sikámasa.
6 Ego kina Iyosepayana da Itipita adi tolovina. Ame tauyana tomota liliudi adi witi ana tokaigimona. E tuwowonao sima tauyana matana goi aedi sivatugúyala sikanakabobo.† Abv 37. 7 E Iyosepa igitedi, ikinanedi go, geya ilatuwokoidita, go sem ikatubaudi. Ina sinapu nakae bego geya iyagoidita. Tauna mana kubukasa ilatuwokoidi idigo kana,
‘Komi nako goi koma?’
‘Kenani goi kama latuwoma ama witi kagimona’, kidi kaedi.
8 Ego Iyosepa tuwowonao ikinanedi go, tauyana kidi geya sikinaneyeta. 9 Tutayana tuwowonao aedi sivatugúyala, ina kanamimi aiyuwo boi ikanamiimiyedi inuwokavatedi,† Abv 37:5-10. tuwo tuwowonao geya ilatuwokoidita kina adi gómana, go sem iwowokoidi idigo kana,
‘Kopola! Komi toyáusa. Koma ima kasa kogite nako goi ineneta.’
10 Go kidi sidigo kadi,
‘Ima tomoya, moe nakae geya! Kai im pakonayao kama latuwoma bego ama witi kagimona. 11 Kai madabokima koroto tayamo natunao. Kai toyáusa geya. Kai im pakonayao koroto todedevima.’
12 Go kina Iyosepayana idigo kana,
‘Geya, kopola! Komi koma latuwomi ima kasa kogite nako goi ineneta.’
13 Go kidi sidigo kadi,
‘Ima tomoya, kai im pakonayao boi kai ama badabada yawou aiyuwo, tamama tayamo. Kenani goi kakaiyaka. Go bogomane nava tamama taiyao Kenani goi sikaaiyaka go, ama gómana tayamo bogina ikámasa.’
14 Go kina Iyosepayana idigo kana,
‘Nakae bogina alatuwokoimi, komi toyáusa! 15 Go tuwo. Bei avakakonemi ame nakae: Pero yoina goi akatótula ame asayana geya kokalaveyeta ana kadókana tamami ana bogomane ima ameko. 16 Koroto tayamo yaimi koetūne ina ami gómana ikabi ime go, madabokimi ameko deri goi kokaaiyāka, e bei ayagoi nakona komi aba numisa gea geya. Neta siyami geya ikaluvileta, bei ayagoidoko komi moitamo toyáusa!’
17 Tuwo deri goi ivaisiudi maliyalina aito goi sikaaiyaka. 18 Go maliyalina aitonina goi Iyosepa ina topaisewayao ilatuwokoidi sina tuwowonao deri goi sikabidi simedi. Sina sikabidi simedi, Iyosepa ilatuwokoidi, idigo kana,
‘Neta guna nuwonúwana bei alatuwokoimi koguinuwe, e ma yawoimi kokaaiyaka. Bogina koyagoi; Yau Yaubada ataaimamine. 19 Guna nuwonuwanayana ame nakae: Neta komi koroto todedevimi, koroto tayamo yaimi ameko deri goi ikaaiyaka go, madabokimi semiyao tokodaloga adi witi kokabīdi konavēdi imi kasa goi kovinīdi avadi. 20 Go ami gómana kōme yaigu bei itoboinegu imi livala akamoitamoe. Neta nakae koguinuwe, e ma yawoimi kokaaiyaka.’
Tuwo moitamo sitagona nakae siguinuwe.
21 Ago kidi tuwowonaoyadi taudiva toinidi niyadi goi sibóbwara sidigo kadi,
‘Boi ada gómana ina kategeda tagite tutayana ina kawanoi makimaki nuwokapisi manuna kita geya tanoveyeta. Tauna moitamo kita mada goyo ada gómana pasina. Ame pasina ame ida nuwotukalayana bogina tababane.’
22 E Rubeni idigo kana,
‘Manakae? Boi alatuwokoimi gomanayana taabu koyogeedegēde gea geya?† Abv 37:21-22. Moitamo alatuwokoimi go, geya konoveguta! Tauna ame ina kámasa ana katumapu bogina tababane.’
23 Ego kidi Iyosepa tuwowonao sinuwonúwana bego niyadi geya iyagoiyeta. Tokaigavila niyadi ikaigavile Iyosepa ilatuwoko. Go Iyosepayana niyana kidi niyadi tayamo! 24 E tauyana inovedi, tuwo inuwokapisiyedi, e isiboila ina itáiya. Itáiya ikavava, mataiuna isekuku, e isowóduwo ima ina topaisewayao ilatuwokoidi idigo kana,
‘Ame tauyana koyōisi, nimana koyowōidi.’
Tuwo moitamo sina tuwowonao matadi goi Simion siyoisi, nimana siyowóidi. 25 E Iyosepa ina topaisewayao ilatuwokoidi idigo kana,
‘Ame korotoyadi idi baiki goi adi witi kovadodōidi go, idi mani ma saisailidi kokabīdi, idi baiki goi kododōidi. Ago taabu kolatuuwokōidi. Tuwaina adi kinare kovinīdi adi kenao manuna.’
Tuwo moitamo sina nakae siguinuwe. 26 Ame ikavava, Iyosepa tuwowonao sina adi witi ma baikidi ase goi sikailagasidi. 27 Sikatubayasi ikavava, e siketoiya go, vanuwo isabamgo tunagu tayamo sigite, tuwo amoko goi siwaiwasi. Siwaiwasi go, koroto tayamo yaidi goi ina baiki ikatupáeve bei witi ikabi, ina ase ivavani go, ikandosobu ina mani ma saisairina baiki tobuna goi igitebabane. 28 Igitebabane, senao ilatuwokoidi idigo kana,
‘Iyaa! Segowo, guna mani witi manuna guna baiki goi sidodoimnei. Goame baikiyana tobuna goi. Kōma kogīte!’
Tuwo madabokidi sima sigite, e atedi siyova gagaina nakae wowodi sitátava go, sidigo kadi,
‘Ame kaga Yaubada iguinuwe yaida!’
29 E siketoiya sina Kenani goi sisiu sina tamadi Yakobo ina vada goi go, tauyana yaina sivatétala adi kaibako, sidigo kadi,
30 ‘Tamama, Itipita korotoina, tauyana da Itipita adi tolovina, ibowoima be nakae iwowokoima kana,
“Komi toyáusa.”
31 Ago kai kalawoiwoi kama,
“Kai toyáusa geya. Kai koroto todedevima. 32 Boi kai koroto ama badabada yawou aiyuwo, tamama tayamo. Ama gómana tayamo bogina ikámasa go, bogomane nava tamama taiyao Kenani goi sikaaiyaka.”
33 Ago kina korotoyana, moe tolovina, idigo kana,
“Tuwo ame nakae aguinuwe bei ayagoi neta komi koroto todedevimi: Koroto tayamo yaimi goi ameko yau taiyao kakaiyaka go, madabokimi semiyao tokodaloga adi witi kokābi avadi. Kokabi ikavava, kōna imi kasa. 34 Kōna go, ami gómana kokābi kōme yaigu, e bei ayagoi bego komi geya toyáusa geya, go sem koroto todedevimi. Gomanayana agite, e siyami bei ataligei go, atagona ami witi kogimona.” ’
35 E sibóbwara ikavava, koroto tamo tamo idi baiki sikaliulagidi go, tamo tamo idi mani ma saisailidi sigitebabanedi adi witi taiyao! Tuwo tauyadi tamadi taiyao maniyadi sigitedi, atedi siyova. 36 E tamadi Yakobo gamona igoyo idigo kana,
‘Komi pasimi natugowo sitagau! Iyosepa bogina itagau. Simion nakae itagau go, bego ame tutayana latuwomi Beniyamina kokabi konave? Neta konave, yau guna nuwomou koyatoyato!’
37 Go kina Rubeni idigo kana,
‘Natum Beniyamina bei akaluvilemnei, go neta geya, e natugowo adi taiyuwo atagonedi kukaumatedi. Tamagu, kunumisēgu. Gomanayana nimagu goi kuyāto, niga bei akaluvilemnei.’
38 Go kina Yakoboyana idigo kana,
‘Yau natugu bei geya iwoita komi taiyao! Siyana bogina ikámasa go, tauyana anetava ikaaiyaka. Tauna bei geya iwoita! Neta konavenave kenao goi ivailai, e komi guna nuwomou koyato, tauna yau magu nuwomou ana kadókana akámasa.’‡ Ame nakae Yakobo ibóbwara unana Iyosepa be Beniyamina sinadi tayamo, sinadiyana yoina Reitiyeli (Abv 30:24, 35:18).
†42:6 Abv 37.
‡42:38 Ame nakae Yakobo ibóbwara unana Iyosepa be Beniyamina sinadi tayamo, sinadiyana yoina Reitiyeli (Abv 30:24, 35:18).