27
Yakobo tamana ikaatubau tetelina
1 E Aisake ikaaiyaka, e bogina ikaitomoya, nakae matana ikau, tuwo geya itoboineyeta igita dókana. E tuta tayamo ina botomoya Iso iduduwe idigo kana,
‘Natugu, kūma!’
‘Tamagu, manakae?’ Isoyana kaena.
2 Aisakeyana idigo kana,
‘Natugu, kunōve. Yau bogina akaitomoya. Guna tuta geya ayagoiyeta ava tuta bei akámasa. 3 Tauna im kaipíyama, im sau be im gita, kwabīdi, e kūna yoyowo goi yau guna woiwoi kuvakāuko. 4 Kuvakauko ikavava, kūma awoinu dedevina kuwodūgu nakae yau nuwogu ikabi, e kūme akáika. Akáika ikavava, yau nava maa yawoigu itoboinegu akaipakuyem.’
5 E kina go Ribeka itaaiyakeka tutayana Aisake ma natuna Iso sibobóbwara. Tutayana Isoyana itaoya ina yoyowo goi ivakauko, 6 e kina go Ribekayana ina natuna Yakobo ilatuwoko idigo kana,
‘Natugu kunōve. Maine tamam anove tuwowom Iso ilatuwoko 7 idigo kana,
“Woiwoi dedevina kuvakaukōe, kūme awoinu dedevina kuwodūgu. Kuwodugu ikavava, kūme akáika, e yau nava maa yawoigu itoboinegu Yauwe matana goi akaipakuyem.”
8 Tauna natugu, ame tuta kunovēgu. Kaga nakae alatuuwokoim, kom nakae kuguinūwe. 9 Natugu, ame tuta kūna goti bonatuna aiyuwo dedevidi kulauīdi kumēdi, e awoinu dedevina bei aodugu nakae tamam nuwona ikabi. 10 Aodugu ikavava, kūna tamamyana kuvīni ikáika, e bei itoboine igimikaipakuyem namliyeta ikámasa.’
11 Go kina Yakoboyana idigo kana,
‘Tauna go tuwowogu Iso wowona unuununa go, yau wowogu imomoyasu. 12 Nakona bei tamagu sakavaigu ibisikone, bei ikinanegu kana,
“Ame Yakobo ikatubaugu.”
E tauna bei geya ikaipakuyeguta, go sem bei ikatubolategu.’
13 Go sinanayana idigo kana,
‘Natugu, neta ikatubolatem, yau atagona bego atubolatayana ima yaigu, go kom sem niyagu konōve. Ame tuta kūna gotiyadi kulauīdi kumēdi.’
14 Tuwo moitamo itaoya ina gotiyadi ikaumatedi. Ikaumatedi ikavava, imedi sinana ivini, awoinu dedevina iwodugu nakae tamana nuwona ikabi. 15 Ivaipolu ikavava, isiu ina vada goi ina botomoya Iso ana kwama dedevidi ikabidi, Yakobo ivini ilosidi. 16 Ilosidi ikavava, goti bonatunayadi sakavaidi Ribeka ikabidi, Yakobo nimana be nukotona momooyasuna goi isikoidi. 17 Isikoidi ikavava, awoinuyana be beredi bogina ikatubaayasidi natuna Yakobo ivini. Yakobo berediyana be awoinuyana ikabidi, 18 e ina tamana goi idigo kana,
‘Tamagu.’
‘U. Go kom ava natugu?’, tamana kaena.
19 Yakoboyana ipola idigo kana,
‘Tamagu, yau im botomoya Iso. Kaga nakae kulatuuwokoigu bogina nakae aguinuwe. Tauna kutusobu dōkana, kwāika. Ikavava, kwaipakuyēgu.’
20 Go kina Aisakeyana idigo kana,
‘Go natugu, manakaem mainao kuma?’
‘Unana Yauwe im Yaubada ivaitegu’, Yakobo kaena.
21 Tuwo Aisakeyana idigo kana,
‘Natugu, kūma kikigu goi abisikonem, e bei ayagoim nakona kom moitamo natugu Iso gea geya.’
22 E tuwo Yakoboyana ibala ina tamana Aisake kikina goi go, tamanayana ibisibala Yakobo ibisikone, idigo kana,
‘Niyam Yakobo niyana nakae go, nimam Iso nimana nakae.’
23 E amoko goi Aisake natuna Yakobo geya ikinaneyeta unana nimana ma unuununa Iso nimana nakae. Tauna geya ikinaneyeta. Tuwo latuwona bego ikaipakuye go, nava inanayuwo, 24 tuwo idigo kana,
‘Kom moitamo natugu Iso?’
‘U, nakae’, Yakobo kaena.
25 Tuwo Aisakeyana idigo kana,
‘Natugu, woiwoi bogina kuvaaipolu kūme bei akáika, gobe akaipakuyem.’
Tuwo moitamo Aisake ivini ikáika nakae oine ivini inim. 26 Ikavava, Aisake idigo kana,
‘Natugu, kūma kuyowoiīgu.’
27 Tuwo Yakobo ina tamana iyowoi go, Yakobo ana kwama mainina Aisake inove, e idigo kana,
‘Aa natugu mainina nakae yoyowo mainina; yoyowoyana Yauwe ikaipakuye.’† Ibe 11:20.
Tuwo ikaipakuye idigo kana,
28 ‘Yaubada ina nuwonúwana goi númla sigugumina
im poyapoya bei ivakaanapoive
be nakae im tánuwo goi oine be awoinu siiloboina.
29 Aiyuwoina Yaubada ina nuwonúwana goi
boda liliudi kom im pakonayao
bei sivaatugúyala yaim
be nakae osemowo liliudi sobuyekoim
bei kuloviinaedi.
Avatauwa neta sikatubolatem,
Yaubada nakae bei ikatubolatedi.
Go sem avatauwa neta sikaipakuyem,
Yaubada nakae bei ikaipakuyedi.’† Abv 12:3.
30 E Aisake ina kaipakuyana ikavava, Yakobo itaoya, tamana ikalave ina go, kina Iso ina vakauko goi isowóduwo ima. 31 Ima, e nakae awoinu dedevina iwodugu. Iwodugu ikavava, isiu ina tamana ivini idigo kana,
‘Tamagu, kutusobu dōkana go, ame anina bogina avaipolu kwáika gobe kwaipakuyēgu.’
32 Go kina Aisakeyana nukotona iwówana, idigo kana,
‘Go kom vatau?’
‘Yau Iso, im botomoya’, Isoyana kaena.
33 Tuwo Aisakeyana wowona itátava gagaina toina, e idigo kana,
‘Go maine vatau ima? Tauyana awoinu dedevina iwodugu ime ivinigu akáika. Makaitaga akáika ikavava, e kom kuma. Go tauyana bogina akaipakuye, tauna aipakuyana ikaiyako vata yaina, geya itoboineguta akuliuye.’
34 E tutayana kina Isoyana tamana ina livala inove, mana táiya ipodeda gagaina idigo kana,
‘Oiyoi, tamagu! Yau nakae kwaipakuyēgu!’
35 Go kina tamana kana,
‘Geya. Am gómana mana pola ima am kaipaku bogina isonane.’
36 Tuwo Isoyana idigo kana,
‘Tauyana sivayoudoko Yakobo ae?† Abv 25:29-34. Bogina sivayuwo ikatubaukoigu. Boi guna tapavívila goi tauyana ivaobugu, e tauna tauyana imalabotomoya mana lovina go, ame tuta guna kaipaku isonane.’
Tuwaina kana,
‘Go tamagu, manakae? Itoboinem yau nakae kwaipakuyegu gea geya?’
37 Go kina Aisakeyana idigo kana,
‘Kunōve! Guna kaipaku goi tauyana kom osemowo taiyao bei ilovinaemi nakae komi ina pakonayao. Ina oine nakae ina kawoinu bei siiloboina. Tauna natugu, geya tayaamo aipaku dedevina ikaaiyaka bei kom avinim.’
38 Go kina Isoyana idigo kana,
‘Go manakae? Sivatayamo tauna itoboinem kwaipaku ae? Tamagu! Yau nakae kwaipakuyēgu!’
Tuwo Iso itáiya gagaina.† Ibe 12:17.
39 E tamana Aisake idigo kana,
‘Im kaiyaka poyapoya goi númla sigugumina im poyapoya
Yaubada bei geya ivakanapoiveyeta.
Im tánuwo goi oine be awoinu bei geya siloboineta.† Ibe 11:20.
40 Im kaiyaka manuna bei kuvalauláuwo
be kuvaináwana.
Kom bei am gómana ina pákwana.
Niga go ina lovina bei kwapipilave,
e geya tuwaina ilovinaem.’† Abv 36:8; 2To 8:20.
Yakobo isiya ina doiyana Lebani goi tetelina
41 E tuwo Iso gamona igoyo unana tamana ina kaipaku ana gómana Yakobo ivini go, kina geya, tauna Yakoboyana ikaolilive. Inuwonúwana kana,
‘Tamagu ina kámasa mlina go, táiya ana tuta ikavava, tauyana bei akaumate.’
42 Ago Ribeka vala inove bego Iso latuwona Yakobo ikaumate. Tuwo ina bogomane Yakobo iduduwe ima idigo kana,
‘Natugu, kunōve. Iso toinina ikipaiwole ame nakae: Iyupuyupu bego im goyo ikatumapu, e ikaumatem. 43 Tauna natugu, niyagu kunōve. Ame tutayana kutāoya, woilīm kusīya kūna Karani goi, e niugu Lebani yaina goi kwaiyāka. 44 Amoko goi tuta giyaina kwaiyāka, nakae ana kadókana tuwowom ina egamogamogu ikavava. 45 Tutayana ina egamogamoguyana ikavava be nakae im guinuwa ame inuwotao, e livala bei aetune iwo yaim bego kom itoboinem kwaluvila. Moe nakae kuguinūwe, govila bei ameko goi kwaiyaka, Iso ikaumatem go, tomota bei Iso ina guinuwa pasina sikaumate. Geya latuwogu natugowo ami taiyuwokova kokámasa maliyalina tayamo sinaena.’
46 E Ribeka ina monena Aisake ilatuwoko idigo kana,
‘Amo Eta tubunao vevina adi taiyuwo Iso iinaidi bogina ogu ikai taiyao kakaiyaka. Neta Yakobo nakae Eta tubuna vavina tayamo inai, e dedevina yaigu neta akámasa.’