13
Eberam be Loti situumasaba tetelina
1 E Eberam ma monena, ina bodao liliudi be Loti taiyao sitaoya, Itipita sikalave go, sikaluvilamna sina Negevi dadavina.
2 Ego Eberam bogina iguyau; ina esaesa moe yoguyogu bulumakau, sipi, goti, siriba be goura. 3 E tauyadi sina Negevi go, geya sikaiyaketa, go sem situliya sinonoina bego Beteli. Sina Beteli goi go, sina asayana boi Beteli be Ai nauyayanaidi goi sikaaiyaka. 4 Amo asayana goi Eberam boi mainao dídiya igimikaudakodako aba kasala imadagi. E amoko goi Yauwe yaina isakululu.
5 E tutayana Loti Eberam taiyao siituliya go, Lotiyana nakae ina sipiyao, ina gotiyao, ina bulumakauyao be ina yoyou parai badabadaidi. 6 Tuwo poyapoya geya itoboineyeta Eberam be Loti idi yoguyoguyao taiyao sikaaiyaka unana idi yoguyoguyao badabada sisaki, tauna tauyadi geya itoboinedita taiyao sikaaiyaka. 7 Tuwo Loti be Eberam idi yoguyoguyao adi tomatakavatayao taiyao sikaumakimaki. (Amo tutayana da Kenani be nakae da Perisi asayana goi nava sikaaiyaka.)
8 E idi sipi adi tomatakavatayao taiyao sikaumakimaki, tuwo Eberam Loti ilatuwoko idigo kana,
‘Loti, kom yau boda tayamo, tauna kom be yau geya itoboinedeta takaumakimaki, nakae kom im topaisewayao be yau guna topaisewayao geya itoboinedita sikaumakimaki. 9 Tuwo kom yau tatumasāba. Poyapoya ana madabokina matam goi ikaaiyaka. Kom toinim kulovīna. Neta kom latuwom bomatu dadavina, yau ana koiboga dadavina go, neta kom latuwom koiboga dadavina, e yau ana bomatu dadavina.’
10 Tuwo Lotiyana imatavilavila Iyoridani butumina madabokina igite poyapoya dedevina, nuugusina. (Amo tutayana Yauwe Sodoma be Gamora nava geya imtulidita.) Poyapoyayana ana kaigigita Yauwe ina tánuwo† Abv 2:8-10. o nakae Itipita ina Sowa poyapoyaidi nakae. 11 E Lotiyana imatavilavila go, idigo kana,
‘Latuwogu bomatu dadavina, moe Iyoridani butumina.’
Tuwo moitamo itaoya ina bomatu dadavina. Moeko goi Eberam be Loti situmasaba. 12 E kina go Eberamyana Kenani goi ilokasa go, kina Lotiyana ina asa Iyoridani butumina goi Sodoma kikina ilokasa. 13 Ego kidi da Sodomayadi totapepeko toidi Yauwe matana goi.
Yauwe ina katótula Eberam yaina tetelina
14 E kina go Yauweyana Loti be Eberam idi tumasaba mlina Eberam ilatuwoko idigo kana,
‘Eberam, moeko goi kuutāoya kumatavilavīla. Yawéyana, youya, bomatu be koiboga goi poyapoya ana madabokina kugīte. 15 Guna nuwonúwana bego ava poyapoyava itoboinem kugite, madabokina kom be nakae im boda bei avinimi be ikaiyako vata yaimi.† Gui 7:5. 16 Im boda bei akisailidi badabadaaidi! Nakae geya vatau tayaamo itoboine ikatuyaividi. 17 Poyapoyayana bei avinim. Tauna kutāoya kūna madabokina goi kuvabebēo.’
18 E tuwo Eberam itaoya, ina yoyou parai ikabidi, ina Ebironi goi go, Mamre ina kalova gagaidi kikina goi ilokasa. Amoko goi dídiya ikaudakodako aba kasala imadagi bego Yauwe yaina isakululu.