Paulo ina lokoina ina Roma tetelina
27
(Guinuwa 27:1—28:31)
Oga Paulo isoowoyae itomava tetelina
1 E gávana Pesto ilovina kakailova kana Itali. Tuwo ina tovayaviyayao ilovinaedi sina Paulo be nakae maniyedi yoowonidi sikaaiyaka, sikabidi sinavedi ina tovayaviyayao andedi adi tovakumgo tayamo nimana goi siyatoidi. Tovakumgoyana yoina Yuliyo go, tauyana tovayaviya boda tayamo goi ikaaiyaka, bodayana yoina Tokanayatanatoina ina kaiyóita. 2 E oga tayamo ikaaiyaka moe da Adaramteno idi oga. Ogayana bei ikailova ina asa tamo tamo Esiya ana dadava goi. Tuwo ogayana goi kasowoya go, Aristako taiyao. Tauyana Mesadoniya‡ Mesadoniya: Ame parovinsi tayamo. korotoina guma Tesalonáika. E tuwo kakailova kalokoina. E sabamgo ana madabokina goi kaalokoina.
3 E vanuwo itomo kama Saidoni goi kavaiu. Kavaiu, kina Yuliyo Paulo ikubunuwe, tuwo itagone isou ina senao nuumisaidi yaidi bei simatakavate. 4 Niga go Paulo ikaluvilamna ima oga goi isowoyamna go, amoko goi kakailova kalokoina. Kaalokoina go, yágira koiboga itowo matama goi ima, tauna kavakanaiwo kana simla Saipiro nugonina goi kasayava kalokoina papana. 5 Saipiro kakalave osasa goi kalokoina dámana kayovasi Silisiya parovinsi goi be Pampíliya parovinsi goi kalokoina papana. Kalokoina papana kama Lukiya ana dadava asa Mira goi kavaiu. 6 Amoko goi kasou go, tovakumgoyana ilusala ava oga nakona bei ina Itali. Iilusala, tayamo ibabane, ogayana da Alekisandira‡ Alekisandira: Ame asayana Itipita sinaena goi ikaaiyaka. idi oga. Tuwo tauyana ima ilatuwokoima idigo kana,
‘Komi kōna ogayana goi kosowōya.’
Tuwo moitamo kasowoya. Ikavava, aiyuwoina kakailova kalokoina. 7 E maliyalina badabadaidi goi manukaima kaalokoina go, kakúyuwo bego asa Kinido goi kavakakana. Kavakakana go, yágira koiboga matama goi ivabodema. Tauna kaváeo kana simla Kiriti bomatu dadavina goi kalokoina papana. E kama asa Salamone goi 8 go, kakúyuwo bego Salamoneyana goi kalokoina papana. Ego asayana kakalave kaseivata kalokoina vayavayali kama asa Laseya kakalave kaseivata. Kaseivata kalokoinabala kama asa kamoiuna tayamo. Kamoiunayana yoina Aba Vailówana Dedevina.
9 E ima kúyuwo goi ima tuta gagaina bogina kakavavaluge. Nakae Diyuu idi Diyakímwana ana tuta‡ Diyakímwana ana tuta: Ame Diyuu siguinuwe tala tamo tamo. Ame youyuwoina moe Núwala Ana Maliyalina. Ame maliyalinayana goi Diyuu liliudi sidiyakímwana go, Tonúwala Toolagaina yoguyogu ikasaledi Yaubada yaina. Ame kasalayana goi tomota idi goyo goi inuwolidi. Tuta maniyena ame diyakimwanayana isowóduwo Septemba ana kaba lukavava goi go, tuta maniyena Okotomba ana kaba vatowo goi. Tupa Septemba nauyayana ina Pebuweri goi moe aba vailai. bogina ikavava. Tauna tupa moe aba vailai. Tuwo Paulo ikatumatalidi 10 idigo kana,
‘Tawou, kélava ame bogina agite neta ame asayana takalave go, takailova, e ida tupa bei igoyo toina. Kónana be nakae ida oga bei sitagau go, aiyuwoina maniyeda bei tavailai. Tauna, yau guna nuwonúwana bego taabu taakailōva.’
11 Go kina oga ana kapiteni be nakae toni oga idi nuwonúwana ituli. Kidi latuwodi kakailova. Tuwo tovakumgoyana silumakikine bego itagona go, kakailova. Tauna tovakumgoyana Paulo ina livala geya inoveyeta. 12 E aba vailowanayana goi kakaaiyaka geya idedevineta neta kelavagoyo ana tuta goi. Tauna boda silovina kakailova. Tuwo kakailova go, kidi sinuwonúwana neta itoboinema kana asa Poinikisi goi kelavagoyo ana tuta kakaiyaka, moe bei dedevina. Unana Poinikisiyana aba vailówana dedevina Kiriti goi, nakae koibogayouya be kótala ikaonakoidi. 13 E yágira youya giyaina itowo, tuwo gelugelu sinuwonúwana kadi,
‘E ame bogina ida yágira itowo. Takailōva tāna Poinike.’
Tuwo vailówana sibiu kakailova. Kakailova kalokoina, Kiriti goi kalokoina vayavayali. 14 Kalokoina vayavayali iii, e tuta giyaina asa goi ulibomatu‡ Ulibomatu: Giriki niyadi ame yagirayana yoina Yurakilo. gagaina ikalisou ima. 15 E ulibomatuyana isou ima oga ikauive. Tauna tokabikúnuwo geya itoboinedita siyovasiye. Tuwo sipoikiki geya, e nukotodi sitopa. Tauna yágira ivadauseseliyamoima. 16 E simla tayamo giyaina yoina Kauda nugonina goi kalokoina papana. Kaalokoina, itoboinema oga ina dingi kakitototo go, imoumou. 17 Gelugelu sikitototo ikavava, sibiu ima oga goi sikailagasi. Ikavava, oga ana yowoyówana sikabi, ogayana sikopaiwoli. Ego simatoita bego Suratisi tepanina goi oga bei itomava. Tauna naya gagaina isobu, e yágira ivadauseseliyamoima. 18 E aivaya gagaidi, oga ikaugavigavile. Ikaugavigavile, tuwo vanuwo itomo, gelugelu sitaoya oga ana kaidoda maniyedi sivatowo sisavedi. 19 Maliyalina aitonina goi ogayana ugeugena maniyedi toinidi nimadi goi sisavedi. 20 E maliyalina badabadaidi goi níyala geya kagiteyeta be nakae sabamgo utuna geya sisowoduwoita. Bou ivakaigaga toina. Tauna nukotoma sitopa ama yava manuna.
21 Bogina tuta maanawena geya kakaiketa. Tuwo Paulo itaoya ilatuwokoima idigo kana,
‘Tawou, neta guna nuwonúwana boi mainao konove! Neta geya takailoveta go, neta Kiriti goi takaiyaka, e nakae ame mouyadi geya tababanedita be nakae geya tayaamo kaga itagau. 22 Go ame tuta alatuwokoimi kokatepātu! Oga kaka ame bei itagau go, komi yaimi goi geya kada tayaamo tomota bei ivailai geya. 23 Yau Yaubada ina kitom be nakae yaina asaakululu, e ina anerose nuwobuna ietune ima yau matagu goi itaoya 24 ilatuwokoigu idigo kana,
“Paulo, taabu kuumatōita! Itoboine kom Sisa matana goi kutaoya. Go kunōve! Yaubada bogina itagona bego kom be nakae oga ana tosowoyayao liliudi taiyao bei iyavemi.”
25 Tauna segowo, kokatepātu! Moitamo. Anumisa Yaubada yaina bego kaga liliuna ina anerose iidigedi nakae bei sisowóduwo. 26 Go itoboine ida oga simla tayamo goi itomava.’
27 E sabamgo ana badabada yawou aito Adiriya osasaina goi yágira bogina ivadauseselima go, sabamgo yawou aivasina bunatoina goi gelugelu sinuwonúwana bego kai bogina mamaya kikina. 28 Tuwo yowoyówana tayamo sikabi, tayamo dadavina kainum sisiko. Ikavava, sikalisobuye isou ina négwasa goi bego niku sivakakone. Ikavava, sibiu siove; ova ana badabada tuwenti (20) nakae. Tuta giyaina aiyuwoina yowoyowanayana sikabi sikalisobuye. E sibiu siove; ovayawou ovanima. 29 E gelugeluyadi simatoita kadi,
‘Oga bei isasae ina gurewa goi itomava.’
Tauna sina oga valemli goi vailówana aivasi sikalisobuyedi go, sikawanoi idi yaubadayao yaidi bego vanuwo itomo wowóila.
30 E gelugeluyadi latuwodi sisiya. Tuwo sipola kadi,
‘Kai bei kana vailówana oga matana goi kakalisobuyedi.’
Tuwo tutayana oga ina dingi sisoilave isou négwasa goi bego sisowoya, 31 Paulo igitedi. Tuwo ina tovakumgoyana be nakae tovayaviyayao ilatuwokoidi idigo kana,
‘Neta amo korotoyadi oga goi geya sikaiyaketa, e komi geya itoboinemita bei ami yava kobabane.’
32 Tuwo tovayaviyayaoyadi sina dingi ana búyala sikupoidi, e dingiyana idoiye.
33 E nobuyana nava matagougouna goi kina Paulo itaoya ikawanoi makimaki kai tosowoyayao yaima bego kakáika, idigo kana,
‘Ame komi maliyalina ana badabada bogina yawou aivasi go, komi áika geya. Maliyalinayadi goi oga komataakavate go, geya kada tayaamo kaga dedevina kokáika geya. 34 Tauna akawanoi makimaki yaimi bego kokáika. Awoinu moe imi kaba yava nakae; itoboine yawoimi iyavedi. Bogina ayagoi geya vatau tayaamo yaimi goi bei ivailai geya.’
35 E ibóbwara ikavava, beredi ikabi liliuma matama goi ikauyagu Yaubada yaina. Ikavava, berediyana ikivisi ikáika, 36 e baige madabokima atema sipatu. Tuwo beredi kakabi kakáika. 37 Ego kai ama badabada oga goi moe aiyuwo andedi seventisikisi (276). 38 E kakáika bogina gamoma, kana witi madabokina sikesa kakabidi kalavedi sisou négwasa bego oga ikakapu.
39 E vanuwo itomo, gelugeluyadi sikandoyava asa sigite go, asayana geya sikinaneyeta. E kamoiuna tayamo sigite aolaoina dedevina. Idi nuwonúwana bego neta itoboinedi, oga siyave ina aolaoyana goi. 40 Tuwo vailówana sikupoidi sikalavedi. Ego kúnuwo boi sikabidi oga sinaena sisikoidi sikaaiyaka. E kunuwoyadi sitaligeidi sikabidi oga sikabikunui. Ago naya tayamo sikabi oga matana goi sivatáoe, e kalokoina kana aolaoyana manuna. 41 E ogayana ilokoina inonoina bego aolao goi kavaiu go, lamotaita kababane, ikalibilibilima kana tepanina goi katomava, e tauna nakae ikaaiyaka. E ogayana matana ikasa go, aivaya gagaidi sitalasa valemli sikauvisivisi.
42 E kidi go tovayaviyayadi idi nuwonúwana kadi,
‘Koroto yoowonidi takaumatedi, govila bei sisiya.’
43 E kina go tovakumgoyana latuwona Paulo iyave. Tuwo ina tovayaviyayaoyadi isanabodedi, e idi nuwonúwana geya itoboinedita siguinuwe. Ago tomota ilovinaedi idigo kana,
‘Avatauwa komi neta aya koyagoi, e kovakūmgo kopēla kosōu négwasa goi kōna kokayalāga. 44 Go avatauwa neta aya geya koyagoiyeta, kovāmliya go, timba o oga konanina kokābi bei kokaivayavaya.’
E tuwo moitamo nakae kaguinuwe. Moe nakae madabokiima mama dedevina bogina kakayalaga.
‡27:2 Mesadoniya: Ame parovinsi tayamo.
‡27:6 Alekisandira: Ame asayana Itipita sinaena goi ikaaiyaka.
‡27:9 Diyakímwana ana tuta: Ame Diyuu siguinuwe tala tamo tamo. Ame youyuwoina moe Núwala Ana Maliyalina. Ame maliyalinayana goi Diyuu liliudi sidiyakímwana go, Tonúwala Toolagaina yoguyogu ikasaledi Yaubada yaina. Ame kasalayana goi tomota idi goyo goi inuwolidi. Tuta maniyena ame diyakimwanayana isowóduwo Septemba ana kaba lukavava goi go, tuta maniyena Okotomba ana kaba vatowo goi. Tupa Septemba nauyayana ina Pebuweri goi moe aba vailai.
‡27:14 Ulibomatu: Giriki niyadi ame yagirayana yoina Yurakilo.