Pilipo tetelina
8
(Guinuwa 8:1-40)
Saulo Yeisu ina tonumisayao ivakaleyedi
1 E kina go Saulo Stiveniyana ina kámasa igitegite, ikamoitamoe.
E ame maliyalinayana goi mou gagaina isowóduwo Tomoya ana totugugunayao Yerusalema goi yaidi. E madabokidi sitaoya, sivagisapasapa sina Yudiya ana dadava be nakae Samériya ana dadava goi sikaaiyaka go, kidi vamoleyanayao Yerusalema goi sikaaiyaka. 2 E koroto kaasalaidi Yaubada yaina sima Stiveni wowona sikabi, sivaliwoge go, madi nuwomou sitáiya gagaina tauyana manuna.
3 E kina go Sauloyana itaoya Tomoya ana totugugunayao Yerusalema goi ikigalagalalamidi ame nakae: Yeisu ina tonumisayao idi vada tamo tamo goi isiusiu go, koroto be nakae vevina iyoisidi ibiudi inavedi deri goi ivaaisiudi.† Gui 22:4-5, 26:9-11.
Saulo ina vakaleya pasina Pilipo ina Samériya
Vala Dedevina itaalavaite tetelina
Vala Dedevina itaalavaite tetelina
4 E kidi go Yeisu ina tonumisayao Yerusalema goi sivagisapasapa sina sivanibiníbita asa tamo tamo goi Vala Dedevina sitaalavaite tomota yaidi. 5 E kina go Pilipo‡ Pilipo: Ame tauyana igimisowóduwo Guinuwa 6:5 goi. nakae tosapa tayamo. Tauyana isou ina Samériya asaina tayamo goi itaalavaita kana,
‘Yeisu moitamo Guyau.’
6 E tutayana tomota sima Pilipo sinove be nakae aba kinana iguuinuwedi sigitedi, e tauyadi ina bóbwara nuwodi tayamo goi sitaiyakekedoko. 7 Moe moitamo. Aba kinanayadi ame nakae: Tomota badabadaidi amoko goi sikaaiyaka naagovaidi. Ago kina Pilipo dimoni ivatapiyedi, tuwo madi podeda tomota sikalavedi go, sisowóduwo. Aiyuwoina topem badabadaidi sikaaiyaka Pilipo ikidedevinedi siboboina. 8 E amo asayana tomotainao siuyáwana gagaina!
9 E koroto tayamo tomeméyava yoina Saimoni asayana goi ikaaiyaka go, tuta maanawena ina méyava pasina da Samériya sikaiinaopa. Saimoniyana toinina ikiilagasi ma gaagasina idigo kana,
‘Yau koroto tayamo, koroto gagaigu.’
10 Tomota liliudi, tookaidi be guyaguyauwo, tauyana sitaiyakekedoko go, kadi,
‘Ame korotoyana Yaubada ina togaga, tomota sivayou toosakina.’
11 E tauyana sitaiyakekedoko unana tuta maanawena ina meyavayana goi sikaiinaopa. 12 Go Pilipo ina tomotayadi yaidi Vala Dedevina Yaubada ina kalibúbuna be nakae Yeisu Guyau yoina manudi italavaite. E tutayana ina livala sinumise, koroto be nakae vevina isayoyoidi. 13 E kina go Saimoniyana nakae inumisa go, ana sayóyova mlina Pilipo isakurikuriye. Pilipo aba kinana nakae guinuwa toogagaidi iguuinuwedi, Saimoni igitedi, tuwo pasidi nakae ikaiinaopa.
14 E tauyadi vamoleyanayao Yerusalema goi nava sikaaiyaka go, vala sinove bego maniyedi da Samériya Yaubada ina vala bogina sinumise, tuwo Pita be Iyoni sietunedi sina asayana goi. 15 Adi taiyuwokova sisou sina amoko goi sikawanoi Yaubada yaina da Sameriyayadi manudi, e bei Baloma Kimaasabaina sibabane. 16 Idi kawanoiyana unana amo tutayana Balomayana nava geya tayaamo yaidi goi isou. E Tomoya Yeisu yoina goi Pilipo isayoyoidimo, ame tauna. Moe pasina tauna sikawanoi bego da Sameriyayadi Baloma Kimaasabaina sibabane. 17 Pita be Iyoni sikawanoi ikavava, nimadi sikailagasidi tomotayadi dabadi sibisikonedi, e Baloma Kimaasabaina sibabane.
18 E Saimoniyana igite bego Yaubada Balomaina tomota ivinidi tutayana Yeisu ina vamoleyanayao nimadi sikailagasidi tomotayadi dabadi sibisikonedi, tuwo tauyana latuwona bego ame togagayana itabubuli Pita be Iyoni yaidi. 19 Tuwo ilatuwokoidi idigo kana,
‘Moe togagayana yau nakae kovinīgu bei avatauwa yaidi neta nimagu akailagasi dabadi abisikonedi, e Baloma Kimaasabaina bei sibabane.’
20 E kina go Pita kana,
‘Saimoni, kom kunuwonúwana itoboinem Yaubada ina yabobona kutabubuli, tauna bego kom mam mani kuvailai vata! 21 Kom geya itoboinemta kusiukoima be ima paisewayana kuguinuwe. Yaubada matana goi kom nuwom geya ipalupaluta. 22 Tauna im goyo moe manuna kutugavīla go, kukawanōi Tomoya yaina. Nakona im nuwogau goyogoyoina bei inuwotao. 23 Moitamo. Agitem kom nava goyo bolotona goi kwaiyaka o tadigo kada, “Sinapu goyo iyowóim.” ’
24 Go kina Saimoni idigo kana,
‘Ami taiyuwo kokawanōi Tomoya yaina manugu bego moe dogoiyadi koodigedi taabu siisowōduwo yau yaigu.’
Pilipo Vala Dedevina italavaite yunika yaina
25 E tuwo, tauyadi Tomoya valena sitalavaite nakae siliwolae. Ikavava, sikaluvila sina Yerusalema. Go sinonoina asa badabadaidi giyaidi goi Vala Dedevina sitaalavaite da Samériya yaidi.
26 E kina go Yauwe ina anerose ina Pilipo ilatuwoko idigo kana,
‘Pilipo, kutāoya, kūna youya dadavina. Enao Yerusalema goi go, isou ina Gasa go, nauyayanaidi, e amoko goi kuuketōiya.’
Amo enaoyana moe yoyowo goi. 27 E tuwo moitamo tauyana itaoya, ina enaoyana goi iiketoiya. Iiketoiya, ikandobala koroto tayamo Yerusalema goi imamaima igite. Tauyana Iteopia korotoina go, korotoyana yunika.‡a Yunika: Ame tauyana Totuyoyowo tayamo. Neta koroto powona sibobo tauyana siduduwe ‘Yunika.’ Ame sinapuyana siguinuwe bego korotoyana itoboine tolovina tayamo monenao vevina irugwausidi. Neta koroto geya powonamo manuna tolovinayana geya inuwonuwoneta bego imasisi vevina taiyao. Diyuu idi lovina goi yunika geya itoboinedita sisiu Diyuu yaidi goi unana Atukeda 23:1 isanabodedi (Ais 56:3-6). Tauyana koroto gagaina, ina paisewa moe Kendesi‡b Kendesi: Ame geya vavina yoina, go sem ana yagoina moe tolovina. Ame vavinayana yoina geya tayagoiyeta. da Iteopia adi giyovila ina topaisewa; giyovilayana ina esaesa madabokina irugwausidi. Korotoyana boi ina Yerusalema goi isakululu Yaubada yaina 28 go, ina sakululuyana bogina ikavava, tuwo ikaluvila inonoina bego ina kasa. Moe pasina ame enaoyana goi Pilipo ivalobode. Ivalobode, korotoyana ina sariyota goi iitusobu go, niyana gagaina goi Yaubada ina tokabivalavala Aiseya ina buki ikaatuyaivi. 29 E Baloma Kimaasabaina Pilipo ilatuwoko idigo kana,
‘Pilipo, kubāla kūna sariyota kikina kuuketōiya.’
30 E tuwo moitamo Pilipoyana ilokoina ina sariyotayana kikina goi iiketoiya go, korotoyana inove tokabivalavala Aiseya ina buki ikaatuyaivi. Tuwo idigo kana,
‘Tomwanayadi kwaatuyaividi kuyagoi kaga adi yagoina gea geya?’
31 ‘Geya ayagoidita go! Manakaegu bei ayagoidi? Geya vatau tayaamo ikaaiyaka itoboine tomwanayadi ivatulukoigu’, korotoyana kaena.
Tuwo ikawanoi Pilipoyana yaina idigo kana,
‘Kusowōya, kikigu goi kutusōbu.’
Tuwo Pilipoyana isowoya kikina goi itusobu korotoyana taiyao. 32 Ego tomwanayadi Gínina Kimaasabaina goi ikaatuyaividi moe ame nakae kana,
‘Nakae sipi neta sivakede
ina sikaumate bei itugau,
o nakae lami‡ Lami: Sipi natuna yoina lami. neta unuununa ana tokúpwana
matana goi iitaoya itugau,
e Tauyana nakae.
Tomota matadi goi iitaoya siyogedegede go,
ona inuwa itugau.
33 Tomota sigieomaemae go,
ana takínona geya ipalupaluta.
E Tauyana geya natunamo go,
yawoina poyapoya ame goi ikavava.
Tauna avatau itoboine
Tauyana natunao ivatetelidi? Geya.’
Aiseya 53:7-8
34 E Pilipo itusobu go, kina yunikayana idigo kana,
‘Akawanoi yaim kulatuwokoigu, tokabivalavalayana avatau manuna ibobóbwara, toinina manuna gea ituli ta tomota manuna?’
35 E ame tomwanayadi goi Pilipo ivatowo Yeisu Valena Dedevina italavaite yunika yaina.
36-37 E enao goi sinonoina, bwae sibabane, tuwo yunikayana idigo kana,
‘Kwandosōbu. Bwae gotono! Manakae? Avatau itoboine sayóyova ivagagalakoigu? Geya ae?’‡ Tomwana 37 nakona Luke geya iginiyeta, go sem tokaidámana tayamo nakona toinina ina nuwonúwana igini. Tomwana 37: E Pilipoyana idigo kana, ‘U. Neta nuwom madabokina goi Yeisu kunumise, moitamo bei asayoyoim.’ E yunikayana idigo kana, ‘Anumisa bego Yeisu Guyau moe Yaubada Natuna.’
‘U. Nakae’, Pilipo kaena.
38 Tuwo ina topaisewa ilatuwoko idigo kana,
‘Sariyota kusayāte.’
Sariyotayana isayata ikavava, yunika be Pilipo adi taiyuwo sisou siiwo sina bwaeyana goi yunika isayoyoi.
39 E tutayana bogina isayoyoi, bwae goi sisinalaga go, Yauwe Balomaina matabuwona Pilipoyana ikabi inave ituli ta kasa goi iyato. Tuwo yunikayana geya tuwaina Pilipo igite. Yunikayana mana uyáwana bogina inonoina toinina ina kasa Iteopia.
40 E kina go Pilipoyana asa Asotasi goi isowóduwo. Ago ivanibiníbita asa tamo tamo goi Vala Dedevina itaalavaite ana kadókana ina Sesariya.
‡8:5 Pilipo: Ame tauyana igimisowóduwo Guinuwa 6:5 goi.
‡a8:27 Yunika: Ame tauyana Totuyoyowo tayamo. Neta koroto powona sibobo tauyana siduduwe ‘Yunika.’ Ame sinapuyana siguinuwe bego korotoyana itoboine tolovina tayamo monenao vevina irugwausidi. Neta koroto geya powonamo manuna tolovinayana geya inuwonuwoneta bego imasisi vevina taiyao. Diyuu idi lovina goi yunika geya itoboinedita sisiu Diyuu yaidi goi unana Atukeda 23:1 isanabodedi (Ais 56:3-6).
‡b8:27 Kendesi: Ame geya vavina yoina, go sem ana yagoina moe tolovina. Ame vavinayana yoina geya tayagoiyeta.
‡8:32 Lami: Sipi natuna yoina lami.
‡8:36-37 Tomwana 37 nakona Luke geya iginiyeta, go sem tokaidámana tayamo nakona toinina ina nuwonúwana igini. Tomwana 37: E Pilipoyana idigo kana, ‘U. Neta nuwom madabokina goi Yeisu kunumise, moitamo bei asayoyoim.’ E yunikayana idigo kana, ‘Anumisa bego Yeisu Guyau moe Yaubada Natuna.’