1 Dimithi, dhuwala ŋurruŋunydja dhäruk ŋarra yurru ḻakarama mirithirri dharrpal. Ḻakaraŋa ŋuripa yolŋu'-yulŋuwanydja, walala yurru bukumirriyama yukurra ŋäŋ'thun ŋanya Godnha ŋula nhäku; walala yurru wirrki yana wal'ŋu bukumirriyamanydja yukurra bukmakku yolŋu'-yulŋuwu, märr-ŋamathinyarayu yana, märr yurru ŋayi Godthunydja wiripu-guḻku'nhanydja walŋakuma. Ga bitjandhi nhuma yurru yukurra buku-wurrpandhi Godnha. 2 Nhuma yurru bukumirriyamanydja yukurra buŋgawawu walalaŋgu yolŋu'-yulŋuwu, ga birrka'mirriwu ŋuriki ŋunhi walala ŋurru'-ŋurruŋu wal'ŋu, märr yurru ŋilimurru nhina yukurra walaŋguma dhika wal'ŋu yana, ŋula nhämiriw marimiriw wäŋa yurru yukurra djingaryun, märr yurru ŋilimurru märryu-ŋupan yukurra Godnhanydja ga nhina märr-dhunupa wal'ŋu yana.

3 Yo, manymaknha ŋunhinydja ŋunhi ŋuli yolŋu'-yulŋu yukurra nhina waŋgany-manapanmirri yänanydja, marimiriwyamanydja, ga bitjandhiyi ŋayi Godtja ŋayaŋu-djulŋithirriyi ŋuli ŋuriŋiyi, liŋgu ŋayina ŋilimurruŋgunydja Walŋakunharamirri. 4 Wirrki ŋayi yana ḏukṯuk bukmakkunydja yolŋu'-yulŋuwu walŋakunharawu, märr yurru walala nhina mukthun yana-wala marŋgiyirri marrtji, bala maḻŋ'maramana marŋgithirrina yuwalkŋuwunydja ŋurikiyi. 5 Liŋgu waŋgany yana ŋunhiyi yuwalktja God, ga bitjandhi waŋgany yana yolŋunydja ŋunhi ŋayi yurru yukurra yolŋu'-yulŋunha gäma galkikumanydja Godkala, Djesu-Christthu ŋayipi yana, ŋunhiyi ŋunhi ŋayi nhinana yukurrana dhiyala yolŋu yana ŋayi rumbal wal'ŋu. 6 Bala ŋayi wekanhamina nhanŋuway walŋana, ga burakinanydja ŋayi ŋilimurruŋgalana dharapulŋura bukmakkala, ga ŋuriŋi nhanukalaynydja gulaŋ-waṉḏinyarayu ŋayi ŋilimurrunhanydja märraŋalana ŋuliŋuruyinydja goŋŋura ŋurikala yätjkalanydja wal'ŋu. Ŋuliwitjandhinydja Godthu milkuŋalana ŋilimurruŋgala ŋunhi ŋayinydja yuwalk yana ḏukṯukthina ŋayi yurru walŋakumanydja bukmaknha yana yolŋunha walalanha. 7 Ga dhiyakuyinayi Godthu djarr'yurruna ŋarranhanydja, bala djuy'yurrunanydja ŋayi ŋarranha, märr yurru ŋarra ḻakaramana ŋuruku wiripu-guḻku'wunydja ŋunhi yolŋu'-yulŋuwu bukmakku yana. Yuwalk yana ŋarra yukurra dhuwala ḻakaramanydja, yaka bothirri. Ŋayi djuy'yurruna ŋarranha ŋunha mulku'-mulkuruwalanydja, märr yurru walala märr-yuwalkthirri, bala märramana Godkunydja ŋunhi yuwalktja wal'ŋu gatjaḻ'.

8 Yo, dhiyakuyinayi ŋarranydja djäl nhuma yurru ḏarramuwurrunydja yukurra bukumirriyama ŋäŋ'thundja Godnha birrka'mirriŋura wäŋaŋura. Yaka yana yukirriya ŋarrtjunmiya ga maŋutji-ḏi'yunmiya bala-lili'yunmiya, yana nhuma dhärriya yukirriya Godkalanydja ḏarrtjalk yana ŋula nhämiriw wal'ŋu ŋayaŋunydja, ga ŋarambiyany'tja nhuma yurru garrwarthiya Godkala, buku-ŋal'yurra biyakana Godku. 9 Ga nhumanydja dhäykawurrunydja yurru dhaṯthunmiya ŋamathaŋa wal'ŋu yana. Yaka dhaṯthunmiya girri'yu ŋuriŋinydja rumbal-milkunharamirriyunydja, be nhäyunydja rrupiya-guḻku'mirriyunydja ga ŋutjaŋ-bakmaranhamirriyunydja girri'yu, ga yaka yana marwattja nhuŋuway buta'kuŋa ŋula nhäyunydja girri'yu. 10 Ga ŋunhi yurru nhuma dhäykawurruyunydja djäma ŋamakurru' yana, ga guŋga'yun yurru yukurra wiripuŋunhanydja yolŋunha, ŋuriŋiyinydjayi nhumanydja yurru yuwalkkumana buta'yirri. 11-12 Mäkiri'-witjurra biyaka Godkalaŋunydja dhärukku ga marŋgithiya. Yaka guyaŋinyamiya nhunapinyay nhe be djambatj-ḻakaranhamiyanydja, yanapi nhe marŋgi bukmakkuna. Yaka ŋarra ḏukṯuk nhuma yurru dhäykawurrunydja ŋunha ŋurrulili wapmaranhamiya ḏarramuwurruŋgalanydja. Dhäykayunydja yurru yaka marŋgikuma ḏarramuwurrunhanydja; nhina ŋayi yurru yukurra mukthun yana marŋgiyirri. 13 Liŋgu Godthunydja ŋunhi ŋamaŋamayurruna Yadamnha ŋäthilinydja, ga ŋuliŋuruyi ḏarramuwalanydja ŋayi djäma miyalknhana Yepnhana. 14 Yaka ŋayi Yadamnhanydja ŋunhi mayali'-wilkthurruna ŋuriŋiyi bäpiyunydja, yurru ŋunhiyi miyalk mayali'-wilkthunaranydja ŋurikiŋi bäpiwuŋunydja, bala ŋayi gärrinana yätjlilina romlili. 15 Yurru Godthunydja ŋanya yurru miyalknha walŋakuma warray, ŋuliwitjanna ŋunhi ŋayi yurru miyalkthu yothu'nha gurrukama. Ga ŋunhi yurru miyalkthu mukthundja-wala märr-nherraṉmirri Garraywalanydja, ga märr-ŋamathirri wiripuŋuwu yolŋuwu, ga yarrkthun yurru ŋulaŋuru yätjŋuru, bala ŋayi yurru ŋunhi dhäykanydja nhina yukurra walŋana Godkalana yana nyeyaḻŋura.