1 Marrkapmirri walala, yumurrku' ŋarraku, ŋarra wukirrinydja yukurra dhäruktja dhuwala nhumalaŋgu, dharraykuma yukurra nhumalanha, märr yurru nhuma yaka djäma ŋula nhä yätj. Ga ŋuli nhe yurru djämanydja yätj ŋula nhä, ŋuriŋi yana liŋgu bilyurranydja roŋiyiya nhanukala Djesu-Christkalanydja, liŋgu ŋayipina ŋunhi dhuwurr-ŋamakuḻiny'tja, ga bukumirriyama ŋayi yukurra Gunhu'nha, ŋäŋ'thundja yukurra ŋilimurruŋguna, märr yurru Godthu bäy-ḻakarama ŋilimurruŋgu. 2 Ga yuwalk yana Godthu yurru buwayakkumanydja warrpam'thun yätjtja ŋilimurruŋgu, liŋgu Djesunydja ŋunhi burakina ŋilimurruŋgala dharapulŋura. Gunhu'yu nhäŋala nhanukala ŋunhi gulaŋ-waṉḏinyara, bala yana märraŋalana ŋunhiyi nhanukuŋu wekanhaminyaranydja, ga bitjarrayi liŋgu ŋayi märraŋalayi ŋitjalanhanydja dhambay-manapara Djesuwala. Yurru yaka ŋayi rakunydhina ŋilimurruŋgalaŋunydja yana yätjku buwayakkunharawu, yuwalktja ŋayi ŋunhi burakinanydja walŋakunharawu bukmakku warray, bawala'mirrilili warray wäŋalili, märr yurru walala yaka yarrkthun Godkala gupaḏalkumanydja dhambay-manapan yätjkalanydja.

3 Yo, Godtja ŋunhi märr-ŋamathinyaramirri dhika wal'ŋu, ga ŋunhi ŋali ŋuli ŋayathamanydja yukurra rom ŋunhiyinydja ŋunhi ŋayi Godthu nherrara ŋilimurruŋgu, ŋuriŋinydjayi ŋilimurru ŋuli dharaŋanmirrina ŋunhi ŋilimurrunydja yuwalk yana wal'ŋu marŋgi Godku nhanŋuway. Ga dhuwalana romdja ŋayi ŋunhi nherrara gam', “Märr-ŋamathinyamiya bala-lili'yunmiya walala,” bitjarra. 4 Ga ŋunhi yurru balaŋu yolŋu yakanydja märr-ŋamathirri wiripuŋuwu yolŋuwu, yana ŋayi yurru waŋa ḻakaranhamirri märr-yuḏakthunmirri bitjan, “Ŋarranydja dhuwala marŋgi warray Godkunydja,” ŋayi ŋuriŋiyinydjayi yolŋuyu yukurra bothirrina ḻakarama, djawukinyaramirrina ŋayi ŋunhiyinydja; yakana yukurra Godku yuwalkŋunydja nhina nhanukala ŋunha ŋayaŋuŋura wal'ŋu, liŋgu yarryundja ŋayi yukurra ŋurikiyi romgu ŋunhi Godthu nherrara ŋunhiyi. 5 Ga ŋunhi ŋali ŋuli märrama dhäruktja Godnha ga yuwalknha ŋali märr-ŋamathirri yukurra wiripuŋuwunydja yolŋuwu, bala ŋali yurru dharaŋanmirrina yana, ŋunhi ŋali yukurra yuwalknha wal'ŋu nhinana waŋganyŋurana Godkalana märr-ŋamathinyaraŋura yana. 6 Ga ŋunhi ŋali yuwalktja nhina yukurra waŋganyŋuranydja Godkala, bala ŋali yurru marrtji yukurra malthun nhanŋuwaynha yana Djesuwuna goyurrwu, ga nhina yurru yukurra ŋunhilimi liŋgu romŋura, ŋunhi ŋayi ŋuli yukurranha Djesu nhinanha dhiyala munatha'ŋura.

7 Yo marrkapmirri walala, yaka ŋarra yukurra dhuwala nherraṉ yuṯanydja rom nhumalaŋgu, ŋäthiliŋu yana ŋunhiyi märr-ŋamathinyaramirri rom, ŋunhiyi yana liŋgu ŋunhi nhuma yukurrana ŋäkula beŋuru liŋgu ŋurruŋuru yana. Liŋguna nhuma marŋgina ŋurikiyi ŋäthiliŋuwunydja romgu. 8 Yurru romdja ŋunhiyi ŋarra yukurra ḻakaramanydja nhumalaŋgu yuwalknha wal'ŋu yuṯa, liŋgu Djesunydja ŋuli ŋayipinydja märr-ŋamathirri yukurra ŋilimurruŋgunydja yuwalk yana wal'ŋu, ga bitjandhi nhumanydja yurru märr-ŋamathinyaramirri yana walala bala-lili'yunmiya. Liŋgu ŋunha munhanydja marrtji winya'yunna bala, ga yuwalkŋunydja djarraṯawun' dhuwalana liŋguna; liŋguna dhuwalana räkukumana ŋayi yukurra dhuwala munatha'nhanydja wäŋanha. 9 ŋuli nhe yurru waŋa bitjandja, “Ŋarranydja yukurra dhuwala nhina djarraṯawun'ŋura warray,” bitjandja, yurru nhe yukurra nyamir'yun warray wiripuŋunhanydja yolŋunha Garraywalaŋumirrinha, yuwalktja nhe ŋunhi mukthun nhina yukurra buku-munha'ŋura warray. 10 Ga ŋunhi nhe märr-ŋamathirri yukurra nhokalaŋuwu wäwawu ga yapawu, bukmakku yana Garraywalaŋumirriwu yolŋu'-yulŋuwu ŋunhi, bala nhe yuwalkthi nhinanydja yukurra djarraṯawun'ŋurana, yakana nhuna yurru ŋula nhäyu galkinyamaramanydja yätjlili.

11 Yo, ŋunhinydja yolŋu ŋunhi ŋayi ŋuyulkthirri yukurra nyamir'yun wiripuŋunha yolŋunha Garraywalaŋumirrinha, nhinanydja ŋayi yukurra ŋunhiyinydja yolŋu mukthun yana ŋunhili buku-munha'ŋura, yakana ŋayi marŋgi wanhawitjan ŋayi yukurra marrtji, liŋgu ŋayi yukurra ŋunhi marrtji buku-munha'kurru yana, ga buku-munha'yunydja ŋuriŋiyi ŋanya bambaykuŋalana maŋutjina. Bala djäma ŋayi ŋuli yukurra bitjanna nhä malanha yätjnha wal'ŋu yana, liŋgu yaka ŋayi yukurra wiripuŋuwu yolŋuwu märr-ŋamathirri ŋuli.

12 Ŋarraku yumurrku', Godthunydja liŋguna buwayakkuŋala baḏuwaḏuyurruna yätjtja nhumalaŋgu, liŋgu nhuma märr-nherraṉmirri yukurra nhanukala Djesuwalana, ga dhiyakuyi märrwu ŋarra yukurra wukirrinydja dhuwala dhäruktja nhumalaŋgu. 13 Yo, nhuma ŋurru'-ŋurruŋu yolŋu'-yulŋu, ŋarra nhumalaŋgu wukirrinydja, liŋgu nhuma marŋgi Christkuriydja, ŋurikiyina ŋunhi ŋayinydja walŋa beŋuru liŋgu ŋurruŋuru. Ga bitjandhi liŋgu ŋarra nhumalaŋgu wukirri yukurra yuḏayuḏawunydja, liŋgu nhuma yukurra dhärra yana wuṉḏaŋarryirri Garraywala gali'ŋura, ga liŋguna nhuma djuḻkmaraŋalana dhuḏi'yunmaraŋalana ŋunhi Yätjnhanydja Mokuynhanydja, ga nhanŋu nhäŋiniŋ' yätj ŋunhi rom. Ga bitjandhiyi liŋgu ŋarra wukirri yukurra nhumalaŋgu yumurrku'wunydja, liŋgu nhumanydja marŋgi Godku Bäpawu.

14 Yo, dhuwalanydja dhäruk nhumalaŋgu Bäpa'mirriŋuwu walalaŋgu, liŋgu nhuma marŋgi ŋurikiyinydja ŋunhi ŋayi walŋa nhina yukurra ŋulaŋuru liŋgu ŋurruŋuru. Ga bitjandhi liŋgu nhumalaŋgu yuḏayuḏawunydja, ŋarra wukirri yukurra nhumalaŋgunydja dhipala djorra'lilina, liŋgu nhuma dhärra yukurra wuṉḏaŋarr yana Christkalanydja nhanukalay walŋayu, liŋgu ŋayathamana nhuma yukurra baṯ bitjanna yana Godku dhäruktja nhumalaŋgalay ŋunha ŋayaŋuyunydja, bala nhuma nhinana yukurra ŋunhili nhanukalaynha gali'ŋura, ga liŋguna nhuma yarrkmaraŋalana ŋanyanydja ŋunhiyi Yätjnhanydja Birrimbirrnha.

15 Yaka märr-ŋamathiya dhiyakuywunydja munatha'wuywunydja romgu, ga yaka yana djäl-ḏumurruyiya munatha'wuywunydja nhäku malaŋuwu. Ŋuli nhe märr-ŋamathirrinydja yukurra dhiyakuywunydja munatha'wuywunydja romgu, ŋunhiyinydja nhe yakana yukurra yuwalk märr-ŋamathirri Godkunydja Bäpawunydja. 16 Liŋgu ŋunhiyi munatha'wuynydja nhä malanha barrkuwatj warray, ganaŋ'thun warray yukurra ŋulaŋuru Godkalanydja Bäpawalanydja nhäŋuru malaŋuŋuru, yakana yurru ŋula yolthu yolŋuyu ŋayathama rrambaŋikumanydja munatha'wuynha ga djiwarr'wuynha. Yo, ŋuli nhe yukurra ŋoy-ŋapu'yundja ŋula nhäku malaŋuwu, malthun marrtji yana ŋuli nhokalayŋunydja nhe djarrpi'wunydja djälwu, ga bitjan liŋgu ḏukṯukthirri mel-yalmanga'yirri nhäku malanyŋuwu, ga ŋurr'yunna nhe ŋuli yukurra ŋuriki nhäku ŋunhi nhe ŋayathama yukurra, yana bathala-ḻakaranhamirrina bitjanna nhunapinya nhe, ŋunhi nhe balanyarayinydja yolŋu, ŋunhiyinydja nhe yaka Godkunydja Bäpawunydja yolŋu; nhenydja ŋunhi dhiyakuynha bäymana munatha'wuynha, liŋgu dhuwalayinydjayi rom dhiyakuynha yana munatha'wuynha. 17 Yaka warray biyaka djäl-ḏumurruyiya munatha'wuywunydja nhäku malaŋuwu, liŋgu munathany'tja wäŋa dhuwala marrtji yurru winya'-winyayun warray bala, galki yurru winya'yunna, rrambaŋithirrina ŋunhiyi munatha'wuynha nhä malanha ŋunhi ŋuli yukurra yolŋu walala ŋurikiyi ŋoy-ŋapu'yun. Ga ŋunhinydja yolŋu ŋunhi ŋayi ŋuli djäma marrtji mukthun bala Godkala yana djälkurru, ŋunhiyinydjayi yolŋu yurru yukurra nhina walŋana, gupaḏalnha-wala yanana.

18 Yo yumurrku' ŋarraku, dhuwalanydja dhä-yawar'yunaraŋurana yulŋunydja, galki yurru ŋayi Godthunydja winya'yunmaramana dhuwala munathany'tja wäŋanha, warrpam'thunna yana yurru dhawar'maramana. Ŋäkula warray nhuma ŋunhiyinydjayi yolŋunha yäkunha Anti-Christnhanydja, ŋunhiyinhanydja ŋunhi ŋayi yukurra nyinyaŋdhun Christku. Ŋäkula nhuma liŋgu ŋanya, ŋunhi ŋayi yurru galki bunana, galkina ŋayi yurru maḻŋ'thunna baṉarra'lilina wapthun. Yurru dhiyaŋunydja-wala dhuwala guḻku'yuna dhika yolŋuyu walalay yukurra djäma dhiyala munatha'ŋuranydja ŋuriŋi liŋgu yana yätjthu birrimbirryu ŋunhi ŋayi yukurra ŋaramurrthirri ga nyinyaŋdhun Christku. Ga bitjandhiyina ŋali marŋgithirri yukurra ŋunhi dhuwalayinydja-wala dhawar'yunaramirrina walu.

19 Ŋäthilinydja ŋunhiyinydja walala ŋuli yukurranha waŋgany-manapanminya ŋilimurruŋgala Garraywalaŋumirriwala ŋurikala yolŋu'-yulŋuwala, bala walala gonha'yurrunana ŋunhiyinydja ŋilimurrunha miṯtjinhanydja, liŋgu walala yaka yuwalkkuŋala waŋganydhina ŋilimurruŋgala. Ŋunhi bini walala waŋganydja ŋayaŋu ŋilimurruŋgalanydja yana, walalanydja bini mukthunna yana waŋgany-manapanminya ŋilimurruŋgala ŋunhili miṯtjiŋura. Yurru walalanydja liŋgu gonha'yurrunana, märr yurru ŋilimurru nhäma warraŋulnha wal'ŋu, bala dharaŋanna yurru ŋunhi yaka yana walala yuwalktja waŋganydhirn yukurra ŋilimurruŋgala Garraywalaŋumirriwalanydja yolŋu'-yulŋuwala, yaka walala yuwalk marŋgi Christku. 20 Yurru nhumanydja marŋgina yuwalkŋuwunydja, warrpam'nha yana, liŋgu ŋunhiyi Garrkuḻuknha wal'ŋu Walŋa ŋayipina gulŋiyirri yukurra nhumalaŋgala ŋayaŋuŋura, ga ŋayina yuwalkkumanydja ŋuli yukurra marŋgikuma ḻakarama nhumalaŋgu.

21 Yo, nhuma marŋgina liŋguna ŋurikiyi yuwalkŋuwunydja. Yaka ŋarra dhuwala yukurra guyaŋirri nhumalanha yanapi nhuma dhuŋanydja. Ŋarra wukirrinydja yukurra dhuwala nhumalaŋgu, liŋgu nhuma marŋgina ŋunhi yakana ŋula waŋgany bothinyaranydja dhäruk yurru marrtji yukurra dhawaṯthun ŋurikala yuwalkŋuwalanydja Christkala. 22 Yol ŋayi bothinyaramirrinydja ŋunhiyi ḻakaranhamirri? Ŋunhiyinydja ŋunhi ŋayi waŋa ŋuli buku-nherraṉ Djesunha bitjan, “Djesunydja dhuwala yolŋu warray yana. Yaka ŋayi ŋunhi walŋakunharamirri Christ ŋulaŋuru Godkuŋu djuy'yunara,” ŋunhinayi yolŋu djawukinyaramirrinydja ḻakaranhamirri, ga miriŋu ŋayi Christku, ŋunha bala gali'ŋura yana, liŋgu ŋayi buku-nherraṉna yukurra Godnha Bäpanha ga Gäthu'mirriŋunhanydja nhanŋuway Godku. 23 Ŋuli yurru ŋayi ŋula yolthu yolŋuyu buku-nherraṉ ŋanya Djesunha, yaka ŋayi ḏukṯuk ŋurikiyi Gäthu'mirriŋuwu, yuwalktja ŋayi ŋuriŋiyinydjayi yolŋuyu buku-nherraṉ yukurra Godnha Bäpanha. Ga ŋunhi ŋayi ŋuli yolŋu märr-yuwalkthirri yukurra Djesunha, ga waŋa ŋuli ŋanya bitjandja, “Yuwalk muka ŋayi ŋunha Godku Gäthu'mirriŋunydja,” bitjandja, ŋunhinayi yolŋu yuwalktja marŋgi Godku Bäpawu, ga nhina ŋayi yukurra waŋganyŋura nhanukala Godkala.

24 Yo, mulkiya baṯ biyaka ŋunhiyi liŋgu dhäruknha ŋunhi nhuma ŋäkula beŋuru ŋurruŋuru. Ŋunhi nhe yurru märr-yuwalkthirri yukurra ŋurikiyi bili dhäwu'wu, ga yakana ŋuli märrama wiripu dhäwu' ŋanya Djesunha, bala nhe nhinanydja yukurra yurru dhambaynha yana Gäthu'mirriŋuwalana ŋunhi, ga bitjandhi liŋgu nhe yurru nhinayi galki nhanukala Bäpa'mirriŋuwalanydja, waŋganyŋurana yana nhanukalana. 25 Ga bitjarrayi ŋunhi Godthu dhawu'-nherrara ŋilimurruŋgu, ŋilimurru yurru nhina yukurra walŋana, galkina yana nhanukala bitjanna liŋguna, gupaḏalnha yurru.

26 Yo, wukirrinydja ŋarra yukurra dhuwala dhäruktja nhumalaŋgu Garraywalaŋumirriwu yolŋu'-yulŋuwu, yana djäkakuma ḻakarama ŋunhinha bothinyaramirrinha ḻakaranhamirrinha walalanha, märr nhumalanha walala yurru yaka mayali'-wilkthundja, bala gatjpaḻ'marama gäma wiripuŋulili dhäruklili. 27 Yurru nhumalaŋgunydja ŋayipi Christthunydja liŋguna wekaŋalana nhanŋuway ŋunhiyi Garrkuḻuknha Birrimbirr, ga nhinanydja ŋayi yukurra dhuwalina nhokalana ŋayaŋuŋura. Yakana nhe yukurra yurru warrya'yun ḻarruma yolŋuwu, märr yurru ŋayi ŋula yolthu nhuna marŋgi-wekamanydja, liŋgu ŋayi Godkalanydja Birrimbirryu yukurra marŋgi-wekamana nhuna bukmakkuna nhäku malaŋuwu, ga ḻakaramanydja ŋayi yukurra ŋunhiyi yuwalknha, yakana bothirri. Yo, ŋayi Garrkuḻukthu Birrimbirryu marŋgi-wekaŋala nhumalaŋgu yuwalknha wal'ŋu yana, bala nhiniyanydja yukirriya ŋunhili liŋgu dhärukŋura, dhambay Garraywala yana.

28 Yumurrku' ŋarraku, biyaka nhiniya galki yana dhambay-manapanmiya Christkala, märr yurru nhe dhärranydja gumurrŋuranydja nhanukala rum'rumdhunamiriwnha wal'ŋu ŋunhi ŋayi yurru maḻŋ'thundja; märraŋa ŋanya dhäruktja, märr yurru nhe yakana dhuḏi-yarrkthundja goranydja nhanŋu, ŋunhi ŋayi yurru bunanydja. 29 Liŋgu muka nhe marŋgi yulŋunydja nhanŋu Christku, ŋunhi ŋayinydja rom-dhunupa wal'ŋu, ga wiripunydja nhe marŋgi ŋuriki yolŋuwu ŋunhi ŋayi ŋuli djäma yukurra ŋamathama wal'ŋu, ŋunhiyinayi yolŋu liŋguŋuwuynha yuṯathinyara ŋuriŋi Godkalana walŋayu.