1 Aipo erekwaw àràpuhàrànetea'yr hehaite ma'e wazexak kar haw 'ar.

Aipo erexak arapuha kaiwer pe har izexak kar mehe.

2 Màràn zahy umumaw wahy waneraha pà wie pupe. Aipo erekwaw.

Ma'e 'ar mehe imemyrzexak kar wà. Aipo erekwaw.

3 Màràn mehe uwezyw wà umemyrzexak kar pà wà,

Umemyr ko ywy rehe wanerur pà wà. Aipo erekwaw.

4 Wamemyr itua'u ikàg ma'e romo kaiwer pe wà.

A'e re oho wà, nuzewyr kwaw wà.

5 Mo umuhem kar zumen hehaite ma'e wazar wi wà.

Mo umuata kar wanemimutar rupi wà, wazar imono 'ym pà wanupe wà.

6 Amono ywyxiguhu wanupe waneko haw romo ihe wà.

Amuigo kar ywy xa heta haw rehe wà.

7 Nuputar kwaw tawhu iànoànogaw wà. Ni amo nupuner kwaw wazar romo weko haw rehe wà.

Ni amo nupuner kwaw ma'e heraha kar haw rehe wakupe pe wà.

8 U'u ka'api'i ywytyruhu rehe wà.

Wekar wyzài ka'akyr wemi'u ràm romo a'e pe wà.

9 Aipo amo tapi'ak hehaite ma'e ima'ereko wer putar newe nehe.

Aipo uker putar pyhaw nereimaw wapyta haw pupe pàrirogaw pupe.

10 Aipo erepuner iàpixipixi haw rehe kyhàhàm pupe ywy iwykawyka kar haw rehe izupe.

Aipo umutyk putar ywy iwykawyka pà newe nehe. Aipo umutyk putar ywy kàràz taw newe nehe.

11 Aipo erepuner ikàgaw uhua'u ma'e rehe nezeruzar haw rehe.

Aipo a'e ae uzapo putar nema'ereko haw ipuhuz ma'e newe nehe.

12 Aipo werur putar arozràn neremimono'og ràm no.

Aipo umuapyteràkwà arozràn imono'og pà newe.

13 Wiranu uzepepopetepetek e na'arewahy a'e.

Nezewe rehe we nuwewe kwaw hoko ài.

14 Wiranu upi'amomor ywy rehe.

Nezewe mehe ywyxiguhu haku ma'e umuaku a'e.

15 — Aze ru'u amo upyrog putar herupi'a rehe nehe, ni'i pixik kwaw uzeupe.

— Amo miar hehaite ma'e upuner ika haw rehe nehe, ni'i kwaw uzeupe.

16 — Naiko kwaw a'e ma'e rupi'a izar romo ihe, i'i ru'u uzeupe. Amo upuner hemiapo kwer imuaiw paw rehe wà.

Nezewe rehe we nuzekaiw kwaw hehe.

17 Ihe amuigo kar wiranu iranaiw ma'e romo ihe.

Namono kwaw ma'e kwaw katu haw izupe.

18 Nezewe rehe we uzàn mehe uzàgatu na'arewahy a'e.

Upuka wyzài kawaru rehe, wyzài kawaru kupe pe har rehe.

19 Izo. Aipo ne kawaru eremuigo kar ikàg ma'e romo ne wà.

Aipo eremupuràg eteahy kar kawaru iatuwa i'aw imono pà hehe.

20 Opoopor tukur ài wà. Aipo ereiko wamopor kar har romo ne.

Teko ipytuhegatu waze'eg mehe. Aipo ereiko wamuze'eg kar har romo.

21 Iho wer wà, a'e rupi uzehàwykàwykàz ywy rehe opo pupe wà.

Uzàn oho zeàmàtyry'ymawhu pe ukàgaw nànàn wà.

22 Nukyze kwaw wà. Ni amo ma'e numukyze kar kwaw wà.

Takihepuku numuzewyr kar kwaw wà.

23 U'yw upepoze'egahy wa'aromo ukwaw mehe wà.

Purukutukaw wà, u'ywpuku wà no, heny katu wanenataromo wà no.

24 Uryryryryz wà, ta'e iho wer na'arewahy wà xe. Na'e uhem oho uzàn pà wà.

Xi'àm ma'e 'ak kwer iapo pyrer ipy mehe nupuner kwaw upytu'u haw rehe wà.

25 Uwazar xi'àm ipy haw uze'eg pupe wà.

Muite wi wetun zeàmàtyry'ymawhu wà. Wenu zauxiapekwer wanehapukaz taw wà no.

Wenu tuwihaw wà no, zauxiapekwer wanupe ma'e iapo kar mehe wà no.

26 Aipo ne eremu'e kàkà iwewe haw rehe.

Upepozaz kwarahy ihemaw awyze har kutyr uwewe pà. Aipo eremu'e a'e ma'e rehe.

27 Aipo ereiko wiràhu izar romo.

Aipo wàro neze'eg waity ywate har iapo 'ym mehe.

28 Wiko ita ywate wera'u ma'e rehe.

Ywate itahu i'aromo uzapo waity ikatu 'ymaw wi imonokatu pyr.

29 A'e pe wiko mehe wexak wemiar ràm wemipyhyk ràm.

Heha wexak ma'e muite har.

30 Aze amo miar umàno, wiràhu uzemono'og a'e pe wà.

Imemyr u'u huwykwer wà.