1 Aze'eg putar newe zakarehu erewiàtà her ma'e rehe nehe kury. Aipo erepuner ipyhykaw rehe pina pupe.

Aipo erepuner iapeku iàpixipixi haw rehe kyhàhàm pupe.

2 Aipo erepuner iapygwar rupi kyhàhàm imono haw rehe iàpixipixi pà.

Aipo erepuner hazyw ikutukaw rehe ma'e hàty'àz ma'e pupe.

3 Aipo wenoz putar uzemuhem kar àwàm newe nehe.

— Hepuhareko pe ne nehe, aipo i'i putar newe nehe.

4 Aipo uzapokatu putar uze'egaw nerehe we nehe.

— Amumaw putar hekwarahy paw newe hema'ereko pà ihe nehe, aipo i'i putar newe nehe.

5 Aipo erezemaraz putar hehe we wiràmiri ài nehe.

Aipo erezàpixipixi putar nehe, kuzà newe uma'ereko ma'e wanupe imono pà wazemaraz taw romo nehe.

6 Aipo ereme'eg putar pira pyhykar wanupe nehe.

Aipo upei'ài'àg putar wà nehe.

7 Aipo erepuner purukutukaw u'ywhu imuzewyxokaw rehe ipir rehe nehe.

Aipo erepuner iàkàg ikutukaw rehe u'ywhu pira zuka haw àràpàw her ma'e pupe.

8 Aze erezeagaw nepokokaw rehe hehe nehe, xo pitài haw erepokok putar hehe nehe.

Nanereharaz pixik kwaw izuwi nehe. Nanereharaz pixik kwaw neàmàtyry'ym awer wi nehe.

9 Xo Erewiàtà rehe ime'e mehe zo teko wakàgaw uhem wanuwi.

Iàkàzym izuwi ukyze pà wà.

10 Aze amo uputupyk, Wikwahy a'e.

Mo oho iàmàtyry'ym pà wà.

11 Mo upuner iàmàtyry'ymaw rehe uzezuka kar 'ym pà wà. Ni amo wà.

Ni amo ywy rehe har nupuner kwaw wà.

12 Aze'eg putar Erewiàtà hetymà rehe nehe kury. Iànàgatu hetymà.

Ni amo ma'ea'yr nuwereko kwaw wetymà hetymà zàwenugar wà.

13 Mo upuner ipir henuhemaw rehe izuwi wà. Heta mokoz ipir tàtà ma'e izupe wà.

Mo upuner ikutukaw rehe wà.

14 Mo upuner izuru iwàpytymawok kar haw rehe izupe wà.

Heta tetea'u hàz iaiw ma'e izupe.

15 Ipekwer uze'yrogatu ikupe ipyk pà.

Uzehyzehykahy uzehezehe wà. Tàtàahy ita ài wà.

16 Uzeakeakeahy uzehezehe wà.

Ywytu noho kwaw wanupi.

17 Uzeakeakeahy uzehezehe uzeàpixipixi pà wà.

Ni amo nupuner kwaw pitài wanehe arer i'okaw rehe amo wanuwi wà.

18 Erewiàtà iàxààxàm mehe uhem tataruwer izuwi.

Heha heny katu kwarahy iku'em mehe har ài.

19 Izuru wi uhem tata.

Uhem tataruwer izuwi.

20 Iapygwar wi uhem tàtàxiner.

Nuzawy kwaw zepe'aw zapepo iwy pe har ukaz ma'e.

21 Ipy haw umunyk a'e tata.

Tata heny kwer uhem izuru wi.

22 Ikàgaw upyta iatuwa rehe.

Huwa umukyze kar teko paw rupi wà.

23 Naheta kwaw ipir ikutuk àwàm.

Ikàg a'e, tàtà ita per ài a'e no.

24 Ipy'a ipuruzukaiwahy ma'e nukyze kwaw ma'e wi.

Tàtàahy ita arozràn imuku'i haw ài.

25 Ipu'àm mehe te ikàg wera'u ma'e ukyzeahy izuwi wà.

Nupuner kwaw ma'e iapo haw rehe wà, ta'e ukyzeahy izuwi wà xe.

26 Naheta kwaw takihepuku ikutukaw rehe upuner ma'e.

Ni purukutukaw, ni u'yw, ni u'ywpuku.

27 Ita per nuzawy kwaw ka'akyr izupe.

Itazu morog nuzawy kwaw ywyra ipyw ma'e izupe no.

28 U'yw numuzàn kar kwaw.

Hehe ita imomor haw nuzawy kwaw ka'api'i hehe imomor haw.

29 Ywyra pupe inupà haw nuzawy kwaw ka'akyr ipuwàpuwàn pyrer pupe inupà haw.

Aze awa omomor purukutukaw ikutyr hagaw pà wà, upuka wanehe a'e.

30 Zapepo ikaika pyrer zàwenugar hakwa katu ma'e upyk hie.

Weruwak to'om ita per imuzemozemog pyrer ài.

31 Omokotok kar yryhu. Nuzawy kwaw 'y zapepo pupe upupur ma'e.

Nuzawy kwaw ma'e kawer zapepohu pupe upupur ma'e.

32 Wata mehe wezar tatainy zàwenugar oho uwaikwer rupi.

Nuzawy kwaw yryhu i'awxig ma'e.

33 Naheta kwaw izàwenugar ko ywy rehe wà.

Azapo ihe, ukyze 'ym ma'e romo imuigo kar pà ihe.

34 Ma'e paw wanehe ume'e mehe, — Heityk pyrer a'e, i'i Erewiàtà a'e ma'e wanupe.

Wiko miar ipuruzukaiwahy ma'e paw wanuwihawete romo a'e.