1 ፆሳ ሼኔ ጊዶናሺን ማቲ ኢሜቶና ጊሾኔ ሃዒ ዴዒያ ሹማቲካ ፆሳ ሼኔን ሹሜቲዳ ጊሾ ኣሲ ኡባይ ዴሪያ ኣይሴይሳታስ ኪቴታናው ቤሴስ። 2 ሄሳ ጊሾ፥ ማታራ ዴዔይሳታስ ኪቴቶና ኢፂያ ኦኒካ ፆሳ ኪታ ኢፄስ። ኪቴቶና ኢፂያ ኦኒካ ባ ቦላ ፒርዳ ኤሄስ። 3 ኣይሴይሳቲ ኢታ ኦꬄይሳታፔ ኣቲን ሎዖ ኦꬄይሳታ ያሾኮና። ኣይሴይሳታስ ያዮና ኣጋናው ኮያይ? ያኮ ሎዖ ኦꬃ፤ ኤንቲ ኔና ጋላታና። 4 ኤንቲ ኔው ሎዖባ ኦꬃናው ሹሜቲዳ ፆሳ ኣይሌ። ሺን ኔኒ ኢታባ ኦꬂኮ፥ ኤንቲ ኢታባ ኦꬂዳይሳ ሴሪያ ጊሾ ኢያው ያያ። ኤንቲ ኢታ ኦꬄይሳታ ሴሪዲ፥ ፆሳ ሃንቁዋ ቆንጪሲያ ፆሳ ኣይሌ። 5 ሄሳ ጊሾ፥ ፆሳ ሃንቁዋ ፃላላስ ጊዶናሺን ሂንቴ ካሃይ ማርካቲያ ጊሾ ዴሪያ ኣይሴይሳታስ ኪቴታናው ቤሴስ።

6 ሂንቴ ጊራ ጊሬይካ ሄሳሳ። ዴሪያ ኣይሴይሳቲ ሄ ኦሱዋ ኦꬄይ፥ ኤንቲ ፆሳ ኣይሌታ ጊዲዳ ጊሾሳ። ማቶ 22፡21፤ ማር 12፡17፤ ሉቃ 20፡25 7 ኢሱዋስ ኢሱዋስ ቤሴይሳ ኢሚቴ። ጊራ ጊራናው ቤሴይሳስ ጊሪቴ፤ ቃራፃ ቃንፃናው ቤሴይሳስ ቃራፃ ቃንፂቴ፤ ያያናው ቤሴይሳስ ያዪቴ፤ ቦንቾይ ቤሴይሳ ቦንቺቴ።

8 ኢሶይ ኢሱዋራ ሲቄቲቴ። ሲቆ ኣጮፔ ኣቲን ሂንቴ ቦላ ሃራ ኣጮይ ዶፖ። ኣሴ ሲቂያ ኦኒካ ሂጌይ ጌይሳ ፖሊስ። 9 «ላሞፋ፤ ዎꬎፓ፤ ካይሶቶፓ፤ ኣሞቶፋ» ጊያ ኪታይኔ ሃራ ኪታ ኡባይ፥ «ኣሴ ኔ ሁዔዳ ዶሳ» ጊያ ኪታን ቃሼቲስ። ኬሳ 20፡13-17፤ ዛሬ 5፡17-19፤ ሌዌ 19፡18 10 ኣሴ ሲቂያ ኦኒካ ኢያ ቦላ ኢታባ ኦꬄና። ሄሳ ጊሾ፥ ኣሴ ሲቄይሲ ሂጌ ኪታ ፖሊስ።

11 ꬊስኮፌ ሂንቴ ባርኪያ ዎዴይ ሃዒ ጊዴይሳ ኣኬኪዲ ሄሳ ኦꬂቴ። ኑ ኣታና ዎዴይ ኮይሮ ኑ ኣማኒዳ ዎዲያፔ ሃዒ ኑኮ ማቲስ። 12 ꬉማ ዎዴይ ኣꬋናው ሃኔስ፤ ዎንታይ ማቲስ። ሂዛ፥ ኑኒ ꬉማ ኦሶ ኣጊዲ ፖዖ ኦላ ሚሼ ኦይኮስ። 13 ኣኔ ጋላስ ፖዖን ዴዒያ ኣሳዳ ማራን ዴዖስ። ማꬆኒኔ ላይማቴꬃራ ጋሄቲያ ዱማ ዱማ ቱና ኦሶታን፥ * ላይማቴꬃራ ጋሄቲያ ዱማ ዱማ ቱና ኦሶታን፡ ዎይኮ ዬꬃን፥ ማꬆን፥ ላይማቶን፥ ቃይፄን ጊዶፖ ጊዲ ቢላናው ዳንዳዔቴስ። ላይማቴꬃራ ጋሄቲያ ዱማ ዱማ ቱና ኦሶቲ ኣሲ ፆሳ ሃሮፔ ካሬ ኬዪዲ ዶዓ ካንዶ ኤኪዲ ፖሊያ ኦሶ ጉሱ። ፓላማኒኔ ቃናቴን ጊዶፖ። 14 ጎዳ ዬሱስ ኪሪስቶሳ ካንዱዋ ማዒቴ፤ ሂንቴ ናጋራንቾ ኣሳቴꬃይ ባ ኣሙዋ ፖላና ሜላ ኢያው ቆፖፊቴ።