1 Dalequ, ko pukudoua na omea inau au sasaniginigo, mo ko laka saikesa na padaleana na omea au tsarivanigo na nauana. 2 Ko rongomidoua na omea e tusu sasaga vanigo, mo ko tovoa na padagadoviana. 3 Eo, igoe ko nongia i koniqu na donalevo; mo ko nongikakaiau na sasaga gana ko gini morogado. 4 Ko madodo na laveana vaga moa ti o lave siliva se na moi. 5 Me ti vaga ko nauvaganana ia, migoe sauba ko padagadovia na rongona na kukuni taniana na Taovia, me sauba ko tangomana na donaginiana God. 6 Aia nogo na Taovia e saua na sasaga loki; mi konina segeni moa ia e talumai na donalevo ma na padagado. 7 Aia e sangagira me reitutugira igira e gotolaka niqira sasaga mara vo peqo. 8 Aia e reitutugugira igira ara naua na pede atsa vanigira na tinoni tavosi, me mataligira igira ara aqo dou vania.

9 Me ti vaga igoe ko rongomiau inau, migoe sauba ko donaginia na omea e dou, me goto, ma na pede atsa. Me sauba ko donaginia na omea nimu aqo ko naua. 10 Igoe sauba ko sasaga loki, mo ko gini mage nimu donalevo. 11 Nimu morogado ma nimu padagado igoe sauba kara ka reitutugugo, 12 ma kara ka dilago tania na nauana na omea e sasi. Sauba kara ka tsidavaginigira tanigo na tinoni ara tsovula gokona na omea seko, 13 igira na tinoni ara mololenogoa na mauri gotolaka gana kara mauri tana rodona na sasi, 14 mara gini mage tana nauana na omea e sasi. 15 Na tinoni vaga gira e tau saikesa goto niqira sasaga, me utu na noruaqira.

16 Migoe tangomana ko sove tania sa daki vanga ngaosasi aia e tovoa ke valogo ko sasi kolua tana nina goko valovalo, 17 aia e tau nogo totu kalavata kolua na savana segeni me padalea nina veke tabu na tauga e naua. 18 Me ti vaga igoe ko vano tana valena aia, me vaga moa ti o tataonia na sautu e vano tana mate. 19 Me tagara goto ke kesa ti ke vano na tsigoviana sa daki vaga ia ke tangomana na visumai. Me utu vanigotoa ke taonivisutugua na sautu na mauri. 20 Eo, migoe dalequ, ti vaga ko sasaga, me sauba ko muria moa niqira omeomea na tinoni dou, me ke gotolaka pipi nimu sasaga. 21 Igira moa e gotolaka niqira sasaga sauba kara tangolidatoa na kao iani ma kara totuvia. 22 Ma God sauba ke tsialigigira na tinoni seko tania na kao, me ke vutiligigira na vanga nausasi vaga moa na buruburu seko ara vutiligigira tania na uta.