2 !Tsonikaea na Taovia!

Igira na Israel ara padakuti matena na vano na vailabu;

migira na tinoni ara tamidou na sangatsari.

3 !Kamu rorongo igamu na taovia tsapakae!

!Kamu rorongovata igamu sui na tagaovera!

Inau sauba kau linge, ma kau taia niqu tuqulu

vania niqira God igira na Israel, aia nogo na Taovia.

4 Taovia, kalina igoe o mololea na vungavunga i Seir,

mi kalina igoe o rutsuligi tania na butona na kao i Edom,

ma na barangengo e kasisi popono, ma na usa loki e tumutsuna mai talu tana masaoka.

Eo, na usa loki e taqetu tsuna talu tana parako.

5 Ma na vungavunga ara viri oloolo takuti i matana na Taovia ni Sinai,

i matana na Taovia aia na God ni Israel.

6 Tana taguna aia Samgar na dalena a Anat,

mi tana taguna ko Jael,

igira ara tavetada ara tau goto dona kara liu tsapatugu tana sautu loki,

igira sui ara liu moa tana sautuligi.

7 Igira na vera sui ni Israel ara totu mangu lê,

eo, ara mangu lê saikesa poi kalina inau ko Debora

au mai vaga kesa na tinaqira na tinoni ni Israel.

8 Mi muri kalina igira na Israel ara vilia visana niqira god vaolu,

mi tana e taratsi tugua na vailabu tana veraqira.

?Mi laoqira ara vati sangavulu na toga na mane ni Israel

me laka ke kesa vidaqira ke adia gana tako se ke kalagaia nina bao? !Tagara!

9 Na tobaqu popono inau e totu kolugira gaqira taovia na mane vaumate ni Israel,

me kolugira goto na tinoni ara tami segeniqira dou sosongo na sangatsari.

!Tsonikaea na Taovia!

10 Kamu gini turupatuna bamai igamu amu sage i gotuna na asi sere,

migamu sui goto amu vanovano lê moa pipi nauna tana amu vano.

11 !Kamu rorongo! !Na toga ara galaleleo polia na tuvu

mara gini gogoko sosongo tana rongona gana tangomana na Taovia,

ma gaqira tangomana igira na tinoni ni Israel!

Mi muri ma nina tinoni na Taovia ara ala tsunamai tana matsapana niqira verabau.

12 Mara tsaria, “!Mamata, ko mamata ko Debora!

!Ko mamata mo ko teâ kesa na linge! !Eo, ko mamata!

!Mo ko ida igoe a Barak na dalena a Abinoam,

mo ko raqavanogira igira igoe o aditsekagira nogo!

13 Mi muri migira na tinoni ni Israel ara alatsuna mai i koniqira gaqira ida;

migira nina tinoni na Taovia ara mai i koniqu inau, mara vangaraua na vano na vailabu.

14 Ara talumai i Epraim mara tsuna bâ tana poi,

i murina na puku konina a Benjamin migira nina toga.

Gaqira taovia na mane vaumate ara tsunamai talu i Makir,

ma niqira manetagao ara tsunamai talu i Sebulun.

15 Igira na tinoni loki ni Isakar ara mai kolua ko Debora;

eo, igira na Isakar ara mai, ma Barak goto e mai,

migira sui na toga ara tsarimurina tsunamai i lao tana poi.

Migira moa tana puku konina a Ruben ara tobatavosi moa;

mara tau tangomana kara pedesaia laka kara tsari se tagara.

16 ?Megua igira ti ara totuvisu lê moa tana baraqira na sipi?

?Ara totuvisu matena ngatsu kara rongomigira na mane pitusipi kalina kara soagira niqira sipi?

Eo, ma na puku konina a Ruben ara tobatavosi moa;

mara tau tangomana kara pedesaia laka kara tsari se tagara.

17 Igira na puku konina a Gad ara totu i ligisana na Kô Jordan tabana i longa,

migira na puku konina a Dan ara totuvisu moa tana vaka.

Migira na puku konina a Aser ara totu moa i tabana tasi;

mara totu kalavata moa i one.

18 Migira moa na tinoni tana puku ka koniqira Sebulun ma Naptali

ara bisâ na mauriqira tana vailabu.

19 I Taanak tana okookona na kô i Megido,

igira na taovia tsapakae ara mai mara vailabugi i tana;

eo, igira na taovia tsapakae ni Kanaan ara vailabugi goto i tana,

mara tau lelê tangomana kara lauligia ke kesa goto na turina tetelo na siliva.

20 Migira goto na veitugu ara tû tana masaoka mara sanga na vailabugi,

kalina ara tarari taligu tana masaoka.

Eo, igira goto ara sangâ na vailabugi koluana a Sisera.

21 Na tatarina na obona na Kô Kison e salaligigira saikesa,

na susuligana nogo na tatarina na Kô Kison.

!Minau sauba kau butusua ma kau vanovano susuliga!

22 Migira na ose ara uloulo mai tsaku

me kabakutukutu tana kao na tuaqira.

23 Ma nina angelo na Taovia e tsaria, “Vealaginia na vera ni Meros,

vatsa seko vania, mo ko vealaginigira na tinoni ara totu i laona.

Rongona igira ara tau mai na sangaana na Taovia,

ara tau mai sanga na vailabu vaniana aia.”

24 Aia ko Jael e dou liuliu bâ i laoqira na daki sui,

aia na tauna a Heber na Ken,

eo e dou liuliu bâ i laoqira na daki sui igira ara totu i laona na valepolo.

25 A Sisera e nongia na kô, maia ko Jael e sauvania na miliki;

e adimai vania na lakana miliki i laona kesa na popo barubaru rerei dou mate.

26 Mi kesa tabana limana e tangoliginia kesa na gai na mani soriginiana na itaina na valepolo,

mi tabana na limana kesa na vatu niqira mani pogapoga igira na maneaqo.

E tupiginia a Sisera me tapali saikesalia na tsivina na lovana;

ma na gai e baoginia na lovana me tsuku tsapatugu.

27 E gini tsutsuvarara na tuturuna,

me puka me tsaro i tuana aia.

I tuana nogo ia aia e gini tsutsuvarara na tuturuna me puka;

e puka saikesa i lao me mate pitsu.

28 Na tinana a Sisera e morotsuna tana matsapana na bisibisi;

e tû i murina na polo e tsautsau tana me moro tatavata.

Me veisuâ: “?Egua vaga nina terê na dalequ e putsi nogo nina tagu me tau vati labamai moa?

?Megua vaga nina ose ti e kisâ sosongo na visumai?”

29 Igira visana na daki sasaga ara totu kolua i tana ara tsarivania,

maia segenina goto e tsarivanisegenia nogo danga kalina na goko vaga iani,

30 “Igira ara totuvisu moa rongona kara lavegira na omea kara laua ma kara tuvarivotâ vanigira segeni,

tau utu kara tango kesa se ruka na daki pipi na mane vaumate,

me ke visana na polo e loki sosongo na matena vania a Sisera,

me ke visana na turina na polo ara tula mamaregasia vania na liona na daki taovia.”

31 !Taovia e dou bâ ti igira sui gamu gala igoe kara mate vaga ia,

migira moa na kulamu igoe kara maka vaga na aso kalina e dato vaolu!