2 “A Job igoe, ko totu berengiti moa mo ko rorongo,

rongona ara visana goto na omea au ngaoa kau tsarivanigo tana asana God.

3 Tana niqu dona inau au vano ao bâ, me sauba kau gini aqo na omea inau au donaginia

tana sauvulagiana laka aia na God e aqosiau inau, e gotolaka saviliu.

4 Me tagara goto sa tsaqina goko inau kau tsarivanigo ke tau mana.

Inau au sasaga sosongo, mau donadouginia laka ara mana sui na omea au tsarivanigo.

5 “!Eo, God e susuliga sosongo, me tau goto dona ke peâ sa tinoni,

me tagara goto sa omea aia ke voginia!

6 Maia e tau tamivanigira na tinoni vanga nauseko kara mauri babâ moa,

me naua na pedegoto pipi kalina vanigira igira ara tau tamanina sa omea.

7 Aia e reitutugugira igira e gotolaka niqira sasaga;

me tamivanigira kara tagao vaga nogo igira na taovia tsapakae,

ma kara padalokigira na dani ma na dani.

8 Me ti vaga na rota loki ke bingi kakaisigira na tinoni,

vaga moa ti ara soriginigira na itai tapala,

mara rota matena nogo na omea seko ara naua,

9 mi tana nogoria God e gini sauvulagi vanigira niqira sasi ma niqira kaekae.

10 Maia e sangavia na kuliqira kara gini rongomia nina goko parovata,

me ketsaligira kara piloligi tania niqira nauseko.

11 Me ti vaga kara rongomangana God ma kara aqo dou vania,

me sauba kara totu tana rago tana mauriqira popono, ma kara tamani omea danga.

12 Me ti ke tagara, me sauba kara gini mate na isi,

eo, sauba nomoa kara mate rongona ara tau sasaga.

13 “Migira ara piloligi tania God ara totu matengana moa na korekore sailagi,

me atsa moa ti vaga kalina God ke kedegira, migira ara tau dona na nongiana ke sangagira.

14 Mara dona moa na nauana na sasaga tabaruga i mataqira na tinoni

mara gini mate kalina ara tinoni vaolu moa.

15 Aia God e dona ke sasaniginigira na tinoni tana rota e gadovigira,

me gini aqo niqira vatsangisavi na sangaviginiana na mataqira.

16 “Migoe a Job, o rota loki sosongo kalina ia, me varangi nogo ko mate.

Ma God e ngao mananâ ke maurisigo,

me ke tamivanigo na totu raviravi dou tana rago;

me ke tusuvanigo ke danga gamu mutsa dou, me ke tagara goto sa omea seko ke gadovigo.

17 Bâ, mi kalina ia, igoe o gadovikede tana rongona na omea seko igoe o tsukigira.

18 !Me ke reigo dou! Ko laka na tamivaniana nimu momosatoba ke tubulaginigo mo ko gini tsonia na goko pea kalea God;

se na tamani omea danga ke raqa sasiligo.

19 Sauba e utu ke pelugo sa omea na ngangaidato vania God ke sangago,

me atsa moa goto ti ko tovoa tana susuligamu popono,

maia e utu goto ke didia tanigo gamu vatsangisavi.

20 Mo ko laka goto na amesiana na bongi ke mai,

rongona tana bongi nogo ara dona laba na omea ara toroveoa na veraqira na tinoni sui.

21 Ko parovata dou mo ko laka goto na pilo bâ tana nauseko;

rongona na rota God e molomaia vanigo aia e naua gana ke dilaginigo mo ko tau puka tana sasi.

22 “Ko padatugua na lokina gana susuliga God;

aia nogo na tarai loki liusigira na tarai sui lakalaka.

23 Me tau tangomana kesa ke pedevania God na omea aia ke naua,

se ke keli vania me ke tsaria, ‘Igoe nogo God o naua na omea e tau goto.’

24 Tagara, igira na tinoni ara tsonikae sailaginia moa God tana rongona na omea dou sui aia e naugira;

migoe goto nimu aqo ko tsonikaea aia.

25 Pipi gita sui lakalaka a reigira nogo na omea aia e naugira;

ma tau moa padagadovidougira.

26 Ma tau goto tangomana ka donagini poponoa gana loki tsapakae,

se ka tsokoa na dangana na ngalitupana.

27 “God nogo e adidatoa i gotu na kô,

me lia na usa te e tumu tsunamai.

28 Me moloa na usa ke talumai tana parako

me ke tumuligira na mamatana tinoni sui.

29 Me tagara kesa ke donaginia laka e koegua na parako te ara tavota bamai,

se koegua te e poda na quluqulu tana masaoka i tana e totu God.

30 Me moloa na angaanga ke kirapi bamai tana masaoka,

me marara tsuna saviliu tana pikana na maorodo.

31 Maia nogo e nauvaganana ia te e palaginigira na toga

mara gini tamanina danga gaqira mutsa.

32 Na limana nogo aia e raqaginigira na angaanga,

me ketsaligira kara ba gadolaka tana nauna aia e pede manogatinogoa vanigira.

33 Kalina e poda na quluqulu maia na papadana laka sauba ke laba na legai loki,

migira goto na daula ara sauvulagia laka sauba ke mai na koburu.”