2 “Inau au gini vatsa tana asana God Susuliga Sosongo,

aia nogo e tongo vaniau na pedegoto, me naua me gini seko sosongo na mauriqu,

3 laka tana tagu popono God ke tamivaniau moa na mauri,

4 ma na mangaqu e utu saikesa ke tsaria sa na omea ke seko,

ma na lapiqu e utu saikesa ke tsaria sa goko ke pero.

5 Me utu saikesa goto kau tsaria laka e mana tu nimui goko tugamu;

me poi tsau tana dani kau mate inau sauba moa kau livusuguradi tana rongona au tau tsukia sa sasi.

6 Me sauba e utu goto kau kuti na tsariana laka e gotolaka niqu sasaga;

mau maka saikesa i laona tobaqu.

7 “Mau amesia laka igira sui lakalaka ara tukapusiau mara labuginiau niqira goko

kara gadovikede vaga nogo igira na vanga tsutsukibo e tau goto niqira sasaga.

8 ?Migira ara tau tutunina God mara tau dona na aqo vaniana, nagua goto sauba kara amesia

kalina God ke suilavaginia na mauriqira?

9 ?Mi kalina ti vaga ke gadovigira na rota loki ma kara ngangaidato vania God ke sangagira,

me laka aia sauba ke rongomigira?

10 ?Me laka tana mauriqira gira ara gini magemage na totu koluana God Susuliga Sosongo

ma na nonginongi sailagi vaniana?

11 “Mi kalina ia, ma kamu tu tamivaniau inau ma kau sasani tugamu e koegua na lokina gana susuliga God,

ma kau tsaritutugu vanitugamu na omea aia na God Susuliga Sosongo e vangaraunogoa na nauana.

12 Me tagara, e tau kiligotoa inau kau tsaria sa omea, rongona tugamu amu tu dona segenimui nogo.

?Me vaga ia megua tugamu ti amu tu tsaria danga na goko tagara rongona lê vaga ia?

13 “Eo, e vaga nogo na kede God Susuliga Sosongo e vangaraunogoa ke kedeginigira

igira na vanga tsutsukibo ara bingisekoli tinoni.

14 Kara tamanina danga rago na daleqira mane,

me sauba moa kara mate sui tana tagu na vailabu;

ma na daleqira ara totuvisu kara tau saikesa goto tamanina na mutsa ke tugugira na ganiana.

15 Migira ara matepitsa tana vailabu sauba moa kara gini mate na lobogu,

migira na tinamateqira sauba e utu goto kara tangisigira.

16 Me atsa moa ti igira na tinoni vanga tsutsukibo ara tamanina danga sosongo niqira siliva me ke utu na tsokoraeaqira,

me ke danga na poloqira me ke utu kara sageligira sui,

17 me sauba kara visana na mane dou kara sagelia na poloqira,

ma na mane e goto niqira sasaga kara adia niqira siliva.

18 Ma na vale ara logoa igira na vanga tsutsukibo ara tau lele kakai,

ara vaga moa na laolao e logoa na komitsi,

se na babale ara logoa tana uta.

19 Me kesa lelê moa tana bongi kalina igira kara ba maturu,

maia nogo na susuina na reilakana pipi sui niqira omea tatamani,

rongona kalina kara mamata tana matsaraka, me sauba kara lave tagara gira.

20 Na matagu loki sauba ke novotigira vaga moa kalina e tavongani tave na obo loki;

ma na viru tana bongi sauba ke virusaginigira;

21 ma na guguri votu sauba ke uvi salaligigira tania na valeqira;

22-23 maia sauba ke tau lelê galuvegira,

me ke guvisala ba moa i koniqira, me ke gaelaginigira kalina kara tovoa na tsogoligi taniana na susuligana.”