2 “Kamu rorongomai kalina inau kau goko vanigamu,

aia moa na omea au nongia i konimui ngiti vereaqu.

3 Kamu tamivaniau ma kau goko talu,

mi kalina kau goko sui mi tana ti kamu galeau babâ moa ti vaga amu padangaoa.

4 “?Egua igamu amu padâ laka inau au vaiganigi kolua sa tinoni lê moa? Tagara saikesa.

Au nauvania moa God, me gini seko tobaqu rongona aia e tau tuguvisu vaniau sa niqu goko.

5 Kamu moromai i koniqu. ?Laka e tau tugua kamu gini beke, ma kamu ponoti mangamui?

6 Mi kalina inau au papada tana rongoqira na omea ara laba vaniau,

mau novo mate, mau gagariri tana matagu.

7 “?Megua nogo God te e tamivanigira na tinoni seko

mara mauri oka mara tamani omea danga?

8 Mara danga na daleqira ma na kukuaqira,

mara reigira babâ poi tsau kalina ara loki.

9 Ara totu raviravi dou i laona na valeqira, me tagara sa omea kara matagunia.

Ma God e tau goto molomaia sa omea seko ke gadovigira.

10 Eo, me pipi sui niqira buluka ara vasusu dato,

mara tau goto dona kara vasusu mate.

11 Ma na daleqira ara ulo bamai mara sisinagi vaga moa ti na dalena sipi,

12 mara gagavai muria na tatangina na itai tatangi ma na uete.

13 Mara mauri babâ moa tana rago tana mauriqira popono

mara mate dodo moa mara tau goto vatsangia sa rota.

14 “Migira na vanga tsutsukibo ara tsarivaganana vania God, ‘!Ko mololegami, ma kami totu segeni!

Ami tau goto ngaoa kami donaginia na omea igoe o pedevania na maurimami.’

15 Mara tsarigotoa, ‘?Masei vaga Aia e Susuliga Sosongo ti igami kami rongomangana?

?Me laka nagua ke pelugita ti vaga igita ka lotu vania?’

16 Mara koesegeniqira laka tana gaqira susuliga segeni nogo te e gini managaqira,

minau moa e utu saikesa vaniau kau tabea na omea vaga ara pada igira.

17 “?Me laka e visa nogo kalina God e sekolivania na maurina kesa na tinoni vanga tsutsukibo?

?Me laka sa vidaqira e tsodonogoa sa omea seko loki?

?Me laka God e kedenogoa sa vanga tsutsukibo tana nina kore loki,

18 me uvi salalea vaga moa ti na rau makede e puasala na guguri,

se na papasa e lovosaginia na tulonga loki?

19 “Migamu amu tsaria, ‘God e kedeginia na baka tana rongona nina sasi na tamana.’

Minau au padâ laka na tsaqina goko vaga ia e tau goto.

Ke dou bâ ti vaga God ke kedegira igira segeni nogo ara naua na tsutsukibo,

mi tana ke gini labamaka laka aia e kedegira tana rongona niqira sasi segeni nogo igira.

20 Molo vanigira nogo igira na vanga nauseko ke gadovigira segeni na kedena niqira nauseko,

ma kara vatsangia na korena God Susuliga Sosongo.

21 ?Mi kalina ti vaga ke vano putsi nogo na maurina kesa tinoni,

me laka aia sauba ke boeginigira moa na dalena?

22 ?Laka tangomana kesa tinoni ke sasania God sa omea,

maia segeni nogo e pedegira igira na angelo ni gotu?

23-24 “Au reigira ara visana tinoni ara mamauri dou moa tana mauriqira popono;

ara totu tana magemage me tau goto ngoligira sa omea,

mara palaginia na koniqira gana mutsa dou poi tsau kalina ara mate.

25 Me visana ara tau saikesa dona na magemage tana mauriqira popono,

ara mauri mara mate tana tobamelu.

26 Migira sui lakalaka ara mate mara vano tana qilu,

ma na meri e dangali poponoa na koniqira.

27 “Inau au donaginigamu laka amu pada moa na sekoliaqu.

28 Amu veisuâ vaga ni, ‘?Mi kalina ia laka iava nogo e ba liu na valena na tinoni tangirongo,

aia na mane ri e tau kuti na nausailaginiana na omea seko?’

29 ?Megua, laka igamu amu tau nogo goko kolugira na tinoni ara liu tavetada?

?Me laka amu tau rongomia niqira tatamanga ara adivisumaia?

30 ?Mi tana dani aia God ke kore me ke pedegira na tinoni,

megua ti e gaegira pipi kalina moa na tinoni vanga tsutsukibo?

31 ?Masei tangomana ke taimatana na tinoni vanga tsutsukibo,

me ke labuvisuginia tana rongona pipi sui na omea seko aia e naugira?

32 Mi kalina aia e mate mara kalagaivanoa tana qiluqilu,

mara matalidou sosongolia na qiluna,

33 ma na toga na tinoni ara alavano na sangâ na qiluana,

ma na kao goto e punu malamala lea moa na konina.

34 “!Migamu amu tovoa moa laka kamu vereginiau nimui tsaqina goko tau sasaga!

!Me pipi sui lakalaka nimui tugugoko amu naua igira na perona sui moa!”