1 Mara sago Jeikap da Liya natusi wiwikena kana vava Daina inumataya inae da Keinan wivine ita kitisi. 2 Ma Hivi tomowa sago wiwikena ikitai, tomowina kana vava Sekem, tuna na Hamo natuna ma Hamo na nani dobuna paratina kana kiivavo. Vaghina ma, Daina ikitai na ivotani ma ikenei. 3 Ma wavinena ivi karawata kirakai da nuwanuwana iviiya. Tuna kubiine ivi marumarui, ina kayowana ghamana da yavata iti turana. 4 Vaghina Sekem ina mamai ivonei bo, “Aku kayowana ghamana da nani wavinena kuta viiya da kawaku.”

5 Iya mara gurina ma Jeikap akova iviiya da Sekem, Daina ikenei da Daina tupuwina ikiiviberoi. Ma Jeikap natunatuna tomotomowisi warereyai i ghamoghamo ikoyakoyaghisi kubiine ivi kawapotapota da ita vovira.

6 Sekem ina mamai Hamo yavata inae Jeikap kurina da iti sisiya. 7 Ma nani kamonai na Jeikap natunatuna warereyai inekiibau. Sisiya ivi yanei na itataghana ma nuwanuwasi ipughu kirakai da Sekem novusi ikenei. Sekem weni berana iberai na Jeikap ina rakaraka kurisi na ibero kirakai.

8 Hamo, Jeikap ivonei bo, “Natuku Sekem natum wavinena nuwanuwana ivii kirakiiyei ma ainowi da kevi vaghinei da ina ravaghi. 9 Vivaghina taberai da natunatumi wivinesi ina pisi gwabikiiyai ina tavine ma bade natunatukai wivinesi ina nae da gwabimiyai ina tavine. 10 Weni berana taberai ina kovi na aivaghinei da weni dobunai tamakai patapata. Weni dobunai kuna makai da kuni wadubo ma kuni gimagimara wapawapa.”

11 Sekem tuna mani Daina ina mamai da novunovuna kurisi ivi sisiya, ivona bo, “Ainowi da koni vaghinei da Daina ana ravaghi. Koni vaghinei na aviyavisina kona kayowei na ana veremi.” 12 Ma wavinena miiyanina na ami kayowana nununai koterepai. Ma mikeda koni vaghinei da wavinena ana ravaghi na aviyavisina kokayokayowei na peyarina ana veremi.

13 Ma Sekem bera berona iberai da novusi Daina ikenei, tuna kubiine Jeikap natunatuna tomotomowisi viberowai Sekem ina mamai Hamo yavata ivonapotesi. 14 Ivonei bo, “Ke kovokovoghina kani vaghinei da Sekem novukai ina ravaghi, iyamna ke iti tuvivira. Tomowa ke iti tuvivira ina ravaghi na berana ivi inimayamaya kirakai kurikai. 15 Ma mikeda ami tomotomowa kudubisi ini tuvivira tokai nakanani na vaghina, tokai kani vaghinei. 16 Ma bade kani vaghinei da titavine vivirana ma yavata tamakai patapata da dam sago. 17 Ke koni vaghinei da koni tuvivira na novukai kana rutini ma kana nae.”

18 Weni notana Jeikap natunatuna yavata iterei na ibiibai da Hamo natuna Sekem yavata ivi vaghinei. 19 Ma Sekem tuna Hamo ina rakaraka kamonai wawaya ghamana ma ina nuwaviina ghamana Jeikap natuna wavinena tuna kubiine avina ita virai aviyavisina ivonavonei na iberai.

20 Vaghina, Hamo natuna Sekem yavata inae i ku vidughu gawarina, i kwanatu matuketinai da tomotomowa kurisi iti sisiya. 21 Ivona bo, “Weni damsi na turaturata, kovoteresi da ita dobuwai ina makai ma ini gimagimara wapawapa. Dowa irakata kirakai da ti kubiisi. Ma ti ma tota titavinevivirana. 22 Nani damsi ivona da ikikava ituvivira na tota tomotomowa kudubita bade nakanani tituvivira. Taberai na ini vaghinei da yavata tamakai da ti dam sago. 23 Ma weni nakanani taberai na kara i ghamoghamo ma i sawara kudubina tota tirapenei, tuna kubiine tivaghinei da yavata tamakai.”

24 Ma aviyavisina kudubina Hamo natuna Sekem yavata ivivi sisiyei na peyarina kwanatu damsi ivi vaghinei da i tomotomowa kudubisi kwimata bekasi ituvivira.

25 Mara aroba murinai patana da inivisi damina iviiviiya ma Jeikap natunatuna ruwa Simiyon da Livai, ti na Daina novunovuna, i seri iyuna ma irui ku kwanatu da wawaya imakamakii nunuwapa ma ikunisi da tomotomowa kudubisi ivi kiivunuwana yavu. 26 Ma bade Hamo natuna Sekem yavata ivi kiivunuwana ma ina numa kamonai Daina irutini da yavata inae. 27 Jeikap natunatuna viya inekiibau ma ipanani da wawaya irukwa na novusi biwana iviiya, irui kwanatu ku kamona da sawara kudubina iyapi. 28 I sipu da i kau yavoyavosi ma bade i donki ma i sawara kudubina kwanatu kamonai ma kupunai iyapi yavui. 29 I mura ma isawara peyarina i numa kamosiyai na ipupuna yavui. Ma bade ededa yoghoyogho ma wivine ipanisi ma irutinisi da inae.

30 Nani murinai Jeikap natunatuna Simiyon da Livai ivonesi bo, “Tami ku nuwapoya kotereku, karako Keinan damsi da Peres damsi ma nani dobuna makamakiisi kudubisi ini kawapateku. Taku aku iyo wawayisi ke ita peyari ma mikeda nani damsi ina tarakapu ma ina kayaya kuriku na ita rakaraka kudubina ina kiipupunatawei.”

31 Ma kegha, ivonapotei bo, “Ke vaghina da nani tomowina kata voterei iyamna novukai iberai da nakanani ma wavine madamadawarina.”