1 ታፔ ጪማዛፔ፤ ቱማፔ ታ ዶሲዛ ዶሬቲዳ ጎዳቴይሲኔ ኢዚ ናይታስ፤ ታና ፃላ ጊዶንታ ቱሙ ኤሪዛይቲ ዉሪ ዶሲዛሪስ ኪቴቲዳ ኪታ። * ጎዳቴይሲኔ ኢዚ ናይታስ ዎሳ ኬꬃን ዲዛ ኣባሌታ (ኣማኒዛ ኣሳ) ቤሴስ። ፓይዶ 4-5 ፄላ። 2 ጋሶይካ ሃይሲ ቱማይ ሃዒካ ኑ ጊዶን ዲዛይሳኔ ሲንꬃፌካ ሜርናስ ዳናይሳ።

3 ፆሳ ኣዋፔኔ ኢዛ ና ዬሱስ ኪርስቶሳፔ ኪያቴꬂ፥ ማሮቴꬂኔ ሳሮይ ቱማኒኔ ሲቆን ኑናራ ጊዶ።

4 ኔ ናይታፔ ባጋቲ ኣዋፔ ኑስ ኢሜቲዳ ኣዛዞዛ ማላ ቱማን ሚኒ ዲዛይታ ታ ቤዪዳ ጊሽ ዳሮ ኡፋዬታዲስ። 5 ሃዒካ ጎዳቴዬ! ካሴፔካ ዲዛሮ ኣቲን ታ ኔስ ሃራ ኦራꬃ ኣዛዞ ፃፊኬ፤ ሄሲካ ኑኒ ኑ ጊዶን ሲቄታናይሳ። * ዮሃ 13፡34፤ 15፡12፥17 6 ሄ ሲቆይካ ኑ ኢዛ ኣዛዞዛ ማላ ዳናይሳ። ኣዛዞዚካ ኢንቴ ኮይሮ ሲዪዳ ማላ ሲቆን ዳና ማላ።

7 ዬሱስ ኪርስቶሲ ኣሳ ኣሾ ማይዒዲ ዪቤና ጊዛ ኣማኖንታ ዳሮ ባሌꬂዛይቲ ኣላሜ ቦላ ላሌቲዳ። ሄይታ ማላይ ኣይ ኣሲካ ኣስ ባሌꬂዛዴኔ ኪርስቶሳራ ኤቄቲዛዴ። 8 ኢንቴ ጊዲኮ ኢንቴ ዳቡራ ዋጋፔ ሜላ ኣቶንታ ማላኔ ኩሜꬃ ዎይቶ ኤካና ማላ ኢንቴ ሁዔስ ናጌቲቴ። 9 ኪርስቶሳ ቲሚርቴ ማላ ዶንታ ኣሲኔ ኢዛ ቲሚርቴፌ ባሌቲዲ ካሬ ኬዚዛ ኣስ ኦናንካ ፆሲ ዴና። ኪርስቶሳ ቲሚርቴን ዲዛዴይ ጊዲኮ ኢዛስ ኣዋይኔ ኣዋ ናይ ዴቴስ። 10 ኦኒካ ኢንቴኮ ዪሼ ሄሳ ሄ ቲሚርቴዛ ኤኪ ዮንታ ኣስ ሞኪ ኤኮፍቴኔ ሳሮካ ጎፒቴ። 11 ሞኪ ኤኪዲ ባሶ ጌልꬂዛዴይ ሄሳዴ ኦሶን ኢዛራ ኢሲኖ ጊዴስ።

12 ታ ኢንቴስ ፃፋናስ ኮዪዛ ዳሮ ሚሺ ዴሲሺን ዋራቃታኒኔ ቃላሜን ፃፋና ማላ ኮይኬ። ጊዲኮካ ኑ ኡፋይሳይ ኩሜꬅ ጊዳና ማላ ታ ኢንቴኮ ባዳ ኢንቴ ሲንꬃን ኢንቴናራ ሃሳያናስ ሂዶታ ኦꬃይስ። 13 ዶሬቲዳ ኔ ሚቼይ ናይቲ ኔና ሳሮ ጌቴስ።